Урысые Iофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм ишъолъыр едзыгъо къыдыхэлъытэгъэ зэнэкъокъум Мыекъуапэ ихэшыпыкIыгъэ командэ текIоныгъэ къыщыфагъэшъошагъ.
Зэнэкъокъум Адыгеим имуниципалитетхэм якомандих хэлэжьагъ: къалэу Мыекъуапэ, Джэджэ, Красногвардейскэ, Мыекъопэ, Тэхъутэмыкъое ыкIи Теуцожь районхэр. КIэлэ 28-мэ ыкIи пшъэшъэ 24-мэ заушэтыгъ. Командэ пэпчъ нэбгырий хэтыгъ.НыбжьыкIэхэр лъэныкъуихкIэ зэнэкъокъугъэх, ахэм язэфэхьысыжьхэм ялъытыгъэу баллхэр къахьыгъэх.Унэе зэнэкъокъухэм къадыхэлъытагъэу илъэс 12 — 13 зыныбжь кIалэхэм якуп пэрытныгъэр щиубытыгъ Теуцожь районым щыщ СтIашъу Ислъам, ащ балл 421-рэ ригъэкъугъ. Мыекъуапэ къэзыгъэлъэгъогъэ Глеб Халаимовым тыжьын медаль фагъэшъошагъ, республикэм икъэлэ шъхьаIэ илIыкIоу Тимур Сосновскэр ящэнэрэ хъугъэ. ПшъашъэхэмкIэ текIоныгъэр къыдэзыхыгъэр Мыекъуапэ щыпсэурэ София Оно, ащ балл 394-рэ къыхьыгъ. Республикэм икъэлэ шъхьаIэ илIыкIоу Валерия Тищенкэм ятIонэрэ чIыпIэр къыдихыгъ, Мыекъопэ районым щыщ Диана Шушпановам джэрз медаль къылэжьыгъ.
Илъэс 14 — 15 зыныбжьхэм якуп анахь щылъэшыгъ Мыекъопэ районыр къэзыгъэлъэгъогъэ Даниил Труновыр, ащ балл 379-рэ ригъэкъугъ. Даниил Сосновскэмрэ Денис Голиковымрэ (тIури Мыекъуапэ) хагъэунэфыкIырэ чIыпIэхэр къахьыгъэх. ПшъашъэхэмкIэ текIоныгъэр къыдэзыхыгъэр очко 403-рэ къэзыхьыгъэ Джэджэ районым щыщ Мария Лысенкэр ары. Красногвардейскэ районым илIыкIоу Полина Мотинар ятIонэр, София Ершовам (Мыекъуапэ) джэрз медаль фагъэшъошагъ.Командэхэм язэнэкъокъу ятIонэрэ илъэс хъугъэу Мыекъуапэ текIоныгъэр къыщыдехы. Мыщ илIыкIохэм зэкIэмкIи очко 2811-рэ рагъэкъугъ. Джэджэ ыкIи Мыекъопэ районхэм хагъэунэфыкIырэ чIыпIэхэр афагъэшъошагъэх. Адрэ районхэр ахэм къакIэлъэкIох.