УФ-м и Социальнэ фонд АР-мкIэ и ГъэIорышIапIэ гъэпсэфыпIэ-IэзапIэхэм япутевкэ 350-м ехъу илъэсыр къызихьагъэм къыщыублагъэу ытыгъ.
Ар зэритыхэрэм ащыщых сэкъатныгъэ зиIэхэр, Хэгъэгу зэошхом хэлэжьагъэхэр, зэо-зэпэуцужьхэм яветеранхэр, Чернобыль къыщыхъугъэ тхьамыкIагъом иягъэ зэригъэкIыгъэхэр, нэмыкIхэр.Мыщ фэдэ тхылъ къаIызыхымэ зышIоигъом УФ-м и Социальнэ фонд АР-мкIэ и ГъэIорышIапIэ лъэIу тхылъымрэ гъэпсэфыпIэ-IэзапIэм ипсауныгъэ щызэтыригъэуцожьын зэрищыкIагъэр къэзыушыхьатэу медицинэм иучреждение къытыгъэмрэ IэкIигъэхьанхэ фае. Ахэр къэралыгъо фэIо-фашIэхэм япортал щитынхэ ылъэкIыщт, Социальнэ Фондым АР-мкIэ и Къутамэ икъулыкъоу цIыфхэм Iоф адэзышIэрэм е МФЦ-м зафигъазэми хъущт.
«Путевкэм игъусэу ыпкIэ хэмылъэу гъэпсэфыпIэ-IэзапIэм екIолIэн амали Социальнэ фондым АР-мкIэ и ГъэIорышIапIэ реты. ЧIыпIэу зыдэкIощтым елъытыгъэу гъогури транспортыри къыхехых. Сэкъатныгъэ зиIэ кIэлэцIыкIухэм е апэрэ купым хэхьэрэ сэкъатныгъэ зиIэхэм ягъусэхэми ыпкIэ хэмылъэу зэрэкIощтхэ тхылъхэр афагъэхьазырых», — къыIуагъ УФ-м и Социальнэ фонд АР-мкIэ и ГъэIорышIапIэ ипащэу МэщлIэкъо Хьамидэ.
ФэгъэкIотэнхэр зиIэ купхэм къахиубытэхэр гъэпсэфыпIэ-IэзапIэм мэфэ 18-рэ къэтынхэ алъэкIыщт, сэкъатныгъэ зиIэ кIэлэцIыкIухэм апае мэфэ 21-рэ, зитхыкуцI е шъхьэкуцI фыкъуагъэхэм, ахэм къыздахьыгъэ уз зиIэхэм апае мэфэ 24-м щыублагъэу 42-м нэсэу къыдэлъытагъ.УпчIэ зиIэр цIыфхэм Iоф адэзышIэрэ ЗыкI къулыкъум ителефон теон ылъэкIыщт: 8(800) 100-00-01 (ыпкIэ хэлъэп) е Социальнэ фондым АР-мкIэ и ГъэIорышIапIэ иащ фэдэ къулыкъу зыфигъазэмэ хъущт.
Социальнэ хъытыуми тижъугъотэщт: https://max.ru/idI050I8326_gos, https://vk.com/sfr.respublikaadigeya, https://ok.ru/group/7000000I89II68, https://t.me/osfrrespublikaadigeya.