БэмышIэу имэфэкI мафэ хигъэунэфыкIыгъ ТIопсэ шъолъырым ит поселкэу Нэджэпсыкъо щыщэу, IофшIэным иветеранэу, культурэмкIэ Пшызэ изаслуженнэ IофышIэу Ацумыжъ Нуриет Махьмудэ ыпхъум.
Къуаджэу Псыбэ къыщыхъугъэ Алалэ Нуриет культурэм ищыIэныгъэ фигъэхьыгъ. 1973-рэ илъэсым Мыекъопэ музыкальнэ училищыр къызеухым, ащ искусствэхэмкIэ кIэлэцIыкIу еджапIэу Нэджэпсыкъо дэтым Iоф щишIэнэу ыублагъ ыкIи илъэс щэкIым ехъурэ щылэжьагъ. Сэнаущыгъэ зыхэлъ лIэуж пчъагъэ ащ ыгъэсагъ. Ацумыжъ Руслъан унагъо дишIагъ. ТIопсэ шъолъырым культурэмкIэ иIофышIэхэр зимэфэкIым фэгушIуагъэх.
«Укъызыхъугъэ мэфэкI мафэмкIэ тыгу къыддеIэу тыпфэгушIо! Нэджэпсыкъо искусствэхэмкIэ кIэлэ-цIыкIу еджапIэу Г. Ф. Пономаренкэм ыцIэ зыхьэу дэтым илъэс щэкIырэ тIурэ угу етыгъэу ущылэжьагъ — ар гъэшIэ псау мэхъу, ащ фэдизым сэнаущыгъэ зыхэлъ сабыймэ искусствэр шIу ябгъэлъэгъугъ, уишIуагъэ ябгъэкIыгъ, — къыщеIо муниципалитетым иадминистрацие культурэмкIэ игъэIорышIапIэ ипащэу Юлия Даниловам ыкIи профсоюз комитетым итхьаматэу Ольга Киященкэм шIуфэс тхылъэу къыфагъэхьыгъэм. — УиIоф хэшIыкIышхо фыуиI, уIэпэIас, творчествэм имэшIуачэ кIэлэцIыкIумэ зэхашIэнымкIэ уадэIэпыIэ. Бгъэсагъэхэр мызэу, мытIоу зэнэкъокъухэм ыкIи фестивальхэм ялауреат хъугъэх, ахэм ащыщыбэр искусствэм игъогу рыкIуагъ. ЩыIэныгъэм узэрэщычаныр, еджапIэм ипрофсоюзнэ комитет пэщэныгъэр зэрэдызепхьэрэ шIыкIэр тэркIэ ренэу щысэтехыпIэу щытыгъ.
УимэфэкI мафэ тефэу тыкъыпфэлъаIо псауныгъэ пытэ уиIэнэу, гукъыдэчъмэ ыкIи текIоныгъэмэ уащымыкIэнэу, мафэ къэс насып бгъотынэу!».
