КъулыкъушIэныр ищыIэныгъ

Непэ, мэкъуогъум и 30-м, бзэджашIэхэм пшъэдэкIыжь ягъэхьыгъэнымкIэ Федеральнэ къулыкъум иухъумакIо икъулыкъушIэхэм я Мафэ хагъэунэфыкIы.

Илъэс 31-кIэ узэкIэIэбэжьмэ, урысые колониехэр ыкIи хьапсхэр къэзыгъэгъу­нэщтхэ къулыкъу зэхащагъ. 1994-рэ илъэсым къыщыублагъэу хэгъэгу кIоцI къулыкъум и Министерствэ хьапсым чIэсхэр къыгъэгъунэжьхэрэп, а IофшIэныр юстициемкIэ и Министерствэ и ГъэIорышIэпIэ шъхьаIэ ратыжьыгъагъ, нэужым бзэджашIэхэм пшъэдэкIыжь я­гъэхьыгъэнымкIэ федеральнэ къулы­къур фагъэзагъ. Мафэ къэс Урысыем ит хьапсхэм зэкIэми ухъумэкIо къулыкъушIэ мин фэдиз къэрэгъулэу аIохьэ.БзэджашIэхэм пшъэдэкIыжь ягъэхьыгъэнымкIэ Федеральнэ къулыкъум и ГъэIорышIапIэу АР-м щыIэм епхыгъэу Тэхъутэмыкъое районым дэт хьапс учреж­дениеу N 2-м икъэрэгъулэ отдел ипащэу, старшэ лейтенантэу БрантI Рустам ямэфэкI ипэгъокIэу гущыIэгъу тыфэхъугъ.«Урысыем иуголовнэ-гъэцэкIэкIо системэ икъэрэгъулэ отдел ипэщэ анахь дэгъу» зыфиIорэ Урысые зэнэкъокъум ишъолъыр едзыгъо Рустам текIоныгъэ къыщыдихыгъ. Джы бэдзэогъум Пермскэ краим щыкIощт кIэух зэнэкъокъум ащ Адыгеир къыщигъэлъэгъощт.БзэджашIэхэр зыщагъэпщынэхэрэ хьапсым «Къэрэгъул» «Iашэр» зыфиIорэ мэкъэгъэIур къыщызэхэнэ. Зыпарэми ышIэрэп гумэкIыгъоу къаIэтыгъэр шъып­къэмэ е егъэджэн Iофмэ, арышъ, къулыкъушIэхэм Iашэр аголъ ыкIи хэушъхьафыкIыгъэ щыгъынхэмкIэ фэпагъэх. Такъикъ заулэ блэкIыгъэу зэгуцафэхэрэ чIыпIэр къызаплъыхьэ нэуж къэрэгъулэ отделым ипащэ мэкъэгъэIур арегъэгъэ­кIосэжьы. КъызэрэчIэкIыгъэмкIэ, къо­лэжъым зигъэпсэфынэу гъучI хъагъэм зытетIысхьэм, мэкъэгъэIур къызэхэнагъ. Сыдэу щытми, къулыкъу­шIэхэм IэпэIэсэныгъэ ахэ­лъэу япшъэ­рылъхэр агъэцакIэх.Дивизием идзэкIолIИцIыкIугъом къыщыублагъэу Рустам спорт лъэпкъ­хэу каратэ, самбо ыкIи футболыр икIасэх. Непэ къызнэсыгъэм спортым пыщагъэ хъунымкIэ зишIуа­гъэ къекIыгъэ итренерхэр щыгъупшэхэрэп. КаратэмкIэ — Адыгеим изаслуженнэ тренерэу Владимир Васильченкэм, самбэмкIэ — Хьэпэе Арамбый, футболымкIэ Виталий Аксеновым агъэсагъэх. Гурыт еджапIэм джыри щеджэзэ республикэм ихэшыпыкIыгъэ командэ хэтэу Краснодар краим щыкIогъэ зэнэкъокъум тыжьын медалыр къыщихьыгъ.— Гурыт еджапIэм ыуж МКъТУ-м иполитехническэ колледж сычIэхьагъ. Ар къызысэухым дзэм сащи, Петрозаводскэ, Новгород, Санкт-Петербург къу­лыкъур ащысхьыгъ. Ф. Э. Дзержинскэм ыцIэ зыхьырэ хэу­шъхьафыкIыгъэ дивизием идзэ­кIолIэу къулыкъу зэрэсхьыгъэр синасып къыхьыгъ. Типшъэ­рылъ хахьэщтыгъ Москва ыкIи Московскэ хэкум общественнэ рэхьатныгъэр къащыухъумэгъэныр. Джащ фэдэу спорт ыкIи патриотическэ Iофтхьабзэхэр рэхьатэу рекIокIынхэм тылъыплъэщтыгъэ, — къыIуагъ Рус­там.Москва къулыкъур щихьызэ, Рустам ТекIоныгъэм и Парад изыфэгъэхьазырын ыкIи изэхэщэн хэлэжьагъ. Къулыкъур зыщихьыгъэ хэушъхьафыкIыгъэ дивизием икомандир дзэкIолIым щытхъу хэ­лъэу къулыкъур зэрихьыгъэм фэшI рэзэныгъэ тхылъ ятэ фигъэхьыгъ.КъулыкъушIэныр лъым хэлъКъулыкъу ужым Рустам къызегъэзэжьым, цIыф къызэрыкIоу щыIэныгъэм хэгъозэжьыныр къыфэкъиныгъ. Бэ темышIэу хьыкум приставхэм ахэхьанэу къеджагъэх.— Шъуашэр зызщысэлъэм, сыгупсэфыжьыгъ. КъулыкъушIэныр слъы хэлъ, — еIо Рустам.Хьыкум приставхэм я Федеральнэ къулыкъу и ГъэIорышIапIэ къулыкъур зыщихьыгъэ лъэхъаным спорт Iофтхьабзэхэу рагъэкIокIыгъэхэм мызэу, мытIоу ахэлэжьагъ, футболымкIэ республикэм икомандэ анахь дэгъоу «Динамо» ще­шIагъ ыкIи ГъэIорышIапIэм хагъэунэфыкIырэ чIыпIэхэр къыдихыным иIахьышхо хэлъ.2016-рэ илъэсым УФ-м зыкъэухъумэжьынымкIэ и Министерствэ идзэ къулыкъушIэу Iоф ышIэным фэшI зэзэгъыныгъэ адишIыгъ. Новочеркасскэ щыIэ артиллерийскэ частым илъэсищэ къулыкъур щихьыгъ.— Зэзэгъыныгъэм пылъ пIалъэр зекIым, бзэджашIэхэм пшъэдэ­кIыжь ягъэхьыгъэнымкIэ Федеральнэ къулыкъум и ГъэIорышIапIэу АР-м щыIэм сыIухьагъ. Водителым щезгъажьи, хьапс зытелъхэм пIуныгъэ IофшIэн адызехьэгъэнымкIэ отрядым сырипащэу, инспекторэу Iоф сшIагъэ. Нэужым къэгъэгъунэнымкIэ подразделением зызгъэзагъ. Илъэ­сищ хъугъэу отделением икомандирэу Iоф сэшIэ, — къы­Iуагъ Рустам.Дзэ отрядырКъэгъэгъунэн къулыкъур уголовнэ- гъэцэкIэкIо системэм иIофшIэн текIы. Хьапсыр пштэмэ, къэгъэгъунэн къулыкъум иIофышIэ закъохэр ары Iашэр агъэфедэнымкIэ фитыныгъэ зиIэхэр. КъулыкъушIэхэм ащкIэ пшъэдэкIыжьэу ахьырэр дэгъоу къагурэIо. ДзэкIолIхэм ягъусэу къэрэгъулэ отделым ипащи сменэм адытехьэ.Къэгъэгъунэн отделым икъулыкъушIэ хьапсым чIэсхэм аIукIэрэп. ИлъэсипшIым ехъурэ хьапсым Iоф щишIэн ылъэкIыщт зонэм ыкIоцI дэмыхьэу, ау зыплъыхьэпIэ лъагэм тетэу ахэм алъэплъэ.Iашэр агъэфедэн фит— Къэдгъэгъунэрэ учреждением мэкъэгъэIур къызыщызэханэкIэ, хьапсым чIэсхэм кIамытхъу­жьыным фэшI Iашэр, хэушъхьафыкIыгъэ къэорэ пкъыгъохэр дгъэфедэнхэ тыфит. Арэу щытми, сменэ къэс дзэкIолI пэпчъ игугъэ ины Iашэр ымыгъэфедэнэу. Сыда пIомэ, къэорэ Iашэр къызыпштэкIэ, къыбгурэIо пшъэдэкIыжьэу пхьырэр зыфэдэр, — еIо офицерым.БрантIэм иIофшIэгъухэм шъхьэкIэфэныгъэ къыфашIы. Ащ иIэпыIэгъухэу Гъыщ Рустам, часовойхэу Петр Купавцевым ыкIи Марина Лазаревам, кинологэу Цушъхьэ Асфар илъэсыбэ хъугъэу къулы­къур ахьы ыкIи дэгъоу къагурэIо IэпэIэ­сэныгъэшхо зыхэлъ къулыкъушIэу мыщ щылажьэхэрэм учреждением ищынэгъон­чъагъэ зэрялъытыгъэр.КъэIогъэн фае, мы мафэхэм бзэ­джашIэхэр зыщагъэпщынэхэрэ учреждениехэм хьэ гъэсагъэхэм къулыкъур ащахьы, ахэр къэгъэгъунэн къулыкъум иIофышIэхэм яIэпыIэгъушIух. БрантIэм игъусэу къэрэгъулэ къулыкъур ахьы овчаркэхэу «Сема» ыкIи «Лаура».ТекIоныгъэ къыдихыгъКъэгъэгъунэнымкIэ отделым икъулыкъушIэхэм яшIэныгъэхэм ахэгъэхъогъэнымкIэ бзэджашIэхэм пшъэдэкIыжь ягъэхьыгъэнымкIэ Федеральнэ къулыкъум хахьэу Воронежскэ институтым егъэджэнэу щызэхащагъэм старшэ лейтенантэу Р. БрантIэр анахь къулыкъушIэ дэгъоу къыщыхагъэщыгъ.— Дзэм сызэрэщыIагъэр къысшъхьэпагъ. Физическэ ухьазырыныгъэм ишапхъэхэр апэу зытыгъэхэм сащыщ. Спортым пыщагъэхэм ар къафэпсынкI. Институтым ипащэ ирэзэныгъэ тхылъэу «За отличие в учебе» зыфиIоу къысфигъэшъошагъэр бзэджашIэхэм пшъэдэкIыжь ягъэхьыгъэнымкIэ Федеральнэ къулыкъум и ГъэIорышIапIэу АР-м щыIэм къыгъэхьыгъ. Мыщ фэдэ уасэу къысфашIыгъэм сегъэгушхо ыкIи тапэкIи сигъэхъагъэхэм ахэзгъэхъоным сыкIегъэгушIу, — еIо Рустам.— Тикъэралыгъо ишъолъыр зэфэшъхьафхэм къарыкIыщт къулыкъушIэ анахь дэгъухэр Пермскэ краим щыкIощт зэнэкъокъум хэлэжьэщтых. Физическэ ухьазырыныгъэмкIэ, Iашэм игъэфедэнкIэ, шэпхъэ- правовой актхэм алъэныкъокIэ шIэныгъэу яIэхэмкIэ, щэрыонымкIэ зэнэкъокъущтых. Сишъып­къэу зысэгъэхьазыры, сэгугъэ дэгъоу зыкъэзгъэлъэ­гъонэу, — еIо къулыкъушIэм.Зэнэкъокъум изыфэгъэхьазырынкIэ ГъэIорышIапIэм ипащэ гугъэпIэшIухэр къэзытырэ офицерым дырегъаштэ ыкIи ицыхьэ телъ.— КъулыкъушIэм исэнэхьат хэшIыкI икъу фыриIэмэ иIоф­шIэнкIэ къэлъагъо. БрантIэ Рустам къулыкъум ыпсэ хэтIагъ. Дзэм къулыкъу зыщихьыгъэ лъэ­хъаным IэпэIэсэныгъэу IэкIэлъ хъугъэр иIофшIэн щегъэфедэ, ищыкIагъэ хъумэ, нахьыжъхэр упчIэжьэгъу ешIых. Чанэу зы­къызэригъэлъэгъуагъэм елъытыгъэу кIэух зэнэкъокъум Адыгеир къыщигъэлъэгъощт. ТекIоны­гъэр къыдихынэу Рустам тыфэлъаIо, — къыIуагъ ГъэIорышIапIэм ипащэ игуадзэу Юрий Садыковым.Футболыр ыкIи къашъорЗыгъэпсэфыгъо уахътэхэм Рустам спортым пылъ. Командэу «Фэдз» хэтэу футбол ешIэ. ЖъоныгъуакIэм ыкIэхэм футбол цIыкIумкIэ ГъэIорышIапIэм щызэхащэгъэ купэу «Динамэм» хэтэу текIоныгъэ къыдахыгъ.— Спортым нэмыкIэу адыгэ къа­шъохэр сикIасэх. Джэгухэм сакъыщышъо зыхъукIэ, сыгу хэхъо, ащ кIуачIэ къысхелъхьэ. Къулыкъум сыщыофицер, къэрэгъулэ отделым сырипащ, къэ­шъонымкIэ — сыадыг, адыгэгур къытео, — еIо ащ рыгушхозэ Рус­там.КIАРЭ Фатим.