Мыекъуапэ физическэ культурэмкIэ ыкIи спортымкIэ и Комитет, «Движение Первых» ыкIи Мыекъопэ къэлэ гарнизоныр зэгъусэхэу къэралыгъом иухъумакIохэм я Спартакиадэ зэхащагъ.
Дзэ къулыкъушIэу ащ хэлэжьагъэхэм футболымкIэ, волейболымкIэ, теннис цIыкIумкIэ, дартсымкIэ заушэтыгъ. Зэнэкъокъум икIэухым нахь лъэшхэр къэнэфагъэх. КомандэмкIэ пэрытныгъэр ыубытыгъ артиллерийскэ бригадэм. Ащ хэтхэм щэрыоным зэрэфэIазэхэм имызакъоу, спортми хэшIыкIышхо зэрэфыряIэр къагъэлъэгъуагъ. Радиацие, химие ыкIи биологие ухъумэнымкIэ дзэ къулыкъушIэхэр ятIонэрэ хъугъэх. Къэралыгъо кIоцI къулыкъушIэхэр ящэнэрэ хъугъэх. Командэ пэпчъ къылэжьыгъэ шIухьафтынхэр аратыжьыгъэх. КъулыкъушIэхэм IэпэIэсэныгъэ дэгъу зэраIэкIэлъыр зэнэкъокъум изэхэщакIохэм къыхагъэщыгъ. Мыщ фэдэ Iофтхьабзэхэр лъагъэкIуатэхэ, хабзэ ашIыхэ зэрашIоигъори къаIуагъ.