Адыгеим ичIыпIэ зэфэшъхьафхэм къарыкIыгъэ кIэлэеджакIохэмрэ ахэм янэ–ятэхэмрэ Мыекъуапэ зыщаплъыхьагъ. Чыристан диныр зыщалэжьырэ чIыпIэхэм, тишъолъыр икультурэ кIэн зэфэшъхьафхэм ахэм нэIуасэ зафашIыгъ. Лъэпкъхэм языкIыныгъэ и Илъэс Iофтхьабзэр фэIорышIагъ.
— Мыекъуапэ игъэпсын цIыф лъэпкъ зэфэшъхьафыбэ хэлэжьагъ. Культурэу, тхьэшIошъхъуныгъэу яIэр зэмылIэужыгъуагъэми зэгурыIохэу, якъалэ, якъэралыгъо апашъхьэкIэ шъыпкъагъэ ахэлъэу сыдигъуи ахэр зэдэпсэугъэх. Урысыем итарихъышхо изы Iахь цIыкIу Мыекъуапэ еубыты, – къыIотагъ Урысые обществэу «ШIэныгъэм» икъутамэу Адыгеим щыIэм ипащэу Галина Измайловам.Мыекъуапэ ыкIи Адыгэ епархием ныбжьыкIэ IофхэмкIэ икъутамэ ипащэу, Свято-Никольскэ чылысым щылажьэу Адам Шухарт ары Мыекъуапэ зекIо купыр къыщезыщэкIыгъэр. Свято-Троицкэ чылысыр апэрэ уцупIагъ. Чыристан диным епхыгъэ нэмыкI чIыпIэхэри ащ къыкIэлъыкIуагъэх. Адыгеим итарихъ пштэмэ, нэмыкI шъолъырхэмкIэ сыдигъокIи щысэтехыпI. Лъэпкъ зэфэшъхьафхэм яшэн-хэбзэ зэхэтыкIыхэри хамынэу, ежь итхьэшIошъхъуныгъэ шъхьадж иIэми, зэдэIэпыIэжьыныр апшъэ агъэуцоу мамырныгъэрэ зэзэгъыныгъэрэ азыфагу илъэу сидыгъуи зэрэзэдэпсэугъэхэр къафиIотагъ Адам Шухарт.— Тарихъыр къэтIотэн къодыеп типшъэрылъыр. ТиныбжьыкIэхэм ащ акъыл хахынышъ, нэмыкI лъэпкъхэм якультурэ уасэ фашIызэ тапэкIи псэунхэм фэтщэнхэ фае, – къыхигъэщыгъ Адам Шухарт.Къэлэ гупчэу «Зэкъошныгъэм» купыр щыIагъ. Мыекъуапэ зэо лъэхъаным зыфэдагъэр, Хэгъэгу зэошхом и ЛIыхъужъхэу Андырхъое Хъусенрэ Дмитрий Зюзинымрэ, олимпиадэхэм ячемпионхэм, нэмыкIхэми якъэбархэр ныбжьыкIэхэм къафаIотагъ. Архиерейскэ хьакIэщыр Iофтхьабзэм икIэухыгъ. Ащи тарихъэу пылъым ныбжьыкIэхэр щагъэгъозагъэх, щахьэкIагъэх.