ГъэцэкIэжьынхэр щэкIох

Адыгеим и ЛIышъхьэу КъумпIыл Мурат псэупIэу Кужорскэм щы­Iагъ ыкIи ащ щыпсэухэрэм ялъэIу тхылъхэу зыкъызэрэфагъэзэгъа­гъэхэм атегъэпсыхьагъэу мыщ хэхъоныгъэ ышIынымкIэ пшъэ­рылъхэр гъэцэкIагъэ зэрэхъухэрэр ыуплъэкIугъ. Ахэм ащыщ куль­ту­рэм и Унэ иигъэкIотыгъэ гъэцэкIэ­жьын.

ЛIышъхьэм игъусагъэх АР-м иминист­рэхэм я Кабинет и Тхьаматэ игуадзэу, финансхэмкIэ министрэу Виктор Орловыр, культурэмкIэ министрэу Аулъэ Юрэ, Мыекъопэ районым ипащэу Михаил Марьиныр, подряднэ организациехэм яIэшъхьэтетхэр.Аулъэ Юрэ къызэриIуагъэмкIэ, ­лъэпкъ проектэу «Унагъом» тегъэпсыхьэгъэ федеральнэ проектэу «Унагъомрэ культурэм иинфраструктурэрэ» зыфиIорэм тетэу псэупIэу Кужорскэм культурэм и Унэу дэтым игъэцэкIэжьын макIо. Ащ сомэ миллиони 105-рэ фэдиз пэIухьащт. Ащ щыщэу миллион 70-р федеральнэ бюджетым къикIыщт. Илъэсэу икIыгъэм IофшIэнхэр аублагъэх, мы илъэсым ыкIэм нэс аухынхэу ары. Джэхашъохэр, электрорыкIуапIэхэр, псырыкIуапIэхэр, нэмыкIхэри зэблахъущтых. Унэр къызэрагъэфэбэщтыр, машIом зыкъыштэмэ макъэ къэзыгъэIущт пкъыгъохэр, видео­лъыплъэным иамалхэр хагъэуцощтых. ДэкIояпIэхэр, дэпкъхэр агъэкIэжьыщтых. Псэуалъэу игъэкIотыгъэ гъэцэкIэжьынхэр зэрашIылIэщтхэм хэтыщтых сценэр, джырэ ухътэм диштэрэ тхылъеджапIэр, музеир, спортзалыр.КъумпIыл Мурат псэуалъэр къызеплъыхьэм, щыкIэгъэ заулэмэ анаIэ аты­раригъэдзагъ, IофшIэнхэр игъом ыкIи дэгъоу агъэцэкIэнхэу пшъэрылъ афи­шIыгъ. Лъэпкъ проектым къыдилъытэрэ амалхэр зэкIэ нахь шIогъэ ин хэлъэу гъэфедагъэ хъунхэм пае Адыгеим и ЛIышъхьэ культурэмкIэ министрэм пшъэ­рылъ заулэ фишIыгъ. Шъугу къэтэгъэ­кIыжьы: 2017-рэ илъэсым къыщегъэжьагъэу 2026-рэ илъэсым нэс культурэм и Унэ 69-рэ республикэм щашIыгъ ыкIи щагъэцэкIэжьыгъ, ар республикэм культурэм и Унэу ит пчъагъэм (уни 129-рэ) ызыныкъом нахьыб.«Культурэм и Унэу Кужорскэм дэтыр 1973-рэ илъэсым ашIыгъагъ ыкIи бэшIагъэ гъэцэкIэжьын IофшIэнхэр рашIылIэнхэу зыщытыгъэр. Мызэу, мытIоу ащ фэдэ лъэIукIэ станицэм дэсхэм закъыфагъэзэгъагъ. Федеральнэ IэпыIэгъум ишIуагъэкIэ непэ а проектышхор зэшIотхын тэлъэкIы. Унэр зэрэпсаоу гъэкIэжьыгъэн, тарихъ теплъэу иIэр къэгъэнэжьыгъэн ыкIи зыфэгъэзэгъэ пшъэрылъри ыгъэцэкIэн фае. ПсэупIэм дэсхэм зыщагъэпсэфыным, творчествэмкIэ хэхъо­ныгъэ ашIыным, IэпэIэсэныгъэ зыхэлъ ныбжьыкIэхэм ясэнаущыгъэ нахь хэгъэ­хъогъэным а Унэр фэлэжьэн фае», — къыхигъэщыгъ КъумпIыл Мурат.Культурэм и Унэ къыпэIулъ чIыпIэм изэтегъэпсыхьанкIэ ыкIи къэбзэныгъэм ишапхъэхэр псэупIэм щагъэцэкIэнхэмкIэ пшъэрылъ гъэнэфагъэхэр ащ къафи­шIыгъ. АР-м и ЛIышъхьэ къызэрэхигъэщыгъэмкIэ, пшъэрылъ пстэуми ягъэцэкIэн мэхьанэшхо иI. Муниципалитетым ипащэхэм народнэ программэу «Единэ Россием» къахилъхьагъэм диштэу псэупIэм ихэхъо­ныгъэкIэ Iофтхьабзэхэр зэшIуахынхэу, социальнэ ыкIи коммунальнэ инфраст­руктурэр гъэкIэжьыгъэнымкIэ, медици­нэм, гъэсэныгъэм, культурэм ыкIи спор­тым алъэныкъокIэ ящыкIэгъэ Iофтхьабзэ­хэр нахь дэгъоу афагъэцакIэхэзэ ашIы­нэу КъумпIыл Мурат къафигъэпытагъ.«ЦIыфхэм къаIэтыгъэгъэ Iофыгъохэр зэкIэ икъоу гъэцэкIагъэ охъуфэхэ уплъэ­кIун IофшIэнхэр зэпыдгъэущтхэп. Владимир Путиным партиеу «Единэ Россием» изэфэс къызэрэщыхигъэщыгъэу, цIыфхэм ящыIакIэ нахьышIу шIыгъэным тапэкIи тынаIэ тедгъэтыщт. Культурэм и Унэу Кужорскэм щагъэцэкIэжьырэр псэупIэ пэпчъ адэсхэм ящыIакIэ на­хьышIу шIыгъэным пае хэбзэ къулы­къухэм Iофэу агъэцакIэрэм изы Iахьэу плъытэн плъэкIыщт. ТапэкIэ зэшIотхынэу пшъэрылъыбэ къытпыщылъ. Федеральнэ гупчэм иIэпыIэгъу хэлъэу ахэм язэшIо­хын лъыдгъэкIотэщт. ЧIыпIэхэм ащыпсэу­рэ цIыфхэм яеплъыкIэ, яшIоигъоныгъэхэр къыдэлъытэгъэнхэм мэхьанэшхо иI. Тызэгъусэмэ ары итхъухьагъэр шIуагъэ хэлъэу дгъэцэкIэн зытлъэкIыщтыр», — къыIуагъ КъумпIыл Мурат.