Къэралыгъом ишъолъырхэм футбол шъофыкIэхэр ащашIыщтых.
Футболыр зикIасэхэм япчъагъэ хэхъоным фэIорышIэщт унашъо УФ-м и Правительствэ къыдигъэкIыгъ. 2027-рэ илъэсым къыщегъэжьагъэу илъэс къэс къэралыгъо бюджетым къикIэу сомэ миллиардрэ ныкъорэ футбол шъофхэм яшIын ыкIи жъы хъугъэхэм ягъэкIэжьын пэIуагъахьэзэ ашIыщт. Ахэр аужырэ шапхъэхэм адиштэу гъэпсыгъэщтых. Метри 100-м ехъу якIыхьэгъэщт, 70-м кIахэу яшъомбгъогъэщт. ДжэгупIэхэр ычIэгъкIэ къэфэбэнхэу ашIыщт. КIымэфэ мазэхэми ащ ущыджэгушъуным тегъэпсыхьагъэщтых. ЗэрагъэнафэрэмкIэ, шъолъыр пэпчъ чIыпIитIу-щы илъэсым ышIын амал иIэщт. Спорт еджапIэхэм защызыгъасэхэрэми, футболыр зикIасэхэми зэфэдэу джэгупIэхэр къызфагъэфедэшъущтых. СпортымкIэ УФ-м и Министерствэ къызэриIорэмкIэ, футболым хэщагъэхэми, ухьазырыныгъэу ахэм яIэм хагъэхъоным программэр фэIорышIэщт. АдыгеимкIи мы Iофым мэхьанэшхо иI. Сабыеу спортым хэщагъэхэм ахэхъощт. Къихьащт илъэсым мылъкур шъолъырхэм къалъагъэIэсэу рагъэжьэщт.