Лъэпшъыкъо Ф.
ТхакIоу, «Черкешенка» зыфиIорэ документальнэ фильмым иавторэу, дышъэидэнымкIэ ыкIи шэкI шъэнымкIэ IэпэIасэу Теуцожь Фатимэ итворческэ зэIукIэгъу культурэм и Унэу «Гигантым» дэжь щыIэ «Урам тхылъеджапIэм» щызэхащагъ.
Зэхахьэм къекIолIагъэхэр Сэтэнэегуащэм идышъэ Iуданэ зэрипхыгъэх. Iэпэщысэхэм якъэгъэлъэгъонэу Фатимэ къыгъэхьазырыгъэхэм адыгэ культурэм ибаиныгъэ къырагъэлъэгъукIыгъ. ШэкI шъэным итарихъ IэпэIасэм къыIотагъ. Дышъэ ыкIи тыжьын шъагъэу панном тыридагъэхэр къыгъэлъэгъуагъ.«Сэтэнае и Маф» зыфиIорэ Iофтхьабзэм ипшъэрылъхэм ащыщ лъэпкъ культурэм зегъэужьыжьыгъэныр, уахътэм хэкIодэгъэ шэн-хабзэхэр щыIэныгъэм къыхэщэжьыгъэнхэр, тыкъэзыуцухьэрэ дунаир кIэлэцIыкIухэмрэ ныбжьыкIэхэмрэ нахьышIоу къагурыIоным, ялъэныкъо гупсэ агъэлъэпIэным, тарихъыр, искусствэр, шэн-хабзэхэр зэрагъашIэхэзэ, щыIэныгъэм еплъыкIэу фыряIэм зегъэушъомбгъугъэныр, творческэ гупшысэу ахэлъыр нахьышIоу агъэфедэным фэпIугъэнхэр.ИIэшIагъэхэмкIэ IэпэIасэр къэпшIэжьыныр анахь щытхъушху. Фатимэ зышIэхэрэм иIэпэщысэхэр нэмыкIхэм ахагъэкIуакIэхэрэп. Ежьхэм ятеплъэ аIыгъ: зэкIужьхэу, егъэлыягъэ ахэмылъэу шъагъэхэр егъэпсых. ТигущыIэгъу къызэриIуагъэмкIэ, 2017-рэ илъэсым уанэхэр зышIырэ ПIатIэкъо Айдэмыр нэIуасэ фэхъугъ. Ар фильмэу «Пщэу Марыхъу» зыфиIорэм щагъэфедэщт уанэм шъагъэ тезылъхьан IэпэIасэ лъыхъущтыгъ. Фатимэ видеотехыгъэхэмкIэ шъагъэм ишIын зэригъэшIагъ ыкIи Айдэмыр илъэIу фигъэцэкIагъ. ШэкI шъэным идунай IэпэIасэр куоу зыхищагъ. Ышыпхъоу Теуцожь Нуриети упчIэжьэгъу ышIыгъ. Непэрэ мафэмкIэ IэшIэгъи 100 фэдиз ыIапэхэм къачIэкIыгъ.— Адыгэхэм якультурэ, яшэн-хабзэхэр къыткIэхъухьэрэ лIэужхэм ягъэшIэгъэнымкIэ мыщ фэдэ Iофтхьабзэхэм яшIогъэшхо къэкIо. Адыгэ культурэм иIахь анахь гъэшIэгъонхэм ащыщ непэ ныбжьыкIэхэр нэIуасэ зыфэхъугъэхэр. Пэсэрэ лъэхъаным лъэпкъым иIэпэIасэхэм ашIыщтыгъэ пкъыгъохэу къытлъыIэсыжьыгъэхэр искусствэ лъагэм нэсых. Дышъэидэным, шэкI шъагъэм уапылъыным фэшI ижъырэ лъэпкъ Iэмэ-псымэхэр зэрэбгъэфедэщтхэм, тхыпхъэхэм, нэмыкIхэм екIолIакIэу IэпэIасэхэм афашIырэр пшIэнхэ фае, ахэр лъэпкъ шIэжьым епхыгъэх. Мыщ фэдэ проект-хэр дгъэцакIэхэзэ дэным ишъэфхэр ядгъэшIэщтых, — къыIуагъ Теуцожь Фатимэ.Шъагъэм ишlын адыгэхэмкlэ пэсэрэ lэпэlэсэныгъэхэм ащыщ. Игъэкlотыгъэу тишъолъыр ар щагъэфедэщтыгъэ. Непэ Адыгеимкlэ зыlэ къыхьыхэрэр lапэкlэ къэплъытэнхэ плъэкlыщт.— Мыщ фэдэ Iофтхьабзэ мыгъэ ятIонэрэу зэхэтщагъ. Адыгэ шъуашэм мыпшъыжьэу илъэс пчъагъэм дэлэжьэгъэ тимодельер цIэрыIоу, Адыгэ Республикэм культурэмкIэ изаслуженнэ IофышIэу СтIашъу Юрэ апэрэ зэIукIэр фэгъэхьыгъагъ. Панно зэмылIэужыгъохэм тащытегущыIагъ. Джы непэ сэ сиIэшIагъэхэр мыщ къесхьылIагъ. Мыекъуапэ икъэлэ администрацие сигухэлъ къызэрэдыригъэштагъэмкIэ лъэшэу сыфэраз. Лъэпкъым иIэшIэгъэ хьалэмэтхэр лIэужыкIэм едгъэшIэнхэ фае, — еIо зэхэщакIом.Сэтэнае идышъэ Iуданэ идэхагъэ щыIэныгъэм хэкIуакIэрэп. Лъэпкъ шIэжьым къыпкъырыкIыхэзэ, лъэпкъ Iофтхьабзэхэм ныбжьыкIэхэр нахь чанэу ахащэх.Шъагъэхэр зыщыгъэфедэгъэ IэшIагъэхэр джырэ мафэм диштэу ныбжьыкIэхэм ащыгъыным IэпэIасэр кIэхъопсы. Джащ фэдэ гугъапIэхэр непэ нэфапIэ хъунэу щэгугъы.