Лъэпшъыкъо Ф.
АР-м и Лъэпкъ музей къыщызэIуахыгъэ къэгъэлъэгъоным ижъырэ лъэхъанхэм лъэпкъым щыIэкIэ-псэукIэу иIагъэр къыреIотыкIы. Адыгэ лъэпкъ шэн-хабзэхэм якъэухъумэн ыкIи якъызэтегъэнэн Iофтхьабзэр афытегъэпсыхьагъ.
Лъэпкъ музеим ипащэу Джыгунэ Фатимэ Iофтхьабзэр къызэIуихыгъ.— ЛIэшIэгъу зэблэкIхэм ятарихъ, лъэпкъхэм, цIыфхэм ягушъхьэлэжьыгъэ музейхэр яухъумакIох. Къышъуфэдгъэхьазырыгъэ къэгъэлъэгъоныр ямышIыкIэу дгъэпсыгъэ. Ижъырэ тарихъым инэпэеплъхэр непэ Лъэпкъ музеим къыщытэгъэлъагъох. Адыгэхэм сыдигъуи тхьэлъэIум, хэгъашъохэм уасэ афашIыщтыгъ. Ахэм ащагъэфещтыгъэ пкъыгъохэм нэIуасэ шъуафэтшIыщт, — къыIуагъ Фатимэ.— Непэ къэгъэлъэгъонэу къызэIутхырэр тхьэлъэIу шъхьаIэу адыгэхэм яIагъэхэм япхыгъ. Хэгъашъохэр, тхьэлъэIухэр адыгэм ижъыкIэ ылэжьыгъэу, икультурэ, ихъишъэ хэхьагъэх. Ахэр хэтымынэжьынхэм фэшI лIэужыкIэм едгъэшIэнхэ фай, — къыIуагъ АР-м и Лъэпкъ музей этнографиемкIэ иотдел ипащэу, къэгъэлъэгъоным икIэщакIоу Цэй Сусаннэ.«ЖъокIокъихьажь» зыфаIорэ мэфэкIым щагъэфедэщтыгъэ къэбэкъым чIыпIэ хэхыгъэ къэгъэлъэгъоным щиубытыгъ. Музеим иIофышIэхэм ялъэIукIэ ар зэтыригъэуцожьыгъ IэпэIасэу Нэгъуцу Аслъан.— ИлъэсыкIэр зырагъажьэкIэ, цIыфхэр къуаджэм дэкIыхэти, шъофым лэжьыгъэ щагъэтIысхьэщтыгъ. Ар зы мафэп, мэфитIоп — мэзэ Iэпэ-цыпэм кIон ылъэкIыщтыгъ, зычIэсыщтхэри агъэхьазэрыти, чэщыри шъофым къэтыщтыгъэх. Iофэу ашIэщтыр къызаухыкIэ, мэфэкIышхо зэхащэщтыгъ, лэжьакIохэм къуаджэм къызагъэзэжькIэ, къоджэдэсхэр апэгъокIыщтыгъэх, шIухьафтынхэр аратыщтыгъ, джэгунхэр зэхащэщтыгъэх, къашъощтыгъэх, чэфыщтыгъэх. МэфэкIым щагъэфедэщтыгъэ къэбэкъым пыт пкъыгъор къыпыуутын, щабзэкIэ тебгъэфэн фэягъ, — къыIуагъ Нэгъуцу Аслъан.Мэфэпчъым емыпхыгъэ мэфэкIхэри адыгэхэм рагъэкIокIыщтыгъэх. ЦIыфым уIагъэ телъымэ, кIапщэ зэрэфашIыщтыгъэр ахэм ащыщ. Огъушхо зыхъукIэ, хьанцэгуащэр къызэрэращэкIыщтыгъэми къэгъэлъэгъоным нэIуасэ уфешIы.— Адыгэхэр ижъыкIэ къыщыублагъэу мэкъумэщышIэх, ахэм ялэжьыгъэ алэжьыным ящыIэныгъэ елъытыгъэу щытыгъ. Огъум лэжьыгъэр ымыгъэкIодыным фэшI тхьэлъэIу зэфэшъхьафхэр ашIыщтыгъ, — къыIуагъ АР-м и Лъэпкъ музей шIэныгъэмкIэ иIофышIэ шъхьаIэу Тэу Аслъан.Лъэпкъ музеир адыгэхэм атешIыкIыгъэ шъыпкъэу гъэпсыгъэу мэлажьэ, икъэгъэлъэгъонхэр хьалэмэтых. Адыгэхэм якультурэ, яшэн-хабзэхэм защызыгъэгъуазэ зышIоигъохэр музеим рагъэблагъэх. Гъэмафэм ыкIэ нэс къэгъэлъэгъоныр зэIухыгъэщт.