Лъэпшъыкъо Ф.
Лъэхъаным диштэрэ лъэпкъ еджапIэу «Тамэ» зыфиIорэм иапэрэ егъэджэгъу ыкIэм фэкIуагъ. Ащ къычIэкIырэ еджакIохэм язэхахьэ КъокIыпIэ музеим и Темыр-Кавказ къутамэ щыкIуагъ.
Бзылъфыгъэхэм я Союз къыдихыгъэ грантым ишIуагъэкIэ Къохъужъ Саидэ зипэщэ этноеджапIэу «Тамэ» зыцIэр илъэскIэ узэкIэIэбэжьмэ агъэпсыгъ. Адыгэ шэн-хабзэхэм якъызэтегъэнэн, бзэм изэгъэшIэн, лъэпкъым, лIакъохэм алъапсэхэм якъэухъумэн ыкIи ялъыгъэкIотэн епхыгъэу илъэсым къыкIоцI еджапIэм Iоф ышIагъ. ЕджэпIэ-гъэсапIэм кIэлэегъэджэ IэпэIасэу Адыгеим исхэр щылэжьагъэх. КIэлэцIыкIухэмрэ Iэтахъохэмрэ адыгэхэм якультурэ нахь куоу зыщызэрагъэшIэщт чIыпIэ хъуным анаIэ тырагъэтыгъ ыкIи а пшъэрылъыр зэрифэшъуашэу агъэцэкIагъ. Шэмбэт пэпчъ егъэджэнхэр рагъэкIокIыгъэх.— ШIэныгъэу тиеджапIэ къышъуитыгъэхэр жъугъэфедэхэзэ, бзэр шъумыгъэкIодэу, шъурыгущыIэу, шъурыгупшысэу, хабзэм шъутетэу шъущыIэнэу сышъуфэлъаIо! Ны-тыхэм шъуицыхьэ къыттелъэу шъукъызэрэддэлэжьагъэмкIэ тышъуфэраз, — къыIуагъ еджапIэм ипащэу Къохъужъ Саидэ.«Тамэм» лъэпкъ Iофышхо ыгъэцэкIагъ. Тилъэпкъ шэн-хэбзэ дахэу хэлъхэр ныбжьыкIэхэм алъыгъэIэсыгъэным ипшъэрылъ зэшIуихыгъ. «Тамэм» ытамэ зиубгъунэу, гъэшIэ огушхом бэрэ щыхьарзэнэу сыфэлъаIо, — къыIуагъ ГъукIэ Замудин.«Тамэм» икIэлэеджакIохэр Iофтхьабзэм чанэу хэлэжьагъэх. Адыгэ орэдхэр, къашъохэр, сэмэркъэу зыхэлъ къэшIыгъохэр къагъэлъэгъуагъэх, адыгабзэкIэ усэхэм къяджагъэх. Лъэпкъ шъуашэр зэкIэми ащыгъыгъ.— Бзэр ным къыдэкIо. Ау сабыир ицIыкIугъом къыщегъэжьагъэу икъоу бзэм рымыгущыIагъэ зыхъукIэ, зытеукIытыхьажьэу къежьэ. Тэ, кIэлэегъаджэхэм, апэрэ илъэсым тызфэгъэзэгъагъэр а пэрыохъур щыдгъэзыеныр ары, — къыIуагъ адыгабзэмкIэ кIэлэегъаджэу Къэлэшъэо Аидэ.— ЛIэужыкIэм пIуныгъэ тэрэз егъэгъотыгъэнымкIэ мы еджапIэм мэхьанэу иIэр непэ тинэрылъэгъу. Мыщ фэдэ проектхэм гъогу яттыным ыкIи IэпыIэгъу тафэхъуным тыфэхьазыр, — къыIуагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.— Адыгэ бзылъфыгъэм шэн-хэбзэ дахэу хэлъхэр тиныбжьыкIэхэм ягъэшIэгъэныр типшъэрылъ. Къохъужъ Саидэ фэдэхэу лъэпкъым зыгурэ зыпсэрэ фэузыхэрэм АР-м ибзылъфыгъэхэм я Союз IэпыIэгъу афэхъуным фэхьазыр, — къыIуагъ Вэрэкъо Хьалимэт.Пчыхьэзэхахьэр дахэу рекIокIыгъ, кIэухым Iофтхьабзэм хэлэжьагъэхэр адыгэ шхыныгъохэр зытет Iанэм рагъэблэгъагъэх.НэкIубгъор зыгъэхьазырыгъэр Лъэпшъыкъо Фатим.