Iэшъынэ А.
АР-м и Сурэт къэгъэлъэгъуапIэ сурэтышI-дизайнер цIэрыIоу Саральп Мадинэ ихэушъхьафыкIыгъэ къэгъэлъэгъонэу «Сон у реки Белая» зыфиIорэр къыщызэIуахыгъ.
Мадинэ IэшIагъэу Адыгеим къытфищагъэхэм философскэ гупшысэхэр ахэгъэщагъэх. IэпэIасэм иIофшIагъэхэр хэдыкIыгъэхэмкIэ, тхыпхъэхэмкIэ гъэкIэрэкIагъэх. Лъэпкъ культурэм, тарихъым уасэ афишIызэ, джырэ лъэхъаным дыригъаштэзэ шъуашэхэр ыгъэпсыгъ. КъБР-м исурэтышI IэпэIасэу ХьацIыкIу Милэ «Тхыпхъэхэр» зыцIэ иIэшIагъэхэри къэгъэлъэгъоным къырахьылIагъэх.ЖанракIэм тетэу гъэпсыгъэ апэрэ къэгъэлъэгъонэу МадинэкIэ мыр щыт. АщкIэ зишIуагъэ къэкIуагъэр нысхъапхэм яшIынкIэ IэпэIасэу Дзыо Земфир. Ащ иIэшIагъэхэр къызфигъэфедэнхэу Мадинэ игъоу филъэгъугъ ыкIи амал ритыгъ.
Къэгъэлъэгъоным къекIолIагъэхэм Мадинэ иIофшIэгъэ хьалэмэтхэр ашIогъэшIэгъоныгъэх. IэшIагъэу къыгъэлъагъохэрэр къэпсаужьыгъэх, нэгум нафэу къыкIэуцуагъэх: нысхъапхэр, шъошэ-щыгъын зэфэшъхьафхэр, манекенхэр… Пкъыгъохэм гур агъэчэфэу гъэпсыгъэх. ЦIыфым джанэ фэбдынри нысхъапым шъошэ гъэнэфагъэ ептынри зэфэдэх. Дизайнер пэпчъ ежь зэрэшIоигъоу ахэр ефапэх. Аужыпкъэм, цIыфымрэ псэ зыпымыт нысхъапымрэ зэфэдэ зэхашIэхэр уагъэшIынхэ алъэкIыщт.ЗэхахьэрИскусствоведениемкIэ кандидатэу, Мыекъопэ къэралыгъо технологическэ университетым идоцентэу КIэдэкIое Нэфсэт Iофтхьабзэр къызэIуихыгъ.Культурнэ кIэным уасэ фэзышIырэ Саральп Мадинэ итворчествэ къытегущыIагъ. АР-м культурэмкIэ иминистрэ игуадзэу Кушъу Светланэ зэхахьэм къыщыгущыIагъ.
— АпэрэмкIэ, АР-м культурэмкIэ иминистрэ ыцIэкIэ Саральп Мадинэ Щытхъу тхылъ естыжьы сшIоигъу. IэпэIасэм ыдыгъэ шъуашэхэм якъэгъэлъэгъон ямышIыкIэу зэхищагъ. Лъэпкъ шъуашэм итарихъ, ар непэрэ щыIакIэм зэрэдиштэрэр иIэшIагъэхэм къащигъэлъэгъуагъ. Пэсэрэ лъэпкъ шъуашэм иIахьхэмрэ непэрэмрэ зэхигъащэхэзэ ыгъэхьазырыгъэ щыгъын купыр дахэу ыгъэпсыгъ. Нысхъапхэм ащилъэгъэ шъуашэхэр зэрэхьалэмэтхэр къекIолIагъэхэмкIэ шIухьафтынышхо тфэхъугъ, — къыIуагъ Кушъу Светланэ.— ЩыIэныгъэм итхыпхъэ лIэшIэгъухэм къапхырыкIыгъэ хабзэхэр, тхыдэхэр къыреIотыкIых. Тхыпхъэхэр адыгэ лъэпкъым икультурэ изы Iахьых. «Нанэ ипшысэхэр» лIэужыкIэм фэтIуатэхэзэ, тикультурэ бай ядгъэшIэщт, — къыIуагъ Адыгеим илъэпкъ сурэтышIэу, ювелирэу Еутых Асе.Дизайнер IэпэIасэм итворчествэ укIырыплъымэ, лъэпкъ шъуашэм къешIэкIыгъэ тхыпхъэр гопчын зэрэмылъэкIыщтыр джыри зэ нафэ къытфэхъугъ.Лъэпшъыкъо Фатим.