Адыгэ Республикэм и ЛIышъхьэу КъумпIыл Мурат чIыдагъэм хэшIыкIыгъэхэмкIэ шъолъырым иIофхэм язытет фэгъэхьыгъэ зэIукIэ зэхищэгъагъ. Iофыгъом итегущыIэн хэлэжьагъэх министерствэхэм, хэбзэухъумэкIо къулыкъухэм, организациехэм ялIыкIохэу гъэстыныпхъэр аIэкIэгъэхьэгъэным фэгъэзагъэхэр.
Анахьэу къызщыуцугъэхэр республикэм истанциехэу бензиныр зыщырагъахъохэрэм зэпыу фэмыхъоу ар аIэкIэгъэхьэгъэнымкIэ Iофтхьэбзэ тедзэхэр зэшIохыгъэнхэр ары.Адыгеим и ЛIышъхьэ къызэрэхигъэщыгъэмкIэ, хэбзэ къулыкъухэм гъэстыныпхъэр аIэкIэзыгъахьэхэрэм ренэу гъусэныгъэ адыряI, федеральнэ къулыкъу гъэнэфагъэхэми а лъэныкъомкIэ Iофхэм язытет псынкIэу зыпкъ игъэуцожьыгъэным тегъэпсыхьагъэу зэпхыныгъэ азыфагу илъ. Гъэлъэшыгъэ шIыкIэм тетэу пшъэдэкIыжь зыхьырэ къулыкъу пстэуми Iоф ашIэ, зэпыу имыIэу гъэстыныпхъэр республикэм къыIэкIэхьанымкIэ ищыкIэгъэ унашъохэр аштэх.
КъумпIыл Мурат анахьэу анаIэ зытыраригъэдзагъэр гъэстыныпхъэ-щыфэ материалхэр аIэкIэгъэхьэгъэнхэр ары. IэпыIэгъу псынкIэм, мэшIогъэкIосэ, хэбзэухъумэкIо, коммунальнэ къулыкъухэм, хьалыгъу гъэжъапIэхэм, гъомылапхъэр къыдэзыгъэкIырэ предприятиехэм, нэмыкI организациехэм яавтомобильхэм пстэуми апэу гъэстыныпхъэр аIэкIэгъэхьэгъэн зэрэфаер ары. Нафэу зэрэщытымкIэ, цIыфхэм ящынэгъончъагъи ящыIакIи ахэм яIофшIэн епхыгъэу щыт. А къулыкъухэм игъо афилъэгъугъ дизельнэ гъэстыныпхъэмкIэ Iоф зышIэрэ автотранспортыр агъэфедэныр, цIыфхэм апае бензиныр нахь кIэугъоегъэным пае.
Адыгеим и ЛIышъхьэ къулыкъухэм япащэхэм пшъэрылъ афишIыгъ имыщыкIэгъэ дэдэу щытмэ, къулыкъу автомобильхэр амал зэриIэкIэ нахь макIэу агъэфедэнхэу, цIыфхэр зезыщэрэ транспортым иIофшIэн зэпыу фамышIынэу. Джащ фэдэу КъумпIыл Мурат цIыфхэм къяджагъ яунэе транспорт ащ фэдиз дэдэу имыщыкIагъэу зыщыхъурэм амыгъэфедэнэу. А Iофтхьабзэхэм яшIуагъэ къэкIощт гъэстыныпхъэр зыщырагъэхъорэ станциехэм чэзыушхохэр ащымыхъунхэмкIэ, а лъэныкъомкIэ Iофхэм язытет нахьышIу шIыгъэнымкIэ.
«ДжырэкIэ Iофхэм язытет зыфэдэ хъугъэм пIэлъэ гъэнэфагъэ иIэу щыт. Федеральнэ лъэныкъомкIи унэшъо гъэнэфагъэхэр аштэх. ЗэкIэми непэ акъылыгъэ хэлъэу тызекIон фае. ЫпэкIэ къызэрэхэдгъэщыгъагъэу, гъэстыныпхъэ игъэхъуапIэхэм адэжь щызэтырихьэрэ чэзыум къыкIегъэчыгъэнымкIэ, анахь пшъэрылъ инхэмкIэ, щыIэныгъэмкIэ ищыкIэгъэ дэдэу щытхэмкIэ транспортым анаIэ нахь тырагъэтынэу. ТызэгурыIоу, Iофхэм язытет зыфэдэ хъугъэм тыкъыпкъырыкIызэ, хэти къытефэрэр ыгъэцакIэмэ, Iофхэр зыпкъ идгъэуцожьынхэ зэрэтлъэкIыщтым сицыхьэ тель», — къыхигъэщыгъ КъумпIыл Мурат.
ЗэIукIэм икIэуххэм атегъэпсыхьагъэу къулыкъу гъэнэфагъэхэм пшъэрылъ афашIыгъ гъэстыныпхъэмкIэ Iофхэм язытет зыфэдэм ренэу лъыплъэнхэу, Iофтхьабзэу зэрахьэхэрэм игъом цIыфхэри ащагъэгъозэнхэу.
АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.