Зэдегъэштэ есынымкIэ зэнэкъокъу къалэу Волгоград щыкIуагъ. Краснодар, Балаково, Волжскэ, Адыгеим яспортсменхэр ыкIи бысымхэр ащ хэлэжьагъэх.
Республикэ спорт еджапIэу В. С. Максимовым ыцIэ зыхьырэм зыщызыгъасэхэрэм хагъэунэфыкIырэ чIыпIэхэр къахьыгъэх. Пшъэшъэжъыехэу илъэсипшI зыныбжьыхэм азыфагу Бэгъ Аминэ апэрэ чIыпIэр къыщыдихыгъ. Мы куп дэдэм ящэнэрэ щыхъугъ Мария Нефедовар. Илъэс 13 — 15 зыныбжьыхэм Марьяна Ткаченкэр щылъэшыгъ.
Зэкъо зыкъэгъэлъэгъонми тиспортсменкэхэр къыхэщыгъэх. Зыныбжь илъэс 13-м нэмысыгъэхэмкIэ Аниса Каташевар апшъэ хъугъэ. НахьыжъхэмкIэ мыщ фэдэ гъэхъагъэ ышIыгъ Анна Додильнаям. Тыжьын медальхэр къахьыгъэх Мария Нефедовам ыкIи Марьяна Ткаченкэм.НэбгыритIу зэгъусэ зэнэкъокъухэмкIэ Анна Додильнаямра Марьяна Ткаченкэмрэ дышъэ медальхэр къахьыгъ. Мы лъэныкъо дэдэм, ау нахьыкIэхэмкIэ, Бэгъ Аминэрэ Мария Нефедовамрэ тыжьыныр къалэжьыгъ. Адыгеир къэзыгъэлъэгъогъэ спортсменкиблымэ джэрз медальхэр къахьыгъэх. Ахэр: Лъэустэн Бэлл, Каролина Крицкаяр, София Колесниченкэр, Къохъужъ Бэлл, Аниса Каташевар ыкIи НэтIэо Диан. Гъэхъэгъэшхохэр зышIыгъэ спортсменкэхэр зыгъэхьазырыгъэхэр Урысыем изаслуженнэ тренерэу Нина Говорковамрэ спортымкIэ мастерэу Иван Говорковымрэ.