Бэдзэогъур зыфэдэщтыр

Гъэмафэм иятIонэрэ мазэу бэдзэогъур къихьагъ. Мы мазэм бзыфыр мэкъэгъагъэ. Ащ нэмыкIэу пчыкIэр зыхэт уаехэр къызэрэхафэхэрэм къыхэкIэу ижъыкIэ къыщегъэжьагъэу мы мазэм «грозовиккIэ» еджэх. Бэдзэогъум лэжьыгъэр Iуахыжьы.

ГидрометеорологиемкIэ ыкIи ты­къэзыуцухьэрэ дунаим иуплъэкIункIэ Гупчэм ипащэ иIэнатIэ зыгъэцэкIэрэ Виктория Гусевам тызэрэщигъэгъозагъэмкIэ, АдыгеимкIэ бэдзэогъур анахь мэзэ фабэу щыт. ГущыIэжъым къызэриIоу, «МашIор хэмытэу бэ­дзэогъу тыгъэм уегъэфабэ».— Бэдзэогъум жьы фабэр ыкIи гъушъэр Темыр Африкэм къикIыщт. ГурытымкIэ мазэм температурэу щы­Iэщтыр шапхъэхэм афэдизыщт. Ау ощхэу къещхыщтым ибагъэ шапхъэхэм ашIокIыщт, пчыкIэ зыхэт ощхыр къе­бэкIыщт, анахьэу апэрэ мэфипшIым. Темыр Африкэм къикIырэ жьы фабэм къыхэкIэу температурэр шапхъэм зышIокIыкIэ, машIор къэхъуным ищынагъо щыIэщт. Псыхъохэм адэт псыр шапхъэу щыIэхэм ашIокIыщтэп. Ау, лъэшэу къызещхырэм, ахэм адэт псыр къыдэкIоен ылъэкIыщт. Мэкъумэщ культурэхэм алъэныкъокIэ ом изытет гумэкIыгъо къыздихьыщтэп, — къы­Iуагъ В. Гусевам.Статистикэм къызэригъэлъагъо­рэмкIэ, АдыгеимкIэ гъэмафэм имэзэ шъхьаIэу бэдзэогъум сыхьати 8-м ехъурэ тыгъэр къепсы. Жьы фабэ къызилъыкIэ, температурэр хэпшIыкIэу дэкIуае. Гъэмафэм иятIонэрэ мазэ нахь фабэу къызщыхэкIыгъэр 2020-рэ илъэсыр ары, градус 39-рэ агъэунэфыгъагъ.Апэрэ мэфипшIыр. Чэщым градус 17 — 22-рэ щыIэщт. Мафэм фабэр градус 27 — 32-рэ, 36-м кIахьэуи хъущт.ЯтIонэрэ мэфипшIыр. Чэщым — градус 16 — 21-рэ, мафэм фабэр градус 28 — 33-м кIэхьащт.Ящэнэрэ мэфипшIыр. Чэщым фабэр градус 16 — 21-рэ, мафэм градус 27 — 36-м анэсыщт, 38-м кIахьэуи къыхэкIыщт.КIАРЭ Фатим.