КикбоксингымкIэ Урысыем изэнэкъокъухэр Къэбэртэе-Бэлъкъар Республикэм щыкIуагъэх. Студентхэмрэ кIэлэеджакIохэмрэ ащ хэлэжьагъэх.
Республикэ спорт еджапIэу 2-м зыщызыгъасэхэрэм Адыгеир зэнэкъокъухэм къащагъэлъэгъуагъ. Гъогогъуи 10-рэ Урысыем ичемпионэу, дунаим ыкIи Европэм ямедальхэр къэзыхьыгъэ зэлъашIэрэ спортсменэу, джырэ уахътэм тренерэу Борсэ Астемир ныбжьыкIэхэр зыгъэхьазырыгъэр. Студентхэм азыфагу гъэхъагъэ щишIыгъ Агъыржьэнэкъо Айдэмыр. ТекIоныгъэ къызэрэдихыгъэм имызакъоу, спортымкIэ мастер хъуным икандидат шапхъэхэр ригъэкъугъ. Роман Димиденкэмрэ Айзатулин Амиррэ джэрз медальхэр къахьыгъ. ТиныбжьыкIэхэм ягъэхъагъэхэм уарыгушхонэу щыт. Спортсменхэм яухьазырыныгъэ уплъэкIугъэным, къэралыгъом ихэшыпыкIыгъэ командэ хэхьащтхэм якъыхэхын мы зэнэкъокъухэр фэIорышIагъэх.