Урысые Федерацием хэгъэгу кIоцI IофхэмкIэ иминистрэу, полицием игенералэу Владимир Колокольцевым унашъо ышIыгъ Къэралыгъо автоинспекцием иIофышIэхэу лIыгъэ зезыхьагъэхэм, цIыфхэр къэзыгъэнэжьыгъэхэм тынхэр афэгъэшъошэгъэнэу.
Ахэр Адыгэ Республикэмрэ Белгород хэкумрэ къащыхъугъэ тхьамыкIагъохэм ахэфагъэхэм IэпыIэгъу афэхъугъэх. МашIор къызыкIэнэгъэ унэхэм арысыгъэ цIыфхэмрэ псэушъхьэхэмрэ ахэм къагъэнэжьыгъэх.
ГущыIэм пае, АР-м хэгъэгу кIоцI IофхэмкIэ и Министерствэ и Къэралыгъо автоинспекцие иIофышIэхэу, полицием икапитанхэу Станислав Красновымрэ Дамэкъо Аслъанрэ ядежурствэ Мыекъуапэ щаухыгъэу, пчыхьэ хъугъэу ядэжь кIожьыхэзэ унэе унэ горэм Iугъошхо шъхьарытэу алъэгъугъ. Нахь благъэу къызекIуалIэхэм, сэкъатныгъэ зиIэ пшъашъэр зыIыгъыгъэ бзылъфыгъэу IэпыIэгъу къыкIэлъэIущтыгъэр къалъэгъугъ.
Унэм ибысымгуащэ гуIэзэ ахэм ариIуагъ джыри илъэси 5 зыныбжь шъэожъыерэ илъэс 15 зыныбжь пшъэшъэжъыерэ унэм къызэринагъэхэр. Iофым изытет полицейскэхэм псынкIэу къагурыIуагъ. МашIом бгъэгъэ гъэIагъэр зэлъиштэгъагъ, чIылъэ унэм ащ зыридзыным ищынагъо щыIагъ. Iугъом къыхэкIэу ахэм жьы къащэныр къяхьылъэкIыщтыгъ.
Станислав Красновыр экстреннэ къулыкъухэм афытеуи, сэкъатныгъэ зиIэ пшъашъэу илъэс 21-рэ зыныбжьыр янэ къыIихыгъ. Дамэкъо Аслъанрэ нымрэ унэм илъадэхи, кIэлэцIыкIоу щтагъэхэр ащ къыращыжьыгъэх.
Полицием иIофышIэхэу кIэлэцIыкIухэм зи къызэрямыхъулIагъэм гу лъызытагъэхэр псынкIэу машIом игъэкIосэжьын ыуж ихьагъэх. МэшIогъэкIосэ къулыкъухэр къэмысыхэзэ гъунэгъухэм ягъусэхэу ахэм машIор псынкIэу агъэкIосэжьын алъэкIыгъ.