Унагъохэр агъэшIуагъэх

Унагъом, шIулъэгъум ыкIи зэфэшъыпкъэныгъэм я Мафэ ехъулIэу Мыекъопэ къэлэ ЗАГС-м иIофышIэхэм илъэс пчъагъэхэм дахэу, зэгурыIожьхэу зэдэпсэурэ зэшъхьэгъусэхэм мэфэкI зэхахьэ афызэхащагъ. Ахэм афэдэ унэгъуиплIымэ къащыхъугъэ сабыйхэр, яIахьылхэр, яныбджэгъухэр ягъусэхэу Iофтхьабзэм къекIолIагъэх.

МэфэкI зэхахьэр зезыщагъэхэр Мые­къопэ ЗАГС-м иотдел ипащэу Къэзэнэ Сусан, отделым ипащэ игуадзэу Тхьайшъэо Зарем, отделым иIофышIэу Куних Сусан. АгъэшIонэу къырагъэблэгъэгъэ зэшъхьэгъусэхэм яунагъохэм ятарихъ, сабый пчъагъэу яIэм, ягъэхъагъэхэм, къадэхъугъэхэм зэхэщакIохэр къатегущыIагъэх. Зэшъхьэгъусэхэр пчэгум къы­рагъэблагъэщтыгъэх, илъэс пчъагъэу зызэдэпсэухэрэр зэрытхэгъэ шыхьат тхылъым щыкIэтхэжьыщтыгъэх, шIухьафтынхэр аратыщтыгъ. КIэлэцIыкIу къэшъо­кIо купхэм мэфэкIыр къагъэбаигъ.Торхов зэшъхьэгъусэхэр илъэс 60 хъугъэу зэдэпсэух, пхъуитIурэ пхъорэлъфитфырэ яI. Алексей Торховыр — IофшIэным иветеран, заводэу «Станконормалым» щылэ­жьагъ. Ишъхьэгъусэ пщэры­хьакIоу дзэ частым илъэс 15-рэ Iоф щишIагъ, «70 лет Вооруженных Сил» зыфиIорэ бгъэхалъхьэр къы­фагъэшъошагъ. Унэгъо зэгурыIожьым пстэумэ апэ фэгушIуагъэх.Ащ фэдэу Завалин зэшъхьэгъусэхэу Верэрэ Сергейрэ унагъо зызэдашIагъэр илъэс 50 хъугъэ. Сергей Урал лъэныкъо къикIыгъ, Урысыем идонор гъэшIуагъ, илъэс 44-рэ Iоф ышIагъ. Верэ Мыекъуа­пэ къыщыхъугъ, «УФ-м ихьакъулахь къулыкъу и Отличник» зыфиIорэ щытхъу­цIэр къыфагъэшъошагъ. Ащ фэдиз илъэ­сым унагъор, язэфыщытыкIэхэр зэраухъумэшъугъэхэм такIэупчIагъ.

— УзэгурыIоныр, лъытэныгъэ зэфэп­шIыныр зэкIэмэ анахь шъхьаI, — хегъэ­унэфыкIы Вера Завалинам.

— Уишъхьэ­гъусэ фэбгъэкIотэн фае, сыд фэдэ зэгурымыIоныгъэ уазыфагу къихьагъэми, узэдэгущыIэн фае.

— Хэта апэрэ лъэбэкъур зышIын фаер? — сеупчIы.

— ТIуми а лъэбэкъур зэфадзын фае, — еIо Верэ.

— Хъулъфыгъэр ары апэу зыкъэзыгъэзэн фаер, сыда пIомэ тэры мыхъунхэр нахьыбэу къызхафэрэр,

— къыхигъэхъожьыгъ Сергей.Зэшъхьэгъусэхэм зы пхъу зэдапIу­гъ, пхъорэлъфитIу яI.

— Ренэу тызэдеIэжьыгъ, джынэс ары шэпхъэ шъхьаIэу тиунагъо илъыр, — къыхегъэщы бзылъфыгъэм. — Си­шъхьэ­гъусэ ыIэ зэмыкIурэ щыIэп, зи ымышIэу бэрэ пфыщысыщтэп. IофшIэнри унагъори зэдэтфыгъэ. Тянэ-тятэхэри ныжъ- тыжъхэри къыддеIэщтыгъэх, ахэм афэ­дэу тэри типхъорэлъфхэм япIун тыхэлажьэ, тарэгушхо, шIу тэлъэгъух. Ти­пшъашъэ пхъурэ къорэ иIэх. Пшъэшъэ нахьыжъым илъэс 26-рэ ыныбжь, шъэ­ожъыем – илъэс 12. Унагъом имэхьэнэ шъхьаIэр къыткIэхъухьэрэ лIэужхэр къихъонхэр, щыIэныгъэр лъызыгъэкIотэщтхэр тауж къикIынхэр ары.

— Сыд фэда щыIэныгъэ шэпхъэ шъхьаIэха зэрыжъугъасэхэрэр?

— Нахьыжъхэм лъытэныгъэ афашIыныр, мыхъун къызхамыгъэфэныр, цIыфышIоу дунаим тетынхэр,

— хегъэунэфыкIы Сергей. – Адыгэ чIыгур шIу слъэгъугъэ, сяни Адыгеим къэсщэжьыгъ, илъэс 93-рэ къыгъэшIагъ. Мыекъуапэ тырэгушхо, тикъалэ гуIэтыпI, дахэ. Ныбджэгъоу къыт­факIохэрэм типсэукIэ агу рехьы.

— Шъхьэгъусэу къыхахыхэрэм афэшъыпкъэхэу, сыд хъугъэми, зэшIомыкIодхэу зэдэпсэунхэу ары, — къыхегъэ­хъо­жьы Верэ. – Узэфэшъыпкъэ хъумэ, уисабыймэ яхъяри зэдэплъэгъущт, зэдэпIэтыщт.Джащ фэдэу мэфэкIым щагъэшIуа­гъэх Бенделиани ыкIи Панков зэшъхьэгъусэхэр. ЗАГС-м иIофышIэхэм зэхахьэм къызэрэщаIуагъэмкIэ, унэгъо пытэм къыщыхъурэ сабыйхэр насыпышIох. Унэгъо зэкIужь дахэр къэралыгъом, лъэпкъым лъапсэ афэхъу.Тэу Замир.