Бжыхьэкъо Б.
Евгений Шварц и Унэ скрипкэм къезыгъаIоу, Урысые ыкIи дунэе зэнэкъокъухэм ялауреатэу Анисия Артемовам иконцерт щыкIуагъ. Бах, Брамс, Глазуновым, Паганини, Шнитке ящыIэныгъэ гъогу къаIотагъ ыкIи ямэкъамэхэр пчыхьэзэхахьэм щыIугъэх.
КъэIогъэн фае, Анисия Артемовар Москва щэпсэу, «Сириусым» имузыкальнэ еджапIэ чIэс. Мыекъуапэ ау сыдми къэкIуагъэп. Янэ мыщ щыщ.
— Гъэмафэ къэс Мыекъуапэ тыкъэкIо. Сянэ игупсэ чIыпIэхэр шIу елъэгъух, сэри ахэр сикIасэх. БлэкIыгъэ илъэсым апэрэ концертыр мыщ къыщыстыгъагъ. Къэлэдэсхэр дэгъоу къыспэгъокIыгъагъэх, арыти, ятIонэрэуи щызэхэтщагъ, — еIо пшъэшъэ ныбжьыкIэм.
Анахь гъэшIэгъоныр, Анисие ятэжъ ятэ концерт ежь къызщитыгъэ унэм зыцIэ ыхьырэ Евгений Шварц инэIосагъ. Василий Жуковыр драматургым нахьи илъэсиблыкIэ нахьыжъыгъ нахь мышIэми, зы купхэм ащызэIукIэщтыгъэх, зы нэIуасэхэр яIагъэх. Ар къэзыушыхьатырэ сурэтхэр Евгений Шварц иунэ дэпкъ пылъагъэх. ГущыIэм пае, Лэгъо-Нэкъэ бгытешъом зэпырыкIыхэу хы Iушъом кIохэу язырэр атырахыгъагъ.
— Тятэжъ пIашъэрэ Е. Шварцрэ зэрэзэнэIосагъэхэм фэгъэхьыгъэ къэбархэр сицIыкIугъом къыщегъэжьагъэу тиунэ къыщекIокIыщтыгъэх, ау теубытагъэу ар къызынэфагъэр мыгъ, драматургым и Унэ пылъэгъэ сурэтхэр зытэлъэгъухэр ары. Соловьевхэм яунагъо ихьатыркIэ ахэр зэнэIуасэ хъугъагъэх. Сурэтми ар къеушыхьаты. ЗэкIэри зы купэу зэдитых. Тыжъыр, Василий Жуковыр, Мыекъопэ къэлэ Думэм тхакIоу чIэсыгъ, театральнэ зэхахьэм исекретарыгъ, — къыIотагъ Анисие янэу Елена Артемовам.
Евгений Шварц и Унэ дэжькIэ ягъогупэ зыкъызкIигъэзагъэм ежьхэмкIэ тарихъ хъугъэ-шIагъэу щыт зэнэIосэныгъэр ылъапсэу янэрэ ыпхъурэ джы алъытэ. ТапэкIи зэдэлэжьэныгъэр лъагъэкIотэщт — Анисие концертхэр къыщитыхэзэ ышIыщт.
— Мыекъуапэ сэркIэ шъолъыр къэлэ къызэрыкIоп. Культурнэ кIэн, тарихъ бай иI, гъэшIэгъоны. Концертыр згъэхьазыр зэхъум къыхэсхыгъэхэр сизакъоу, скрипкэмкIэ, къезгъэIошъущтхэр ары. Ау «Мыекъуапэ нотэхэм арылъыгъэмэ, сыд фэдэщтыгъа?» аIоу къысэупчIыгъэхэмэ, сэркIэ ар лъэпкъ нэшанэхэр зыхэлъ мэкъэмэ зэфэшъхьафыщтыгъ: нахьыбэмкIэ лирическэу, ау загъори къэпсынкIэу, — еIо Анисие.
Бжыхьэкъо Бэл.