ЦIыфхэм япсауныгъэ гъэпытэгъэныр

Адыгеим и ЛIышъхьэу КъумпIыл Мурат Мыекъопэ къэлэ клиническэ сымэджэщым хирургиемкIэ иунэу агъэпсырэр зыдэщыIэ чIыпIэм, джащ фэдэу М. Хь. Iэшъхьэмафэм ыцIэ зыхьырэ Адыгэ республикэ клиническэ онкодиспансерэу зэтырагъэпсыхьажьырэм ащыIагъ.

Республикэм и ЛIышъхьэ игъусагъэх АР-м иминистрэхэм я Кабинет и Тхьаматэ игуадзэу, АР-м финансхэмкIэ иминистрэу Виктор Орловыр, министрэхэм я Кабинет и Тхьаматэ игуадзэу Хъоткъо Хъызыр, псауныгъэм икъэухъу­мэнкIэ министрэу Мэрэтыкъо Рустем, Мыекъуапэ имэрэу Геннадий Митрофановыр, псэолъэшIынымкIэ Министерствэм, подряднэ организациехэм ялIыкIохэр.Мыекъопэ къэлэ сымэджэщым ихирургическэ унэ ишIын 2025-рэ илъэсым Iоныгъом рагъэжьэгъагъ. Подрядчикыр компаниеу «Гефест Констракшн» зыфиIорэр ары. Проектым сомэ миллиарди 3,1-м ехъу пэIухьащт. Ащ щыщэу къатищэу зэтетыщт унэм ишIын сомэ миллиард 1,8-рэ, Iэмэ-псымакIэхэм якъэщэфын — миллиард 1,3-рэ апэIуагъэхьащт.

ПсэолъакIэр зыдэщытыщтыр 1903 — 1904-рэ илъэсхэм агъэпсыгъэгъэ жъы хъугъэ псэолъитIур зытетхэ чIыпIэр ары. Унэм зэхэубытагъэу квадрат метрэ мин 15-м ехъу ыубытыщт, пIэкIори 150-рэ чIэфэщт. Адыгеим псауныгъэм икъэу­хъумэнкIэ иминистрэ къызэриIуагъэмкIэ, графикым тетэу мы лъэхъаным псэо­лъэшIын Iофхэр зэкIэ макIох. 2028-рэ илъэсым псэолъакIэр атIупщынэу агъэ­нэфагъ. Хирургиер зычIэтыщт унэр отделениищэу зэтеутыгъэщт: общэр, щынхэм зыщяIэзэщтхэр ыкIи гинекологиер. Джыри зы отделение реанимацием ыубытыщт.

«А пстэури фэIорышIэщт цIыфхэм ящыIакIэ нахьышIу шIыгъэным ыкIи медицинэ IэпыIэгъур игъом аIэкIэгъэхьэгъэным. Непэ анахь ищыкIагъэр IофшIэнхэр зэкIэ дэгъоу гъэцэкIэгъэнхэр ары: псэуалъэм ишIын, Iэмэ-псымэхэр чIэгъэуцогъэнхэр ыкIи медицинэ IофышIэхэм яIэпэIэсэныгъэ джыри нахь хэгъэхъогъэныр. Медицинэм иучреждениехэу джырэ лъэхъаным диштэхэрэр медицинэм иIофышIэхэми, сымаджэхэми яфедэ хэлъэу гъэлэжьэгъэнхэ фае», — къыIуагъ КъумпIыл Мурат.Псэуалъэм иухынкIэ Адыгеим и ЛIы­шъхьэ игъоу ылъэгъугъэ лъэныкъо зау­лэхэм анаIэ атыраригъэдзагъ. Подрядчикым илIыкIохэм къызэраIуагъэмкIэ, пIалъэу рахъухьагъэм нахьыжьэу псэуа­лъэр ухыгъэ хъуным пылъыщтых. Фе­деральнэ бюджет учреждениеу «Росстройконтролым» иIофышIэхэр псэолъэ­шIыным ичэзыу пэпчъ зэрэкIорэм лъэплъэх. Урамэу КубанскэмкIэ транспортыр зыщагъэуцущт чIыпIакIэхэр щагъэ­нэфэнхэу ащ пшъэрылъ афишIыгъ, джащ фэдэу къэлэ сымэджэщыр ыкIоцIкIи нахь зэтырагъэпсыхьанэу, къыпэIулъ чIыпIэми чъыгхэмрэ къэгъагъхэмрэ ащагъэтIысхьанхэу игъо афилъэгъугъ. Респуб­ликэм и ЛIышъхьэ сымэджэщым иврач шъхьаIэ пшъэрылъ фишIыгъ шэмбэт шIыхьафхэр зэхищэхэзэ ышIынэу, сыма­джэхэмрэ медицинэм иIофышIэхэмрэ япэсыгъэ Iэрыфэгъу амалхэри аригъэгъотынхэу.

«Псауныгъэм икъэухъумэн ылъэныкъокIэ пшъэрылъышхохэр зэшIотхынхэ фаеу къытпыщылъ. Урысыем и Президент, хэгъэгум и Правительствэ, партиеу «Еди­нэ Россием» яIэпыIэгъу ­хэлъэу итхъухьагъэхэр зэрэзэшIотхыщтхэм, медицинэ Iэпы­Iэгъоу цIыфхэм аратырэр лъэгэпIакIэм зэрэнэдгъэсыщтым ­сицыхьэ телъ», — къыIуагъ ­КъумпIыл Мурат.

Псэуалъэу ашIырэм IофшIэнхэр зэрэщыкIохэрэм нэIуасэ зызыфешI нэужым республикэм и ЛIышъхьэ Адыгэ рес­публикэ клиническэ онкодиспансерым щыIагъ. Урысыем и Президентэу Владимир Путиным пшъэрылъ къызэрафишIыгъэм тетэу федеральнэ проектэу «Псауныгъэм икъэухъумэнкIэ инфраструктурэм зегъэушъомбгъугъэныр» зы­фиIорэм тегъэпсыхьагъэу 2025-рэ илъэсым ыгузэгухэм адэжь IофшIэнхэр мыщ щырагъэжьэгъагъэх. Компаниеу «Марк-сервисым» зэтегъэпсыхьан Iоф­шIэнхэр зэшIуехых. Проектым сомэ миллион 830-м ехъу пэIухьащт. Ахъщэр анахьэу зыпэIухьащтыр унэ лъапсэм игъэпытэн, яплIэнэрэ къатым къытырашIыхьащтыр, зэкIэ коммуникациехэм язэблэхъун, унэ кIоцI ыкIи унэ кIыб дэпкъхэм япхыгъэ IофшIэнхэр ыкIэм нэгъэсыгъэнхэр ары. ПсэолъэшIын Iоф­шIэнхэр зауххэкIэ, IэзапIэм чIыпIэу ыубытырэр квадрат метрэ 600 фэдизкIэ нахьыбэ хъущт ыкIи пстэумкIи квадрат метрэ мини 5,1-м шIокIэу ыубытыщт. Стационар отделением пIэкIори 110-рэ чIэфэщт. 2026-рэ илъэсым тыгъэгъазэм IофшIэнхэр аухынхэу мэгугъэх.

РеанимациемкIэ ыкIи хирургиемкIэ отделениитIур, зэтегъэпсыхьажьын Iоф­шIэнхэр аухыфэхэ нэс, Кощхьэблэ гупчэ район сымэджэщым щыIэщтых. Гематологиемрэ химиотерапиемрэкIэ къутамэр Мыекъопэ къэлэ сымэджэщым, поликлиникэр пIэлъэ гъэнэфагъэкIэ къэлэ поликлиникэжъым щыIэщтых. Респуб­ликэм и ЛIышъхьэ къызэрэхигъэщы­гъэмкIэ, зэтегъэпсыхьан-гъэцэкIэжьын IофшIэнхэр зэрэкIохэрэм цIыфхэм Iэпы­Iэгъоу аратырэм язэрар екIынэу щытэп. ЫпэкIэ зэрэрахъухьэгъагъэу, сы­маджэ­хэм язещэн епхыгъэ Iофыгъохэр зэкIэ игъом ыкIи дэгъоу, ыпкIэ хэмы­лъэу зэ­шIуахынхэ фае.Адыгеим и ЛIышъхьэ къызэриIуа­гъэмкIэ, онкологие къулыкъум хэхъоныгъэу ышIырэр зыфэкIожьын фаер игъом, амал зэриIэкIэ нахьыжьэу, онкологие узыр къыхэгъэщыгъэныр ары, респуб­ликэм псауныгъэм икъэухъумэнкIэ Iоф­тхьабзэу щызэрахьэхэрэм анахьэу къа­щыдалъытэхэрэм ар ащыщ.«Анахь мэхьанэшхо зиIэ лъэныкъохэм ащыщ онкологие къулыкъум къызфигъэфедэщт Iэмэ-­псымэхэр игъом IэкIэгъэхьэгъэнхэр ыкIи унэм изытет шапхъэ­хэм адиштэныр. Ащ пае федеральнэ ыкIи шъолъыр бюджетхэм къахэкIырэ ахъщэшхо тэ­гъэфедэ. ИкIэухым дгъэцакIэрэр зэкIэ зыфэкIожьын фаер цIыф­хэм ящыIакIэ нахь зыкъегъэIэтыгъэныр, игъом ыкIи дэгъоу технологие пэрытыр зыщыгъэфедэгъэ медицинэ IэпыIэгъур ятыгъэныр ары», — къыIуагъ КъумпIыл Мурат.АР-м псауныгъэм икъэухъумэнкIэ и Министерствэ ипащэхэмрэ подряднэ организацием иIэшъхьэтетхэмрэ гущыIэгъу зафэхъум, республикэм и ЛIышъхьэ анаIэ тыраригъэдзагъ къатиблэу зэтетыщт унакIэм ишIын епхыгъэ инженер зэшIохыкIэхэм. А унакIэу ашIыщтыр диспансерыр зычIэтыгъэ унэу агъэ­кIэжьыгъэм къыготыщт. КъумпIыл Мурат пшъэрылъ афишIыгъ псэолъакIэм ишIын сымаджэхэм яIэзэнхэмкIэ пэрыохъу мыхъуным пае ищыкIэгъэ амалхэр зэкIэ зэрахьанхэу. Къэралыгъо программэхэмрэ лъэпкъ проектэу «ГъэшIэ кIыхьэр ыкIи чаныр» зыфиIорэм ипхырыщынрэ япхыгъэ нэмыкI пшъэрылъхэри ащ афишIыгъ.АР-м и ЛIышъхьэипресс-къулыкъукъытырэ къэбархэмкIэТхьаркъохъо Сафыет.