Базовэ мэхьанэ зиIэ спорт лъэпкъхэр Адыгэ Республикэм официальнэу щагъэнэфагъэх, ахэм ахэхьагъэх боксымрэ зэхэзымыхыхэрэм яспортрэ. Мыхэм мыщ фэдэ статус яIэ зэрэхъугъэм мэхьанэшхо иI, сыда пIомэ, Урысыем спортымкIэ и Министерствэ къыпкъырыкIэу федеральнэ бюджетым къыхэхыгъэ субсидие джы афатIупщын алъэкIыщт. Ащ ишIуагъэкIэ спортзалхэр, бассейнхэр ыкIи хэушъхьафыкIыгъэ спорт гупчэхэр ашIыщтых ыкIи агъэцэкIэжьыщтых. Джащ фэдэу мы лъэныкъохэм Iоф ащызышIэрэ тренерхэм ыкIи специалистхэм лэжьапкIэр ятыгъэнымкIэ федеральнэ гупчэр IэпыIэгъу къафэхъущт.
Мы спорт лъэпкъхэр къызэрэхахыгъэхэм къеушыхьаты ахэм республикэм мэхьанэшхо зэращыратырэр. Боксым хэхъоныгъэ ышIыным, мыщ пыщагъэхэм япчъагъэ нахьыбэ хъуным тишъолъыр лъэшэу щыпылъых. Ащ дакIоу зэлъашIэрэ тренерхэри тиIэх, зэнэкъокъоу зэхащэхэрэм тиспортсменхэм гъэхъэгъэшIухэр ащашIых. Зэхэзымыхыхэрэм яспорт атлетикэ псынкIэр, есыныр, теннис цIыкIур, нэмыкIхэри къыдыхэлъытагъэх. Спортсменхэм ягъэхьазырын фытегъэпсыхьэгъэ еджэпIэ лъэши тиI. Арышъ, мыщ фэдэ екIолIакIэм шIогъэшхо къызэритыщтым щэч хэлъэп.