Тиреспубликэ къэбар гушIуагъо къылъыIэсыгъ! НыбжьыкIэ IофхэмкIэ Федеральнэ агентствэу «Росмолодежь» иурысые зэнэкъокъуитIумэ — «Шъолъырыр ныбжьыкIэхэм апай»,«ШIушIэным пылъ шъолъыр» зыфиIохэрэм Адыгеим текIоныгъэ къащыдихыгъ.
Урысыем и Президентэу Владимир Путиныр кIэщакIо зыфэхъугъэ лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм диштэу ахэр зэхащагъэх.Мы текIоныгъэм ишIуагъэкIэ ныбжьыкIэ политикэмрэ гуфакIохэмрэ апае сомэ миллион 84-рэ фэдиз хъурэ федеральнэ IэпыIэгъу тиреспубликэ къыIукIэщт! А мылъкумкIэ джырэ шапхъэхэм адиштэрэ ныбжьыкIэ гупчэхэрМыекъуапэ, Адыгэкъалэ, Красногвардейскэ районым ащагъэпсыщтых е ащагъэкIэжьыщтых. НыбжьыкIэхэм ягукъэкIхэр а гупчэхэм щапхыращынхэ, творчествэм щапылъынхэ, социальнэ проектхэр щагъэцэкIэнхэ, федэ пылъэу къафыдэфэрэ уахътэр щагъэкIон алъэкIыщт. Iофтхьэбзи 150-м ехъу пстэумкIи зэхащэнэу рахъухьэ, тиреспубликэ ис нэбгырабэмэ ахэм ахэлэжьэнэу загъэхьазыры.— Зэнэкъокъоу «ШIушIэным пылъ шъолъыр» зыфиIорэм тызэрэщытекIуагъэм ишIуагъэкIэ гуфакIохэм ядвижение нахь зедгъэушъомбгъущт. ШIушIэным пылъ гупчэхэр мылъкукIи, техникэкIи нахь зэтегъэпсыхьагъэ хъущтых, гуфакIохэм ягъэсэныгъэ зыкъызэрэрагъэIэтыщт программэхэр, патриотическэ, экологическэ, социальнэ проектхэр агъэцэкIэщтых. ТиIофшIэн осэшхо къызэрэритыгъэмкIэ ныбжьыкIэхэм яIофхэмкIэ Федеральнэ агентствэм лъэшэу сыфэраз. Хэбзэ къулыкъухэр, ныбжьыкIэ организациехэр, гуфакIохэр, ныбжьыкIэ политикэм Адыгеим зыщегъэушъомбгъугъэным зиIахь хэзышIыхьэгъэ пстэури аIэ зэкIэдзагъэу зэрэзэдэлэжьагъэхэм а текIоныгъэр къыкIэкIуагъ. Урысыем и Президент иунашъохэм атетэу ныбжьыкIэхэм язэчый зыкъызэIуегъэхыгъэнымкIэ, общественнэ щыIэныгъэм чанэу ахэр хэлэжьэнхэмкIэ, добровольчествэм пылъынхэмкIэ ищыкIэгъэ амалхэр хэгъэгум щызэрахьэх. ЗэрэтфэлъэкIэу тапэкIи Iоф зыдэтшIэщтыр республикэм ис ныбжьыкIэ пэпчъ амалэу иIэхэм зыкъызэIуягъэхыгъэныр, игукъэкIхэр пхырыщыгъэнхэр, иреспубликэ гупсэ инеущырэ мафэ нахьышIу хъуным фэгъэлэжьэгъэныр ары», — къыIуагъ КъумпIыл Мурат.