Шъолъыр фондыр
Къэралыгъо фондэу «Хэгъэгум иухъумакIохэм» ишъолъыр къутамэ проектэу «В кругу СВОих» зыфиIорэр пхырещы. ХэушъхьафыкIыгъэ дзэ операцием иветеранхэм ягушъхьэбаиныгъэ зыкъегъэIэтыгъэным, рэхьатныгъэ арагъэгъотыным, зэрафэгумэкIыхэрэр зэхарагъэшIэным ар фэIорышIэ.
Проектым къызэрэдыхэлъытагъэу, Мыекъопэ районым ит поселкэу Победэм дэт Свято-Михайловскэ Афонскэ хъулъфыгъэ чылысым хэушъхьафыкIыгъэ дзэ операцием хэлэжьагъэхэр бэмышIэу зекIо ащагъэх. Илъэсищ хъущт ащ фэдэ зыгъэпсэфыгъо дэкIыгъохэр ветеранхэм ыкIи ахэм яунагъохэм ягукIуачIэ хэгъэхъогъэнымкIэ, мамыр щыIакIэм хэгъэгъозэжьыгъэнхэмкIэ яшIуагъэ къызэрэкIорэр.Шъолъыр фондыр зылъыплъэрэ нэбгырэ 80 фэдиз тхьэлъэIупIэм щыIагъэх. ДэкIыгъом изэхэщэнкIэ IэпыIэгъу къафэхъугъэх АР-м ипащэхэр, хэушъхьафыкIыгъэ дзэ операцием иветеранхэм я Ассоциацие, чыристан чылысым иепархие.Iофтхьабзэм хэлэжьэгъабэхэм мыр зекIо къодыеу къащыхъугъэп, мафэ къэс зыхэт Iофыгъохэр зыщагъэгъупшэнхэ, гупшысэу зыдаIыгъхэм язакъоу ахэплъэжьынхэ, Тхьэм елъэIунхэ ыкIи къапэблэгъэ цIыфхэр зэрафэгумэкIыхэрэр зэхашIэн амал яIагъ.Зэблэгъэгъэхэ хъулъфыгъэ чылысым къыхиубытэрэ тхьэлъэIупIэ чIыпIэхэм зэкIэми ащыIагъэх. ЗекIозещэм ахэм тарихъэу апылъыр игъэкIотыгъэу къафиIотагъ. Анахь шъхьаIэу проектым къыдыхэлъытэгъагъэр динлэжьхэм аIукIэнхэр, зыгъэгумэкIырэ упчIэхэр афагъэзэнхэр, шэф остыгъэхэр агъэуцунхэр ары. Нэбгырэ пэпчъ игупсэхэм, къапэблагъэхэм, мы уахътэм хэушъхьафыкIыгъэ дзэ операцием хэлэжьэрэ дзэкIолIхэм ацIэкIэ Тхьэм елъэIугъэх.Чылысым къафигъэхьазырыгъэ щэджэгъуашхэр ветеранхэм ыкIи ахэм яунагъохэм зэдагощыгъ, фэбагъэ хэлъэу зэдэгущыIэгъу зэфэхъугъэх.ЗекIо дэкIыгъом хэлэжьагъэхэм ащыщхэм яеплъыкIэхэр къыраIотыкIыгъэх.— Iофтхьабзэм нафэ къытфишIыгъ — диныр пстэуми алъапс. ШIур угу илъэу упсэун фае, о пшъхьэкIэ къыомыкIущтыр нэмыкI цIыфхэм япшIэнэу щытэп. НепэкIэ мэхьанэ зиIэр цIыфхэм ахэлъ шIур ахэплъэгъоныр ары. Зигупсэ зышIокIодыгъэ унэгъуабэхэр къиныгъо хэтых. Арышъ, зэрямызакъор зэхашIэнымкIэ мыщ фэдэ зекIо дэкIыгъохэм мэхьанэ яI. IэпыIэгъу къыпфэхъущт цIыфхэр къызэрэбготхэр къыбгурэIо. Къыхэгъэщыгъэн фае бэхэм фондыр ятIонэрэ унэ зэрафэхъугъэр, — хигъэунэфыкIыгъ дзэ операцием иветеранэу Игорь Ткаченкэм.— Непэ сэркIэ диным мэхьанэшхо иI. ТхьэшIошъхъуныгъэу сиIэр ары сыхэзыщыжьыгъэу слъытэрэр. ДзэкIолI ныбджэгъухэм яIэпыIэгъурэ Тхьэм ынэшIурэ сыпсэ къэзыгъэнагъэр. Шъолъыр фондым ихьатыркIэ Свято-Михайловскэ хъулъфыгъэ чылысым мыгъэ ящэнэрэу сыкъэкIо. Ары къэс сыгу орэд къыIорэм фэд. Сигушъхьэбаиныгъэ мэпытэ, нахь рэхьат сэхъу, ыпэкIэ сылъыкIотэнымкIэ кIуачIэ зыхэсэгъотэжьы. ЗынаIэ къыттет цIыфхэр зэрэщыIэхэр къызгурэIо, ар зымыуасэ щыIэп!, — къыIуагъ ветеранэу Сергей Подковыриным.