А. Гусев
Республикэм и Правительствэ зычIэт унэм Адыгеим и ЛIышъхьэу КъумпIыл Мурат бэмышIэу Джэджэ районым ипащэу хадзыгъэ Сергей Кондратенкэм зэIукIэгъу щыдыриIагъ.
2026-рэ илъэсым бэдзэогъум и 3-м народнэ депутатхэм я Совет изэIукIэ альтернативнэ шIыкIэм тетэу ар щыхадзыгъ. Депутатхэм янахьыбэмэ Сергей Кондратенкэм амакъэ фатыгъ. Ащ тетэу илъэси 5 палъэкIэ Джэджэ районым ипащэу ар хадзыгъ ыкIи иIофшIэн ыублагъ.
ЗэIукIэгъум илъэхъан Адыгеим и ЛIышъхьэ Сергей Кондратенкэм фэгушIуагъ, IэнэтIакIэм гъэхъагъэхэр щишIынхэу фэлъэIуагъ. КъумпIыл Мурат районым ихэхъоныгъэкIэ гугъапIэу щыIэхэм къатегущыIагъ. Нафэу зэрэщытымкIэ, республикэмкIэ мэкъу-мэщым анахь щыпэрытхэм ар ащыщ.НепэкIэ Джэджэ районэу нэбгырэ мин 31,7-м ехъу зыщыпсэурэм къоджэ псэупIитф хэхьэ: Джаджэр, Дондуковскэр, Сергиевскэр, Айрюмовскэр ыкIи Келермесскэр. ЖъокIупIэм гектар мин 59,1-м ехъу еубыты. 2025-рэ илъэсым фышъхьэ бжыхьэсэ лэжьыгъэшхо мыщ къыщахьыжьыгъ. РеспубликэмкIэ апэрэ чIыпIэр районым ыубытыгъагъ.
Чылапхъэхэм якъыхэхынкIэ гупчэу «Русид» зыфиIорэм районым IофшIэн гъэнэфагъэ щызэшIуехы чылэпхъэшIухэм якъыхэхынкIэ. Агробиотехнопаркэу «Кластер Вавилов» зыфиIорэм ирезидентхэм чылапхъэхэм якъыхэхынкIэ зэзэгъыныгъэхэр адишIыгъ.
Адыгеим и ЛIышъхьэ районым ыкIи республикэм ямэкъу-мэщ ихэхъоныгъэкIэ гугъапIэхэр зэрапхырэ проектхэм къатырэ амалхэр агъэфедэнхэу игъо афилъэгъугъ. Лэжьыгъэм иIухыжьыгъом чIыгулэжьхэм яшIуагъэ къызэрагъэкIон фаем АР-м и ЛIышъхьэ пэщакIэм ынаIэ тырыригъэдзагъ. Джащ фэдэу мэкъумэщ продукциер къэзыхьыжьхэрэми къэралыгъо IэпыIэгъур зэрящыкIагъэр, гущыIэм пае, фермер хъызмэтшIапIэхэм ыкIи гъэщым шхыныгъо зэфэшъхьафхэр хэзышIыкIыхэрэм.
«Джэджэ районым чIыгулэжьыным ылъэныкъокIэ гъэхъагъэу иIэхэм чыжьэу ыцIэ агъэIугъ. Мыщ IофшIэным гуетыныгъэ ин фызиIэ, зэрэреспубликэу иэкономикэрэ исоциальнэ щыIакIэрэ зиIахьышхо ахэзышIыхьэрэ цIыфхэр щэпсэух. Шъолъырым исоциальнэ-экономикэ хэхъоныгъэ фытегъэпсыхьэгъэ пшъэрылъхэм муниципальнэ образованием иадминистрацие къадыригъэштэным тэркIэ мэхьанэшхо иI. Урысыем и Президентэу Владимир Путиным зэкIэми къытфигъэуцурэ пшъэрылъыр —цIыфхэм ящыIакIэ зыкъегъэIэтыгъэныр анахь шъхьаIэу щыт», — къыIуагъ КъумпIыл Мурат.
НыбжьыкIэхэр яхэгъэгу фэшъыпкъэхэу пIугъэнхэм, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу ятыгъэным япхыгъэ Iофыгъохэм шъхьафэу атегущыIагъэх.Республикэм и ЛIышъхьэ инвестициехэр нахьыбэу районым къихьанхэмкIэ, социальнэ инфраструктурэр нахьышIу шIыгъэнымкIэ зэшIохыгъэн фэе Iофыгъохэр къыгъэнэфагъэх. Партиеу «Единэ Россием» инароднэ программэ гъэцэкIэгъэнымкIэ, муниципалитетыр къэралыгъо программэхэм ыкIи лъэпкъ проектхэм ахэлэжьэнымкIэ, экономикэм, мэкъу-мэщым, социальнэ лъэныкъом, культурэм ыкIи спортым япсэуалъэхэу агъэцэкIэжьхэрэр ыкIи ашIыхэрэр нахьыбэ зэрэхъущтхэм муниципалитетыр нахь чанэу ахэлэжьэнэу пшъэрылъ къафишIыгъ.
Муниципалитетым ипэщакIэу хадзыгъэм республикэм и ЛIышъхьэ гущыIэ фабэу къыфиIуагъэхэм апае зэрэфэразэр, пшъэрылъэу щытхэр зэшIуихынхэм зэрэфэхьазырыр къыIуагъ.Сергей Кондратенкэр Киевскэ хэкум ит селоу Лисовичи 1966-рэ илъэсым къыщыхъугъ. Кировоградскэ къэралыгъо кIэлэегъэджэ институтыр ыкIи Пшызэ къэралыгъо университетыр къыухыгъэх. Дзэм къулыкъур зыщехь нэужым хэгъэгу кIоцI IофхэмкIэ къулыкъухэм Iоф ащишIагъ, район администрацием мэкъу-мэщымкIэ иотдел пэщэныгъэ дызэрихьагъ, Джэджэ къоджэ псэупIэми иIэшъхьэтетыгъ. Мы илъэсым, бэдзэогъум Джэджэ районым иадминистрацие ипащэу хадзыгъ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.