СамбэмкIэ Азиемрэ Океаниемрэ ячемпионатрэ ныбжьыкIэхэм япервенствэрэ апэрэу Филиппины щыкIуагъэх. Къэралыгъо 21-мэ яспортсмен 427-мэ заушэтыгъ. Зэнэкъокъухэм язэфэхьысыжьхэмкIэ, лIыкIо куп 17-мэ медальхэр къахьыгъэх.
ТэркIэ турнирым мэхьанэшхо иIэу къэзышIыгъэр Иорданием къыщыхъугъэу, джы Адыгэ Республикэм щыпсэурэ ЛIыбзыу Заур ащ зэрэхэлэжьагъэр ары. Ар Мыекъопэ къэралыгъо технологическэ университетым истудент. Заур ныбжьыкIэхэм язэнэкъокъу зыщиушэтыгъ, килограмм 79-м нэс къэзыщэчыхэрэм якуп ящэнэрэ чIыпIэ къыщыдихыгъ. Иорданием илIыкIоу ар турнирым хэлэжьагъ.Заур Иорданием къыщыхъугъ, ау 2015-рэ илъэсым иунагъо игъусэу итарихъ чIыгоу Адыгеим къыгъэзэжьыгъ. А уахътэм къыщегъэжьагъэу олимпийскэ резервым испорт еджапIэу Кобл Якъубэ ыцIэ зыхьырэм зыщегъасэ. Итренерыр Бастэ Салим.