ЕджэнымкIи, спортымкIи пэрытых

НыбжьыкIэхэм я Мафэ ехъулIэу, хабзэ зэрэхъу­гъэу, гъэхъэгъэшIухэр зиIэхэм ягугъу тэшIы. Ахэм ащыщых Кощхьаблэ щыпсэухэрэ зэшыпхъухэу Зыхьэ Джамилярэ Салимэрэ.

Спорт лъэныкъоу тхэквондомкIэ гъунэпкъэ инхэм ахэр анэсыгъэх. ГъэрекIо Джамиля Зэхэт Араб Эмиратым икъалэу Аль-Эйн тхэквондомкIэ дунэе чемпионатэу щыкIуагъэм тыжьын медаль къыщыдихыгъ. Ащ ыпэкIи Урысыем ыкIи Азием ащыкIогъэ зэнэкъокъу инхэм гъэгъэгъэшIу­хэр ащишIыгъ.БэмышIэу Кыргызстан щы­кIогъэ дунэе турнирми зэшы­пхъуитIумэ дэгъу дэдэу зыкъыщагъэлъэгъуагъ. Хэгъэгу 11-мэ къарыкIыгъэ нэбгырэ 700-м ехъу ащ хэлэжьагъ. Урысыем икомандэ хэт адыгэ пшъэшъэ­жъыитIумэ тхэквондомкIэ Iэпэ­Iэсэныгъэу ахэлъыр, ухьазы­рыныгъэ дэгъоу яIэр къагъэ­лъэгъуагъ. Джамиля гъогогъуищым дышъэ медаль къырихыгъ. Унэе спарингымкIэ, дисципли-нэу «стоп-баллымкIэ» ыкIи куп зэнэкъокъоу «тек-тим» зыфиIорэмкIэ апэрэ чIыпIэ къыдихыгъ. Джамиля тхэквондом хэшIыкI ин зэрэфыриIэр джыри зэ къыушыхьатыгъ, дунэе аренэм зэрифэшъуашэу зы­къыщигъэлъэгъуагъ.

Салимэ ышыпхъу нахьыжъ ыуж къинагъэп, джащ фэдэу къэгъэлъэгъон дэгъу­хэр иIэхэу Кыргызстан къикIы­жьыгъ. Унэе спарингымкIэ, дис­циплинэу «стоп-балл» зыфиIорэмкIэ ыкIи куп зэ­нэкъокъухэмкIэ ятIонэрэ чIыпIэр къыдихыгъ. Сали­мэ зыкъызэри­гъэ­лъэгъуагъэр зэ­кIэ­ми агу ри­хьыгъ. Спортым имастер хъунымкIэ кандидат шапхъэхэр зэригъэцэкIагъэм имызакъоу, бгырыпх шIуцIэ къылэжьыгъ.Гъэхъэгъэ инхэр зиIэ Джамилярэ Салимэрэ янэу Нуриет ягъусэу бэмышIэу гущыIэгъу тафэхъугъ. Пшъэшъэжъые укIытэпхэ дахэхэм ятеплъэкIэ кIочIэ ин зищыкIэгъэ тхэквондом пылъхэми къэшIэгъуай. Мы спорт лъэныкъор агукIэ къыхахыгъ, яшъыпкъэу зэрэпылъхэм ишIуа­гъэкIэ къин къащымыхъоу тыдэ кIуагъэхэми, текIоныгъэ къыдахы. Адыгэ пшъэшъэжъыехэр Адыгеим имызакъоу, Урысыем ыкIи IэкIыб къэралыгъохэм ащызэлъашIэ хъугъэх. Спортым имас­тер хъунхэу пшъэрылъ зы­фагъэуцужьыгъ, ащ чанэу фэкIох, ащкIэ янэ яапэрэ IэпыIэгъу.— Спортым цIыфыр епсыхьэ, нэбгырэ пэпчъ ицIыкIугъом къы­щегъэжьагъэу ащ пыщэгъэн фаеу сэлъытэ. Ащ кIуачIэ къыуеты, щэIагъэ къыпхелъхьэ. Спортым пылъ ныбжьыкIэхэр тыди дахэкIэ къащыхэщых, шъхьэкIафэ афа­шIы. Илъэситф сыныбжьэу сянэ тхэквондом сыритыгъагъ, ащкIэ лъэшэу сыфэраз, спортым имастер сыхъунымкIэ кандидат шапхъэхэр изгъэкъугъэу сыкъы­хэкIыжьыгъ, мастерым сызэрэнэмысыгъэмкIэ сыкIэгъожьыгъ. Сипшъэшъэжъыехэм ар къадэ­хъунэу сэгугъэ, — еIо Нуриет.

Джамилярэ Салимэрэ яцIыкIугъом къыщегъэжьагъэу спорт лъэныкъо зэфэшъхьафхэр янэ аригъэуплъэкIугъэх, ау агукIэ тхэквондор къыхахыгъ. Джамиля апэрэ зэнэкъокъур дэгъоу ыгу къэкIыжьы, илъэс 14 нахь ыныбжьыгъэп. Лъэшэу гумэкIыщтыгъ, ау инахьыжъхэр, итренер къызэрэщыгугъырэр къыгъэшъып­къэжьын зэрэфаер ыгу илъыгъ ыкIи зэрифэшъуашэу зыкъыгъэлъэгъуагъ. Непэ ащ гъогу кIыхьэ къызэпичыгъ, игъэхъагъэхэм уарыгушхонэу щыт, Азием щыкIогъэ зэнэкъокъум текIоныгъэ къыщыдихыгъ, Аль-Эйн — ты­жьын медаль, Узбекистан апэрэ чIыпIитIурэ ятIонэрэ чIыпIэу зырэ, Киргызстан апэрэ чIыпIэу щы къащыдихыгъ. КъэкIорэ илъэ­сым дунаим ичемпионатэу Пе­кин щыIэщтым хэлэжьэнэу фай. Салимэ ышыпхъу кIырыплъызэ гъэхъагъэхэр ышIыхэу ыублагъ, джыри къэгъэлъэгъон дэгъухэр ышIынхэу уахътэ иI.КъэIогъэн фае зэшыпхъухэм спортымкIэ гъэхъагъэхэр зэра­шIыхэрэм имызакъоу, дэгъу дэ­дэу зэреджэхэрэр. Джамиля я 11-рэ классым ихьагъ, дышъэ медаль къыхьынэу мэгугъэ. Гъэ­рекIо республикэм иныбжьыкIэ анахь чанхэм ащыщ хъугъэ ыкIи АР-м гъэсэныгъэмрэ шIэныгъэм­рэкIэ и Министерствэ и Щытхъу тхылъ къыфагъэшъошагъ. АР-м и ЛIышъхьэу КъумпIыл Мурат Кощхьэблэ районым зэкIом, спортсменкэ ныбжьыкIэм зы­IуигъэкIагъ, шIухьафтынхэр ритыгъэх. Салимэ я 9-рэ классым ихьагъ, ащи аттестат плъыжь къылэжьынэу еджэ. Зэшыпхъу­хэр медицинэм зыфагъэзэнэу фаех, спортыр пэрыохъу къафэмыхъунэу мэгугъэх.— Сыд фэдэрэ лъэныкъуи угу етыгъэу упылъымэ, лъэгапIэхэм уанэсын плъэкIыщт. Апэ тыфэмыеу тренировкэм тыкIощтыгъ, ау шIэхэу тызпищагъ, тыфэщагъэ хъугъэ. Еджэнри, тренировкэ­хэри, зэнэкъокъу зэфэшъхьафхэри зэдэпхьынхэр IэшIэхэп, ау тесэжьыгъэшъ, тшIокъинэп. Те­кIоныгъэу къыдэтхыхэрэм кIуачIэ къытхалъхьэ. Тянэ лъэшэу ты­фэраз, мафэ къэс мыпшъыжьэу тыкъырещэкIы, ушъыегъоу тиI, — еIо Джамиля.Пшъэшъэжъыехэм ягъэхъа­гъэхэр ыпэрапшIэу янэу Нуриет ихьатыр. Спортым игъогу ахэр тырищагъэх, шIу аригъэлъэгъугъ. Ежьыри ицIыкIугъом къыщегъэ­жьагъэу ащ фэщагъэу щытыгъ, еджапIэр къызеухым, физическэ культурэмкIэ ыкIи спортымкIэ институтым щеджагъ, илъэс пчъа­гъэ хъугъэу гурыт еджапIэм физкультурэр щарегъэхьы, ащ нэмыкIэу фитнесымкIэ инструктор. Нуриет ипшъэшъэ нахьыкIэу Терчукова Мия жъогъо цIыкIу. Мэзищым къыщегъэжьагъэу есыным пылъ, илъэсищым къыщыублагъэу инджылызыбзэ зэ­регъашIэ ыкIи художественнэ гимнастикэм пылъ. Илъэситф нахь зымыныбжьым лъэныкъо зэфэшъхьафхэмкIэ гъэхъэгъэшIу­хэр иIэх. Художественнэ гимнастикэмкIэ чIыпIэ зэфэшъхьафхэм текIоныгъэ къащыдихынэу игъо ифагъ.— Шъыпкъэу пIощтмэ, IэшIэ­хэп, тренировкэхэр мафэ къэс пIоми хъунэу тIо ашIы, Курганинскэ тэкIо, илъэси 8 хъугъэу Артур Мисакян егъасэх, ащкIэ тыфэраз. Тыдэ кIохэми, сыря­гъус, сафэгумэкIы, сэри спортым сызэрэхэтыгъэм ишIуагъэ къэкIо, сяушъыи, хэукъоныгъэу ашIы­гъэхэр унэм къэкIожьхэмэ ясэIожьы. Спортсмен пэпчъ кIуачIэу иIэр зыдишIэжьы зыхъукIэ ары текIоныгъэ къыздихыщтыри, гъэ­хъагъэхэр зишIыщтыри. Ар си­пшъашъэхэм агурысэгъаIо. Ти­унагъокIэ гъэсэныгъэр апэ ит, ащ ыуж спортыр. ЛъэныкъуитIури зэрифэшъуашэу зэрагъэца­кIэрэм сырэгушхо, — еIо Ну­риет.Джамиля, Салимэ, Мия ялэгъухэм ящысэтехыпIэхэу къахьы. Пшъэшъэжъыехэм ящыIэныгъэ гъогу рагъажьэ пэт, джыри лъэ­гэпIэ инхэр апэ зэрилъыр гъэ­нэфагъэ, ягухэлъхэр зэкIэ къа­дэхъунэу тафэлъаIо.ДЕЛЭКЪО Анет.