БлэкIыгъэ зыгъэпсэфыгъо мафэхэм республикэ ипподромым щыкIогъэ шыгъачъэм цIыфыбэ зэрищэлIагъ. КIэлэцIыкIухэм апае аттракционхэм Iоф ашIагъ, джащ фэдэу узщышхэн плъэкIыщт чIыпIэхэри зэIухыгъагъэх.
Шыгъачъэм хэлажьэхэрэм анахьэу къахэщыгъэр Пщыжъ СултIан. Ащ лъэныкъо зэфэшъхьафхэмкIэ текIоныгъищ къыдихыгъ. Метрэ 1600-рэ ыкIи 2400-рэ зэрылъ гъогууанэхэр СултIан ыгъэIорышIэгъэ Хьатыгъужъыкъуаемрэ Кардеямрэ анахь псынкIэу къызэранэкIыгъэх, текIоныгъэр къыдахыгъ. Ю Лайк Ми (зыгъэIорышIэщтыгъэр Щыгъущэ Айдэмыр) ятIонэрэ чIыпIэр къыдихыгъ, Барыняр (тесыгъэр Джубей Авидзба) ящэнэр. Мы къызэдэчъэным ишIухьафтын фонд сомэ мин 300 хъущтыгъ.Кубэщыч Хъалидэ ишIэжь фэгъэхьыгъэ шIухьафтыныр зэрылъ зэнэкъокъум илъэситIу зыныбжь шыхэр хэлэжьагъэх. Мыщ текIоныгъэр къыщыдихыгъ Кинг Мэджик Мафу. Псыхъоу Волгэ ишIухьафтын зыфагъэшъошагъэр Лада Чаки. Джащ фэдэу гъогууанэу къачъыгъэм елъытыгъэу апэрэ чIыпIэхэр къыдахыгъэх Практикал Бой, Эльдар Агро, Кирсобек. Мыхэм яшIухьафтын фонд сомэ мини 100 зырыз хъущтыгъ.