ПшъэдэкIыжьэу зыфилъэгъужьыгъ

Сыд фэдэрэ лъэхъани, Урысыем лIыхъужъхэр иIагъэх, иIэх ыкIи иIэщтых. Хэгъэгу зэошхом, нэмыкI зэпэуцужьхэм, джы хэушъхьафыкIыгъэ дзэ операциеу рекIокIырэми ялIыхъужъхэм ягугъу пшIыныр къалэжьыгъ. Ары ипшъэрылъыр непэрэ мэфэкIми. Зэо зэфэшъхьафхэр зэпызычыгъэу, ищыкIагъэ зэхъум тикъэралыгъо ищынэгъончъагъэ къэу­хъумэгъэным ыпсэ емыблэжьэу апэрэу еуцолIагъэхэм ащыщэу Бжьэц Азэмат «Адыгэ макъэр» IукIагъ.

ТигущыIэгъу Кощхьэблэ районым ит къуаджэу Еджэр­къуае къыщыхъугъ, ау джыдэдэм Мыекъопэ районым ипоселкэу Меркулаевкэм щэпсэу. Гурыт еджапIэр 1992-рэ илъэсым къызеухым, Адыгеим и ДОСААФ водитель курсхэр къыщиухыгъэх, хьылъэзещэ автомобилыр зэрифэнэу ыкIи дзэ гъэстыныпхъэ-дэгъэ заправщикэу еджагъ. Нэужым ыныбжьыкIэ къыте­фэрэ дзэ къулыкъум ащагъ.— Апэ Ярославскэ хэ­кум связист, телефонист-­шифровальщикэу сыщырагъэджагъ. Мэзищ зытешIэм, Астраханскэ хэкум ит къа­лэу Капустин Яр сагъэкIуагъ, егъэджэн подразделениеу ащ дэтым ядернэ ракетэхэр зезыщэрэ хэушъхьафыкIыгъэ автомобилэу «МАЗ-500» зесфэным сыщыфеджагъ. Къэнэгъэ пIалъэр Московскэ хэкум ит къалэу Одинцово стратегическэ мэхьанэ зиIэ ракетнэ дзэхэм (РВСН) щысхьыжьыгъ, — игукъэкIыжьхэмкIэ къыддэгуащэ Бжьэц Азэмат.Дзэм ыуж республикэ ОМОН-м илъэс 20 фэдизрэ къулыкъур щихьыгъ. А ухътэм къыкIоцI хэушъхьафыкIыгъэ дзэ пшъэрылъхэр гъэцэкIэгъэнхэмкIэ, къэралыгъо учреждениехэр, блокпостхэр къэухъумэ­гъэн­хэмкIэ командировкэ­хэм ащыIагъ. Темыр Осетием ипсэупIэу Мэздэгу, Дагъыстан, Ингушетием ащыкIогъэ зэпэуцужьхэм ахэлэжьагъ. Щэгъогогъо Чэчэн Республикэм щы­Iагъ.Щытхъу хэлъэу ипшъэ­рылъхэр зэригъэцэкIагъэ­хэм фэшI къэралыгъо тын лъапIэу бгъэхалъхьэу «За отличие в охране общественного порядка» зыфи­Iорэр къыфагъэшъошагъ.ЩыIэныгъэр лъэкIуатэ, дунаим техъухьэрэр ма­кIэп. 2022-рэ илъэсым мэзаем и 24-м хэушъхьафыкIыгъэ дзэ операциер рагъэжьагъ. А лъэхъаным тикъэралыгъо IэпыIэгъу ищыкIагъэу Азэмат зызэ­хехым, бэрэ емыгупшысэу зэрэкIощтым тыриубытагъ.— ЫпшъэкIэ къызэрэщысIуагъэу, сыныбжьыкIэ къыстефэрэ дзэ къулыкъум ащыIагъ, Чэчэн, Дагъыстан, Ингушетием ащыкIо­гъэ зэпэуцужьхэм сахэлэ­жьагъ. Ащ къыхэкIэу Iэпэ­Iэсэныгъэ икъу сIэкIэ­лъыгъ. Мы уахътэм, къэралыгъом сырищыкIагъэ зэхъум, ащ сыгоуцоныр сипшъэрылъэу слъытагъэ. СшIыгъэ лъэ­бэ­къум сырэгушхо, сырыкIэгъожьырэп. Хэгъэгур сэркIэ сян, сят, сисабый­хэр, сишъхьэгъус… Ахэр рэхьатэу, мамырэу псэунхэм фэшI сымышIэн щыIэп, — хегъэунэфыкIы Бжьэц Азэмат.Ветераным къызэрэти­IуагъэмкIэ, гуфэкIо купэу «Ахмат» зыфиIорэм зэзэгъыныгъэ дыкIатхи, 2022-рэ илъэсым бэдзэогъум хэушъхьафыкIыгъэ дзэ опе­рацием кIуагъэ.— А лъэхъаным зэпэуцужь лъэшхэр Запорожскэ лъэныкъом щыкIощтыгъэх. Нэбгырэ 80 хъущтыгъэ типодразделение, сэ нэбгырипшI зыхэхьэщтыгъэ отделением сырикоманди­рэу, селоу Нестерянкэм тызэпыращыгъагъ. Чэщым капитаным унашъо къытфишIыгъ пытапIэр тыубытынышъ, псэупIэр пыим етымыгъэубытынэу. ЦIыф зэрымыс быбырэ пкъы­гъохэр къытшъхьэрыбыбэщтыгъэх, лагъымэхэр къыт­хадзэщтыгъэх. Апэрэ уахътэм тIэкIу тыкъызэкIафагъэми, нэужым танковэ ыкIи артиллерийскэ дзэхэр IэпыIэгъоу къытфакIохи, ыпэкIэ тылъыкIотэн тлъэ­кIыгъ, дзэ техникэр, гъэр заулэ, зы танк къызIэкIэдгъэхьагъ. ДзэкIолI зэкъош­хэм пытэу тызэхэтыгъ, IэпыIэгъу тызэрэзэфэхъу­жьыщтыгъэм бэрэ тищыIэныгъэ къызэтырагъэнагъ, — ыгу къэкIыжьы ветераным.Бжьэц Азэмат идзэ пшъэрылъхэр зэрифэшъуа­шэу зэригъэцэкIагъэхэм фэшI бгъэхалъхьэу Суворовым ыцIэ зыхьырэр къыфагъэшъошагъ.Ветераным къэралыгъо фондэу «Хэгъэгум иухъумакIохэр» зыфиIорэм ишъо­лъыр къутамэ зэ­пхыныгъэ дыриIэу мамыр щы­IакIэм зэрэхэгъозэжьыщтым пылъ.Мыекъопэ районым исо­циальнэ гъэIорышIакIоу ЦуукI Заур иIэпыIэгъоу Бжьэц Азэмат иунэе Iоф къызэIуихын ылъэкIыгъ. ХэушъхьафыкIыгъэ дзэ опе­рацием хэлэжьагъэхэм апае щыIэ социальнэ зэзэ­гъыныгъэр фагъэпси, сомэ мин 350-рэ ветераным къыратыгъ.— Къэралыгъо фондым лъэшэу ишIуагъэ къысегъэ­кIы. Сиунэе Iоф къызэ­Iусхын амал сиIэ зэрэхъу­гъэм дакIоу, сипсауныгъэ гъэпытэгъэным фэшI Омскэ дэт зыгъэпсэфыпIэм сагъакIо, патриотическэ, зекIо, зыгъэпсэфын Iоф­тхьа­бзэу зэхащэхэрэм са­хэлажьэ. Джащ фэдэу сишъхьэгъусэрэ сэрырэ кIэ­лэцIыкIуитф зэдэтэпIу, ахэм анахьыкIэхэм ате­фэрэ фэгъэкIотэнхэр ха­бзэм арегъэгъоты, — къы­хигъэщыгъ ветераным.Зэпэуцужь пстэуми ахэ­лэжьагъэхэм ямэфэкIкIэ Азэмат афэгушIо, ягъэхъа­гъэхэр ныбжьыкIэхэмкIэ щысэтехыпIэу, псауныгъэ­рэ мамыр щыIакIэрэ яIэу бэрэ псэунхэу афэлъаIо.IЭШЪЫНЭ Сусан.