ГупыкI иIагъ

Лъэхъаныр лъэкIуатэ, ащ цIэр къыхэнэ. ЦIэм лъэпкъыр егъэины, чылэ гупсэу къызхэкIыгъэри ащ рэгушхо, цIыф лъэпкъхэр дахэкIэ зэфещэх.

ЩыIэх цIыфхэр апэрэу узыIукIэкIэ иакъыл бгъэшIагъоу, игупшысэ куу узIэпищэу, лIыгъэу хэлъым урыгушхоу, шъхьэкъэбзэ-гукъабзэу, нэгуихыгъэу зэрэщытым уиумэхъэу, шIушIэ фэшъхьаф ыгу имылъэу ищыIэныгъэ зэрэкIорэр щысэтехыпIэу. Нэужым ар ныбджэгъу зыпфэхъукIэ, уищыIэныгъэ нахь къегъэбаи, уигупшысэхэр нахь куоу къыпфызэIуехых.Зигугъу къэсшIымэ сшIоигъор Хьэлъэкъуае щапIу­гъэу, гурыт еджапIэм ыуж Къэбэртэе-Бэлъкъар университетыр къэзыухи, ащ лъэпсэшхо щызыдзыгъэ ЛIыхэсэ Заур ары.ЗэхэшIэ куу зиIэу, илIыгъэкIэ, изекIуакIэкIэ зидауш чыжьэу Iугъэхэм ащыщ Заур. Ткъош Къэбэртэе шъо­лъырым ар бэдэдэрэ щыпсэугъ. Щылычыр зэрэпытэм фэдэу лъэуж пыти щыIэныгъэм щыпхырищыгъ, лъэпсэ пытэ чIышъхьашъом щидзыгъ. ЛIыхэсэ лъэкъуацIэри, Хьэлъэкъуае ыцIи дахэкIэ аригъэшIагъ.ЛIыхэсэ Заур шIукIэ игугъу ашIэу бэдэдэрэ зэхэсхыщтыгъ, ау тыныбжьхэри дэхэкIаеу зэрэзэтекIхэрэм къыхэкIэу тызэрэшIэу щытыгъэп. Гусэрыкъо Хъызыр къалэу Псыфэбэ цIыкIу (Железноводск) гъэпсэфакIо тыщыIэу нэIуасэ тыщызэфишIыгъагъ. Джа лъэхъаным мыщ зызыгъэпсэфэу щыIэгъэ адыгэ кIэлэ 15-м анахь шхэпIэ дэгъум тыщиугъойи, адыгэ шэн-зекIокIэ хьалэл­кIэ къытпэгъокIыгъагъ. Адыгэ унэгъо зэгъэфагъэ къызэ­рикIыгъэр ымыгъэгъуащэу, нэхъоишхо къыпыкIэу ЛIыхасэм дэгъоу тызэрищагъ. Джар тиныб­джэгъугъэ ублапIэ фэхъугъ. Тхьэмафэм зытIо-зыщэ тызэфытемыожьэу къыхэкIыщтыгъэп. Гусэрыкъо ХъызыркIэ къыригъажьэти, зынэмысрэ щымыIэу зэкIэми къа­кIэупчIэщтыгъ. Чылэм икъэбар, адыгэ шъолъырым зэхъокIыныгъэшхоу фэхъухэрэм ыгу къыдеIэу арыгу­шхощтыгъ.Заур игущыIэхэр бэрэ сыгу къелъадэх: «Сичылэ гупсэ сыкъакIо хъумэ Краснодар краим сыкъызэрэсэу жьэу къасщэрэр сфикъурэп, си псыхъо цIыкIоу Дышъэ сыкъэсыфэкIэ уахътэр бэдэдэу къысщэхъу».Къызщыхъугъэ чылэм Заур макIэп фишIагъэр. Хьэ­лъэкъуае имэфэкI мафэ хагъэунэфыкIы зэхъум, автобус ежь имылъкукIэ къафищэфыгъагъ. Гурыт еджапIэм игъэцэкIэн IофхэмкIэ мызэу, мытIоу къыдеIагъ. Адыгэ­къалэ исымэджэщ мин пчъагъэ зыосэ оборудование къыритыгъ. Еджэн ыкIи сымэджэ IофхэмкIэ чылэм щыщхэм ишIуагъэ ренэу аригъэкIыщтыгъ. Адыгэ чылэ дэкIыгъэу Къэбэртае нэсыгъэ пэпчъ пIоми хъунэу ыхьэкIагъ, ыгъэшIуагъ, ыгу ихыгъэу къыпэгъокIыгъ. ИшIушIэ ичылэдэсхэм зэхашIыкIыгъ, ар — Хьэлъэ­къуае ицIыф ГъэшIуагъ. Адыгэ Республикэм итынэу «Закон. Пшъэрылъ. Намыс» зыфиIорэр къыфагъэшъошагъ.Зыщыпсэущтыгъэ республикэм ащ ылъапсэ чыжьэу, куоу хэхьагъ. Заур «КамАЗхэр» зыщаугъоищтыгъэ заводышхо къызэIуихыгъагъ. Ащ фэшъхьафэуи завод иIагъ. IофшIапIэу къызэIуихыгъэм нэбгыришъэ пчъагъэ щылажьэщтыгъ. ЛэжьапкIэри игъом аIэкIигъахьэ­щтыгъ ыкIи ыпкIэ хэмылъэу IофышIэхэр ыгъашхэщтыгъэх. Ащ имызакъоу, унэгъо 40-м ежь иунэе ахъщэкIэ унэхэр аригъэгъотыгъ. Илъэс 20-рэ депутатэу, комитет зэфэшъхьафхэм ятхьаматэу лэжьагъэ. Чегемскэ районым Iофэу щишIагъэм осэшхо фашIыгъ. «Заслуженный работник пищевой промышленности КБР» зыфиIорэр къырапэсыгъ. Ащ нэмыкIэу, рэзэныгъэ тхылъ бэдэдэ тикъэралыгъошхо къифигъэшъошагъ.«ШIу пшIэн, дахэ пIон, лъэпкъым цIэ дахэкIэ укъы­хэнэн», — джары Заур гупшысэ-гулъытэу иIагъэр. ЦIыф пстэури изэфэдагъ. «Убаймэ, къеблагъ, утхьамыкIэ­- мэ — хъяркIэ» зыIощтыгъэхэм ащыщыгъэп.КузэкIэт тегъэпсыхьагъэм ищэрэхъ зэхэцIыцIэу, зэблэпхъумэ, ыпэрэм фэдэ хъужьырэп. Къинэу Заур пэкIэкIыгъэр макIэп. Ау тхьаусыхагъэп, зиуфагъэп, ышъхьэ къабзэу зэрихьагъ. Лъэпсэ пытэу, гупыкI иIэу игъэшIэ гъогу къыхьыгъ. Илъэс 83-м итэу идунай ыхъожьыгъ.Тыпфэраз, Заур. УищыIэныгъэ гъогу уухыгъ нахь мышIэми, псапэу пшIагъэмрэ уигъэхъагъэхэмрэ жъогъо нэфэу гъашIэм къыхэнэщтых.КъыпфэразэхэуГусэрыкъо Хъызыррэ Хъодэ Адамрэ.