Ны-тыхэу сабыитIу е нахьыбэ зыпIухэрэм хэбзэIахьэу атыгъэм щыщ къырагъэгъэзэжьыным пае лъэIу тхылъхэр мэкъуогъум и 1-м къыщыублагъэу атынхэ алъэкIыщт. УФ-м и Социальнэ фондАР-мкIэ и ГъэIорышIапIэ ащ пэIуигъэхьанэу сомэ миллион 94-м ехъу ыгъэнэфагъ.
Мы ахъщэ IэпыIэгъум сабыитIу е нахьыбэ зиIэ ны-тыхэу блэкIыгъэ илъэсым физическэ лицэхэм апае хэбзэIахьхэр зытыгъэхэр къыхеубытэх. Шапхъэу пылъхэм ащыщых ахэр Урысыем игражданинынхэр ыкIи кIэлэпIупкIэмкIэ чIыфэ атемылъыныр.
Ахъщэ тыныр агъэнэфэным пае унагъом гъотэу иIэр къыдалъытэ. ГурытымкIэ лъытагъэмэ, ар цIыфыр зэрыпсэун ылъэкIыщт ахъщэ анахь макIэу блэкIыгъэ илъэсым шъолъырым щагъэнэфэгъагъэм фэдизрэ ныкъорэм шIокIынэу щытэп.
Ны-тыхэм ар агъэпсыным фэшI лъэIу тхылъыр 2026-рэ илъэсым ичъэпыогъу мазэ и 1-м шIомыкIэу атын фае. Ащ фэшI къэралыгъо фэIо-фашIэхэм япортал, Социальнэ Фондым АР-мкIэ и Къутамэ икъулыкъоу цIыфхэм Iоф адэзышIэрэм е МФЦ-м зафагъазэмэ хъущт. Тхылъым зэрэхэплъэщтхэм IофшIэгъу мэфи 10 пIалъэу пылъыр. Ахъщэ тыныр унагъом тефэу алъытэмэ, мэфи 5-м къыкIоцI счетым фырагъэхьащт.
«Шъолъыр Гъэ1орыш1ап1эм испециалистхэм лъэIу тхылъым нэмыкIэу ящыкIагъэхэр ежьхэм къаугъои, къулыкъоу ахэм афэгъэзагъэхэм зэпхыныгъэ адыряI, ау къыхэкIы унагъом ис зихэхъогъур очнэ шIыкIэу зэреджэрэр, стипендиеу ащ къыратырэр зыфэдизыр е дзэм къулыкъу зэрэщихьырэр къэзыушыхьатырэ тхылъхэр ны-тыхэм къырахьылIэнхэ фаеу», — къыIуагъ УФ-м и Социальнэ фонд АР-мкIэ и ГъэIорышIапIэ ипащэу МэщлIэкъо Хьамидэ.
Ащ фэдэ ищыкIагъэу щытмэ, мэфи 10 пIалъэр имыкIызэ Социальнэ Фондым АР-мкIэ и ГъэIорышIапIэ икъулыкъоу цIыфхэм Iоф адэзышIэрэм ахэр рахьылIэнхэ фае. Джащ фэдэу банкым иреквизитэу ахъщэр къызэрыхьащтыр тэрэзэу тхыгъэным ны-тыхэм анаIэ тетыныр шIокI зимыIэ Iоф.УпчIэ зиIэр цIыфхэм Iоф адэзышIэрэ ЗыкI къулыкъум ителефон теон ылъэкIыщт: 8(800) 100-00-01 (ыпкIэ хэлъэп) е Социальнэ фондым АР-мкIэ и ГъэIорышIапIэ ащ фэдэ икъулыкъу зыфигъазэмэ хъущт.
Социальнэ хъытыуми тижъугъотэщт: https://max.ru/idI050I8326_gos, https://vk.com/sfr.respublikaadigeya, https://ok.ru/group/7000000I89II68, https://t.me/osfrrespublikaadigeya.