ЭкоЦентр
ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ЭкоЦентрэм» ишъолъыр къутамэ Iофтхьабзэу «Моя экосумка» зыфиIорэр Мыекъопэ къэлэ паркым щызэхищагъ. ИскусствэхэмкIэ кIэлэцIыкIу еджапIэу N 6-м иеджакIохэр, ахэм янэ-ятэхэр сурэтшIыным хэлэжьагъэх.
Iалъмэкъ-шоперхэм къушъхьэ сыджхэр, псыхъохэр, мэз къэгъагъэхэр, псэушъхьэхэр, экологическэ тамыгъэхэр акрил краскэхэмкIэ атырашIыхьагъ. IэшIагъэ пэпчъ зэфэмыдэу, хьалэмэтэу агъэпсыгъ.Iофтхьабзэр мэкIофэ зэхэщакIохэм экологиер зыщыщыр, чIыопсыр ыкIи ащ икъэкIуапIэхэр къызэрэуухъумэнхэ, тыкъэзыуцухьэрэ дунаим цIыфым иIахьэу хэлъыр, ащ тизэрар емыкIыным фэшI шIэгъэн фаер кIэлэцIыкIухэм къафаIотагъ. Экологическэ шапхъэу щыIэхэм ныбжьыкIэхэр нэIуасэ афэхъугъэх, тыкъэзыуцухьэрэ дунаир хэмытэу цIыфыр щыIэн зэримылъэкIыщтыр къагурыIуагъ. ЧIыопсыр зэкIэми тызщыпсэурэ унэу зэрэщытыр Iофтхьабзэм щыхагъэунэфыкIыгъ. Анахьэу пластикым хэшIыкIыгъэ пкъыгъохэр амыгъэфедэнхэу къяджагъэх. Хъэдэным хэшIыкIыгъэ Iалъмэкъыр бэрэ пIыгъын зэрэплъэкIыщтым кIэлэцIыкIухэм гу лъарагъэтагъ.
Тыкъэзыуцухьэрэ дунаир лIэужыкIэм къыухъумэнымкIэ «ЭкоЦентрэм» IофшIэныбэ зэхещэ: сурэт шIыгъэхэмкIэ зэнэкъокъухэр, экологическэ Iофтхьабзэхэр, зэIукIэхэр ыкIи нэмыкIхэр.«Моя экосумка» зыфиIорэм къекIолIагъэхэм сурэт зытырашIыхьэгъэ Iалъмэкъхэр шIухьафтынэу аратыжьыгъэх ыкIи нэпэеплъ сурэт зытырарагъэхыгъ.