А. Гусев
Гурыт еджапIэхэр къэзыухыгъэхэм ябал тыгъуасэ Адыгеим щыкIуагъ. Мыекъуапэ ипчэгоу В. И. Лениным ыцIэ зыхьырэм Адыгеим ирайонхэм, икъалэхэм къарыкIыгъэ кIэлэеджэкIо 2000-м ехъоу еджапIэхэм къачIэкIыгъэхэр, ахэм янэ-ятэхэр, якIэлэегъаджэхэр, хьакIэхэр къыщызэрэугъоигъэх. АР-м и ЛIышъхьэу КъумпIыл Мурат ахэм къафэгушIонэу къэкIуагъ. Джащ фэдэу республикэм ихэбзэ къулыкъухэм ялIыкIохэр, муниципалитетхэм япащэхэр Iофтхьабзэм хэлэжьагъэх.
Республикэм имуниципалитетхэм якIэлэеджакIохэм гъэхъагъэу яIэхэм ягугъу къашIызэ, ныбжьыкIэхэр алырэгъу плъыжьым рыкIохи, мэфэкIыр къызэIуахыгъ. Гурыт еджапIэр къызэраухыгъэмкIэ, щыIэныгъэм ичэзыукIэ зэрэрагъажьэрэмкIэ ныбжьыкIэхэм афэгушIуагъэх. АР-м и ЛIышъхьэ мыщ фэдэ хъугъэ-шIэгъэшхомкIэ еджапIэхэр къэзыухыгъэхэм къафэгушIуагъ.
«ЕджапIэр къызаухыкIэ кIэлэцIыкIугъом игъо икIэу аIо. Ау непэ шъо, кIэракIэхэм, насыпышIохэм, сышъоплъызэ къасIо сшIоигъу чэзыукIэм ипэублэуи ар зэрэщытыр. Тэ тышъорэгушхо – еджэнымкIи, творчествэмкIи, спортымкIи шъуигъэхъагъэхэм осэшхо афэтэшIы», — къыIуагъ КъумпIыл Мурат.
Гурыт еджапIэхэр мыгъэ къэзыухыгъэ нэбгырабэмэ зыкI къэралыгъо ушэтынхэмкIэ баллышхохэр къахьыгъэх, нэбгырэ 13-мэ балли 100 рагъэкъугъ. Мыекъопэ гурыт еджапIэу N 17-м икIэлэеджакIоу Дарья Кроль хьисапымкIэ ыкIи физикэмкIэ балли 100 зырыз къыхьыгъ, джащ фэдэу балли 100 рагъэкъугъ Инэм гурыт еджапIэу N 6-м икIэлэеджакIоу Хадижа Абдулхаликовам (химиемкIэ), а еджэпIэ дэдэр къэзыухыгъэ Мелине Симонян (химиемкIэ), Красногвардейскэ районым игимназиеуN 1-м икIэлэеджакIоу Вероника Сергейчук (химиемкIэ), Мыекъопэ гурыт еджапIэу N 10-р къэзыухыгъэ Виолетта Куманяйкинам (химиемкIэ), Мыекъопэ лицееу N 19-м икIэлэеджакIоу Алиса Зоринам (тарихъымкIэ), Мыекъопэ гимназиеу N 22-р къэзыухыгъэ Элина Курочкинам (урысыбзэмкIэ), Мыекъопэ гурыт еджапIэу N 17-м икIэлэеджакIоу Олег Черносмага (урысыбзэмкIэ), Мыекъопэ гимназиеу N 22-р къэзыухыгъэ Глеб Стеблиным (хьисапымкIэ), Мыекъопэ лицееу N 8-м икIэлэеджакIоу Алиса Ловцовам (физикэмкIэ), Мыекъопэ районым гъэсэныгъэмкIэ игупчэу N 1-р къэзыухыгъэ Виктория Берген (обществознаниемкIэ), Мыекъопэ лицееу N 8-р къэзыухыгъэ Елизавета Волик (обществознаниемкIэ), Адыгэ республикэ гимназием икIэлэеджакIоу Шъхьэбэ Темыр (физикэмкIэ).
Адыгеим и ЛIышъхьэ балли 100 къэзыхьыхэрэм шIухьафтын афэгъэшъошэгъэнэу гъэрекIо унашъо ышIыгъагъ. Гурыт еджапIэхэр къэзыухыгъэхэм ябал мыгъэ ахэм сертификатхэр къащаратыжьыгъэх. ЛIышъхьэр гъэхъагъэхэр ашIынэу кIэлэеджакIохэм афэлъэIуагъ, зыкI къэралыгъо ушэтынхэм якIэуххэмкIэ ахэм республикэм анахь гъэхъэгъэшIухэр зэрэщашIыгъэр къыхигъэщыгъ.Адыгэ Республикэм и ЛIышъхьэ зэрэхигъэунэфыкIыгъэмкIэ, зикIуачIэ зихэку гупсэ ихэхъоныгъэ хэзылъхьэ зышIоигъо ныбжьыкIэ чанхэм республикэр афэныкъу, еджапIэхэр къызаух нэуж наукэм, производствэм, социальнэ лъэныкъом Iоф ащашIэнэу ахэм къяжэх.
КъумпIыл Мурат кIэлэегъаджэхэмрэ ны-тыхэмрэ шъхьафэу зэрафэразэр къыIуагъ. Джащ фэдэу Адыгеим и ЛIышъхьэ къызэрэхигъэщыгъэмкIэ, ныбжьыкIэхэм гъэсэныгъэ дэгъу зэрагъэгъотынымкIэ, ахэм амалэу яIэхэм зыкъызэIуягъэхыгъэнымкIэ ищыкIэгъэ Iофтхьабзэхэр респубикэм щызэрахьэх: джырэ шапхъэхэм адиштэрэ еджапIэхэр, спорт, культурэ псэуалъэхэр агъэпсых, экономикэм зыкъырагъэIэты, мэхьанэшхо зиIэ инвестиционнэ проектхэр пхыращых.
«Президентэу Владимир Путиным илъэсэу итыр Урысыем щыпсэурэ лъэпкъхэм языкIыныгъэ и Илъэсэу ыгъэнэфагъ. Лъэпкъыбэ зэрыс республикэм шъузэрэщыпсэурэм къыхэкIэу шъуицIыкIугъо къыщегъэжьагъэу зэгъунэгъушIу зэфыщытыкIэм, зэдэIэпыIэжьыныгъэм, нэмыкI культурэр бгъэлъэпIэным къарыкIырэр шъошIэ. Сыд фэдэрэ Iофышхуи зэшIохыгъэнымкIэ ахэр лъэпсэшIоу щытых. ТкIуачIэ зэдетхьылIэмэ, IэпыIэгъу тызэфэхъужьымэ тэ нахьыбэ тфызэшIокIыщт. Ащ фэдэ еплъыкIэ шъуиIэу щыIэныгъэ гъогушхом шъутехь. Гъогу мафэ шъутехь, Адыгеир шъоркIэ ренэу кIэгъэкъон пытэу, къыздэжъугъэзэжь шъушIоигъо унэу орэхъу», — къыIуагъ КъумпIыл Мурат.
Мы мафэм мэфэкI программэ гъэшIэгъон цIыфхэм къапагъохыгъ. ЕджапIэхэр къэзыухыгъэхэр янэ-ятэхэм ягъусэхэу вальс къэшъуагъэх, орэдэу «Ины узыхъукIэ» зыфиIорэр къызэдаIуагъ. Джащ фэдэу ныбжьыкIэхэр флэшмобым хэлэжьагъэх, урыс, адыгэ лъэпкъ къашъохэр къашIыгъэх.Тыгъосэрэ Iофтхьабзэр культурнэ хъугъэ-шIэгъэшхо хъугъэ. Мэкъэмэ зэфэшъхьафхэмрэ чэфыгъомрэ зэрэпчэгоу зэлъаIыгъыгъ. АР-м изаслуженнэ артистэу Эльдэрэ Айдэмыр, лъэпкъ ансамблэу «Калина красная», КIышъыкъо Назир къаIогъэ орэдхэр цIыфхэм агу рихьыгъэх. Кавер-купэу «Бомбей», урысые поп-орэдыIоу Дарья Кустовскаям (MONA) къаIогъэ орэдхэм цIыфхэр къадэшъуагъэх. Пчыхьэзэхахьэм икIэух Мыекъуапэ ипчэгу шъхьаIэ мэфэкI мэшIоустхъо щыдафыягъ.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.