Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэм» иящэнэрэ едзыгъоу «Шъолъыр ыкIи муниципальнэ гъэIорышIэныр. Адыгеим и ЛIыхъужъхэр» зыфиIорэр республикэм щылъэкIуатэ.
Ащ епхыгъэ еджэгъу уахътэр аухыгъ ыкIи джы проектым хэлэжьэрэ ветеранхэр къэралыгъо гъэIорышIэным икъулыкъухэм ащыIэхэу яIэпэIэсэныгъэ хагъахъо.
Шъугу къэдгъэкIыжьын, программэм иящэнэрэ едзыгъо къыдыхэлъытагъэу шъолъыр ыкIи муниципальнэ гъэIорышIэным имызакъоу, чIыпIэхэм яхэхъоныгъэ зэрэзэхэтыр, ныбжьыкIэ политикэр, къолъхьэ тын-Iыхыным пэшIуекIогъэным ишапхъэхэр, инвестиционнэ политикэр ветеранхэм адызэхафыщт. Джащ фэдэу тинепэрэ щыIакIэ цифрэ амалхэм къэралыгъо гъэIорышIакIохэм яIофшIакIэ зэрэзэблихъурэр, къызэрафигъэпсынкIэрэр арагъэшIагъ.
Мыекъопэ къэралыгъо технологическэ университетым муниципальнэ къулыкъушIэхэм яIэпэIэсэныгъэ хагъэхъонымкIэ ишъолъыр Гупчэ ипащэу Паф Фатимэ къызэриIуагъэмкIэ, програм-мэм хэфагъэхэм шIэныгъэ куухэр зэрэзэрагъэгъотыгъэм дакIоу, Iофтхьэбзэ зэфэшъхьафхэу, спорт зэнэкъокъухэу республикэм имызакъоу, нэмыкI шъолъырхэм ащызэхащэхэрэми чанэу ахэлажьэх, текIоныгъэхэр къащыдахых.
— Мы уахътэм егъэджэным иедзыгъуищ къызэтынэкIыгъ ыкIи ахэм азыфагу къыдэфэрэ стажировкитIур аухыгъ, джы ящэнэрэр лъэкIуатэ. ШышъхьэIу мазэм еджэным ияплIэнэрэ едзыгъо падзэжьыщт. Проектым хэлэжьэрэ ветеранхэм зэрифэшъуашэу егъэджэн программэр аIэ къырагъэхьагъ, Iофтхьэбзэ зэфэшъхьафэу къыдыхэлъытагъэхэми закъыщагъэлъагъо. ШIэныгъэу агъотыгъэхэр агъэфедэнхэ зэралъэкIырэр ащыщхэм къагъэшъыпкъэжьыгъ ыкIи программэм хэлэжьэрэ нэбгырэ заулэмэ къэралыгъо ыкIи чIыпIэ зыгъэIорышIэжьыным икъулыкъухэм IофшIэныр ащырагъэжьагъ, — хигъэунэфыкIыгъ Паф Фатимэ.
ТилIыхъужъхэм IэпэIэсэныгъэ ахэлъэу къэралыгъо ыкIи муниципальнэ хэбзэ къулыкъухэм, къэралыгъо компаниехэм Iоф ащашIэным иамалэу мыр щыт.
IЭШЪЫНЭ Сусан.