Зы нэбгырэ хэкIодагъ
Чэщ-зымафэм къыкIоцI Адыгеим игъогухэм хъугъэ-шIэгъитIу ащагъэунэфыгъ, ахэм зы нэбгырэ ахэкIодагъ, адрэм шъобжхэр тещагъэ хъугъэ.
ПэшIорыгъэшъэу зэрагъэунэфыгъэмкIэ, мэкъуогъум и 29-м Кощхьэблэ районым щыпсэурэ илъэс 31-рэ зыныбжь кIалэу пит-байкым тесыгъэм ар фэмыгъэIорышIэжьэу игъогу дэчъэхи, чырбыщ зэтелъым еутэкIыгъ. Шъобжэу тещагъэхэм апкъ къикIэу водителым мы чIыпIэм идунай щихъожьыгъ. Район полицием иследовательхэм мы хъугъэ-шIагъэм фэгъэхьыгъэу уплъэкIунхэр зэхащагъ.
Джыри зы гъогу хъугъэ-шIагъэ Мыекъопэ районым щагъэунэфыгъ. Мыщ щыпсэурэ илъэс 20 зыныбжь пшъэшъэжъыем IэкIыбым къыщашIыгъэ автомобилыр ыгъэIорышIэзэ гъогурыкIоным ишапхъэхэр ыукъохи, тикъэралыгъо къыщашIыгъэ автомобилэу илъэс 19 зыныбжь кIалэр зэрысыгъэм еутэкIыгъ. КIалэм шъобжхэр тещагъэхэу сымэджэщым ащагъ. Мы хъугъэ-шIагъэм лъапсэ фэхъугъэр агъэунэфы.
IэкIыбым щыщхэр къаубытыгъэх
АР-м хэгъэгу кIоцI IофхэмкIэ и Министерствэ наркотикхэр хэбзэнчъэу къезыгъэкIокIыхэрэм апэуцужьыгъэнымкIэ и ГъэIорышIапIэ къэбарэу къыIэкIэхьагъэр яIэубытыпIэу уплъэкIунхэр зызэхащэхэм, IэкIыбым щыщ нэбгыритIу къаубытыгъ.
Илъэс 24-рэ ыкIи илъэс 29-рэ зыныбжь хьакIэхэм ахъщэ псынкIэ къагъэхъэн ямурадэу наркотикхэр хэбзэнчъэу къырагъэкIокIыщтыгъ. Интернетым инэкIубгъохэмкIэ амышIэрэ кураторхэм нэIуасэ афэхъухи, синтетикэ зыхэлъ наркотикыр бэу къызIэкIагъахьэщтыгъ, нэужым ахэр зэешъогъоу агощызэ, гъэбылъыпIэхэм ащагъэтIылъызэ ащэщтыгъэх.
IэкIыбым щыщхэу наркотикыр къезыгъэкIокIыхэрэр полицием икъулыкъушIэхэм къызагъэуцухэм наркотик зыхэлъ вещество щыхьэгъэ 300-м ехъу яавтомобиль къырагъотагъ.ЗэрагъэунэфыгъэмкIэ, бзэджашIэхэм IуагъэкIынэу щытыгъэ наркотикым мыр изы Iахьэу щытыгъ. ЫпкIэ атызэ къаубытыгъэ фэтэрэу зыщыпсэущтыгъэхэр къызалъыхъум, етIани ащ фэдэ щыхьэгъэ 337-рэ ыкIи нэмыкI пкъыгъохэри къырагъотагъэх.
Нэужым экспертизэм зэригъэунэфыгъэмкIэ, щыхьагъэу къаIахыгъэр наркотик лъэпкъэу «метадон» зыцIэр ары, ар зэкIэмкIи грамми 150-рэ хъущтыгъ.
БзэджашIэхэм алъэныкъокIэ Мыекъуапэ следствиемкIэ иполицие уголовнэ Iоф къызэIуихыгъ. Мы уахътэм зэхэфынхэр макIох.
Уголовнэ Iоф къыфызэIуахыгъ
Джырэблагъэ Кощхьэблэ районым гъогу-патруль къулыкъум иIофышIэхэм пэшIорыгъэшъ Iофтхьабзэхэр щырагъэкIокIыхэзэ, Краснодар краим щыщ хъулъфыгъэу илъэс 45-рэ зыныбжьэу скутерыр зыгъэIорышIэщтыгъэр къагъэуцугъ.
Хъулъфыгъэм дэгущыIэхэзэ, къулыкъушIэхэм гу лъатагъ ар зэрешъуагъэм. Ащ къыхэкIэу медицинэ уплъэкIунхэр рагъэшIын фаеу раIуагъ. Ау водителыр ащ къезэгъыгъэп. Нэужым полицейскэхэм зэрагъэунэфыгъэмкIэ, хъулъфыгъэр мыщ ыпэкIэ ешъуагъэу къагъэуцуи административнэ пшъэдэкIыжь тыралъхьагъ ыкIи итхылъхэр Iахыгъэх.
Скутерыр хъулъфыгъэм къыIахи, хэушъхьафыкIыгъэ уцупIэм дагъэуцуагъ. Мы хъугъэ-шIагъэм епхыгъэу Урысыем хэгъэгу кIоцI IофхэмкIэ и Министерствэ хъулъфыгъэм уголовнэ Iоф къыфызэIуихыгъ.
ГъэпцIакIом лъэхъух
Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм идежурнэ часть илъэс 31-рэ зыныбжь бзылъфыгъэм зыфигъэзагъ. Ащ лъапсэ фэхъугъэр гъэпцIагъэ зыхэлъ бзэджэшIагъэ къыдызэрахьи, сомэ мини 190-рэ фэдиз зэрэшIуатыгъугъэр ары. Полицием зэригъэунэфыгъэмкIэ, мэфэ заулэкIэ узэкIэIэбэжьмэ, мессенджерхэм ащыщ горэмкIэ онлайн-джэгунхэм бзылъфыгъэр ахэлэжьагъ. Бэ темышIэу ащ мэкъэгъэIу къыфэкIуагъ шIухьафтын къыхьыгъэу, ау ар къыратыжьыным пае хэбзэIахь ытын фаеу къыраIуагъ. Бзылъфыгъэм счетэу къыфагъэхьыгъэм ахъщэ афыригъэхьагъ, ау ар имыкъугъэу, джыри хигъэхъон фаеу бзэджашIэхэм алъытагъ.
ХэбзэIахьэу зыфаIуагъэр афыригъэхьагъ нахь мышIэми, бзылъфыгъэм шIухьафтынэу къыхьыгъэр къыратыжьыгъэп. Сомэ мини 190-рэ фэдиз бзэджашIэхэм къызIэкIагъахьи, загъэбылъыжьыгъ.Мы хъугъэ-шIагъэмкIэ Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм уголовнэ Iоф къызэIуихыгъ. БзэджашIэхэм якъыхэгъэщын епхыгъэ IофшIэнхэр къулыкъушIэхэм зэрахьэ.
ТыгъуакIор агъэунэфыгъ
Красногвардейскэ районым щызэрахьэгъэ тыгъон бзэджэшIагъэр полицием икъулыкъушIэхэм къычIагъэщыгъ.
КъулыкъушIэхэм оперативнэ-лъыхъун Iофтхьабзэхэр зэрахьэхэзэ, Тульскэ хэкум щыщ хъулъфыгъэу илъэс 41-рэ зыныбжьыр къаубытыгъ ыкIи уголовнэ Iоф къыфызэIуахыгъ.
ЗэрагъэунэфыгъэмкIэ, хъулъфыгъэр тучан горэм чIэтэу сомэ мини 5 зыосэ товар къытыгъугъ. Ар къызаубытым, ытыгъугъэм ызыныкъор къыIахыжьыгъ, джыри нэмыкI тыгъон бзэджэшIагъэ зэрихьагъэмэ мы уахътэм ауплъэкIу.
Мыщ фэдэ хъугъэ-шIагъэ Мыекъуапи щызэрахьагъэу къыхагъэщыгъ. Амыгъэунэфыгъэ горэхэм къалэм дэт тучанхэм ащыщ сомэ мини 3 зыосэ хьап-щыпхэр къыщатыгъугъ. Полицием икъулыкъушIэхэм лъыхъун Iофтхьабзэу зэрахьагъэхэм къакIэлъыкIоу илъэс 29-рэ зыныбжь бзылъфыгъэр къаубытыгъ ыкIи ар ышIагъэм еуцолIэжьыгъ.
Мы хъугъэ-шIагъэм епхыгъэу дознанием икъулыкъушIэхэм уголовнэ Iоф къызэIуахыгъ.АР-м хэгъэгу кIоцI IофхэмкIэ и Министерствэ сатыушIыпIэ тучан зиIэхэм зафегъазэ щынэгъончъэным ишапхъэхэр агъэлъэшынэу, зыгорэкIэ къятыгъуагъэхэу егуцафэхэмэ, полицием макъэ рагъэIунэу.
КIАРЭ Фатим.