Теннис цIыкIумкIэ зэнэкъокъухэр Мыекъуапэ щэкIох. Мы мафэхэм зыныбжь илъэс 14-м шIомыкIыгъэхэм якуп текIоныгъэ къыщыдэзыхыгъэхэр къэнэфагъэх.
КIэлэ 64-мэ ыкIи пшъэшъэ 53-мэ заушэтыгъ. Унэе зэнэкъокъухэм яапэрэ едзыгъо анахь дэгъоу зыкъыщызыгъэлъэгъогъэ нэбгырэ 32-рэ хагъэунэфыкIырэ чIыпIэхэм афэбэнагъэх. Кощхьэблэ районым ипсэупIэу Вольнэм щыщ Арсений Семеновым ятIонэрэ чIыпIэр къыдихыгъ, финалым ащ къыщытекIуагъ къалэу Пятигорскэ илIыкIоу Арман Мкртчян. Шытхьалэ щыпсэурэ Даниил Казарцевым джэрз медаль фагъэшъошагъ. ТипшъашъэхэмкIэ къэгъэлъэгъон анахь дэгъу зиIэр Пелагея Калининар ары, ар яхэнэрэ хъугъэ. ХагъэунэфыкIырэ чIыпIэхэр къыдахыгъэх Елизавета Фатень (Тимашевск), Каролина Репниковам (Новороссийск) ыкIи Виктория Нечукинам (Шытхьал). НэбгыритIоу зэгъусэхэм язэнэкъокъухэм пэрытныгъэр ащаубытыгъ Луганскэ Народнэ Республикэм илIыкIохэу Владислав Диковичрэ Максим Уксусовымрэ, Краснодар краим испортсменкэхэу Аэлита Забунянрэ Владислава Яроваямрэ. Джащ фэдэу текIоныгъэр къыдахыгъ Владислав Диковичрэ (Алчевск) Мария Гетманрэ (Краснодар).Джы зыныбжь илъэс 18-м емыхъугъэхэр зэнэкъокъущтых, анахь лъэшхэр къэнэфэщтых.