Илъэс пчъагъэхэм Iофэу ышIагъэм къыкIэкIогъэ щытхъуцI. Адыгэ Республикэм и ЛIышъхьэу КъумпIыл Мурат и УнашъокIэ щытхъуцIэу «Адыгэ Республикэм изаслуженнэ врач» зыфиIорэр тичIыгогъоу Нэпсэу Хьазрэт Рэщыдэ ыкъом къыфагъэшъошагъ.
Хьазрэт Хьакурынэхьаблэ къыщыхъугъ, ау ылъапсэкIэ шапсыгъ — ащ ятэ, заом ыкIи IофшIэным яветеран, дзэ орден ыкIи медаль пчъагъэхэр къылэжьыгъэх, ар журналистэу Нэпсэу Рэщыд ары, къуаджэу Хьаджыкъо щыщ.
Пшызэ къэралыгъо медицинэ институтым идиплом къызыратыжьым ыуж, 1980-рэ илъэсым, спе-циалист ныбжьыкIэм ординатурэр къыухыжьыгъ, зыщеджагъэр лъынтфэ хирургиемкIэ Гупчэ ин-ститутэу Киев дэтыр ары, исэнэхьаткIэ ангиохирург.
Нэпсэу Хьазрэт IофшIэныр Адыгэ хэку сымэджэщым щыригъэжьэгъагъ (1985 — 1997), джыри илъэсиплIырэ мэшIокугъогу сымэджэщэу Краснодар дэтым щылэжьагъ. Ащ къыкIэлъыкIоу лIэшIэгъу плIанэ хъугъэшъ сэнаущыгъэшхо зыхэлъ хирургыр Шъэумэн Хьазрэт ыцIэ зыхьырэ клиникэу къуаджэу Афыпсыпэ дэтым щэлажьэ. Ар хирургиемкIэ отделением ипащ, апшъэрэ категорие зиIэ врач. ЗэкIэмкIи илъэс 41-рэ хъугъэ медицинэм Iоф зыщишIэрэр. Медалэу «IофшIэным иветеран» ыкIи Урысые Федерацием псауныгъэр къэухъумэгъэнымкIэ и Министерствэ и Щытхъу тхылъ къыфагъэшъошагъэх.
— Хьазрэт Рэщыдэ ыкъор гу-лъынтфэ хирургиемкIэ IэпэIэсэныгъэ зиIэ, шIэныгъэ куу зыгъотыгъэ цIыфэу щыт, — къыщыкIагъэтхъыгъ клиникэм. — Ащ исэнэхьат анахь пшъэдэкIыжь зыпылъ лъэныкъоу медицинэм иIэхэм ащыщ. Сымаджэр врачым щэгугъы, ащ цыхьэ фешIы, IэпыIэгъум къежэ. Хьазрэт фэдэ IэпэIасэхэм яIофшIэн ары ахэм ягугъапIэхэр къэзыгъэшъыпкъэжьыхэ-рэр, ящыIакIэ нахьышIу зышIыхэрэр.
