Тарихъым фэгъэхьыгъ

Кинокомпаниеу «Черкесия-фильм» IофшIэныкIэм дэлажьэ. Документальнэ фильмэу «Хатти» зыфиiорэм ипычыгъохэр IэкIыбым щытыра­хыгъ.

АР-м ыкIи КъБР-м культурэмкIэ язаслуженнэ IофышIэу, режиссерэу, УФ-м икинематографистхэм я Союз икъутамэу Адыгеим щыIэм ипащэу, кинокомпаниеу «Черкесия-фильм» игенеральнэ пащэу Нэгъэплъэ Аскэрбый ипроектыкIэ игъэ­кIотыгъэу дэлажьэ.Нэгъэплъэ Аскэрбый къызэриIотагъэм­кIэ, фильмыр зыфэгъэхьыгъэр Анатолием (джырэ Тыркуем) игупчэрэ икъыблэ къокIыпIэрэ ащыпсэущтыгъэ ижъырэ лъэпкъэу хьатхэр ары. Хьатхэр къызтекIыгъэхэм, ахэм бзэу аIулъыгъэм, нэмыкI хэгъэгухэм Шумерым, Вавилон пачъыхьагъум, Мысыр зэфыщытыкIэу адыриIагъэхэм ар къатегущыIэ.— ЦIыф лъэпкъым итарихъ хэмыкIокIэжьын лъэужышхо къыхэзыгъэнэгъэ хьатхэм афэгъэхьыгъэу научнэ шIэны­гъа­кIэхэр фильмым щыдгъэфедэнхэу итэхъухьэ. Ащ ипычыгъохэр къалэу Москва, КъБР-м ыкIи Тыркуем икъалэ­хэу Анкара, Стамбул, Чорум ащытетхы­гъэх, джы мы мафэхэм техынхэр Ады­геим щыредгъэкIокIыщтых. ШIэхэу фильмым изэхэгъэуцон тыфежьэщт. Къыхэзгъэщмэ сшIоигъу, тилъэпкъэгъоу Тыркуем исхэм яшIогъэшхо къытагъэ­кIыгъ. Стамбул щылэжьэрэ Адыгэ Хасэм хэт Къушъхьэ Догъэн, Анкара и Адыгэ Хасэ хэт Хьагъундэкъо Ешар, Чорум и Адыгэ Хасэ ипащэу Емыж Мэмэт съемочнэ купым къызэрэпэгъокIыгъэхэм фэшI «тхьашъуе­гъэпсэу» ясIо сшIоигъу, — къыIуагъ Нэгъэплъэ Аскэрбый.Нэгъэплъэ Аскэрбыйрэ операторэу Александр Никановымрэ лъэпкъ тари­хъым фэгъэхьыгъэ фильмым ипычыгъо зэфэшъхьафхэр Тыркуем щытырахыгъэх. Анатолийскэ цивилизацием имузееу Анкара, Археологическэ музееу Стамбул адэтхэм, Троя и Лъэпкъ парк фильмым исценарие елъытыгъэу щатырахыгъэх.— Адыгэ лъэпкъыр къэтыухъумэныр, ныбжьыкIэхэм къызыхэкIыгъэм уасэ фашIыным, якультурэ, яшэн-хабзэхэр, ятарихъ ашIэнхэм фэщэгъэнхэр къызхэщырэ IофшIэнхэр тиIэнхэ фаеу сэлъытэ, — хигъэунэфыкIыгъ кинорежиссерым.Адыгэ тарихъыр зэзыгъашIэ зышIоигъохэмкIэ, лъэпкъ зэхашIэ зиIэхэмкIэ фильмыр гъэшIэгъоныщт.