Лъэпшъыкъо Ф.
ШэкI шъэгъэ искусствэм идунэе хьалэмэт ухэзыщэрэ мастер-класс АР-м и Сурэт къэ-гъэлъэгъуапIэ щыкIуагъ. IэпэIасэу Теуцожь Фатимэ ар зэхищагъ. Дышъэидэм, шэкI шъа-гъэм яшъэфхэр ныбжьыкIэхэм зэрагъэшIагъ, ежьхэми къадэхъумэ аушэтыгъ.
— Сэтэнае идышъэ Iуданэ идэхагъэ щыIэныгъэм хэкIуакIэрэп. Непэрэ егъэджэн сыхьатхэр гъэшIэгъонэу зэрэзгъэпсыщтхэм сыпылъыгъ. ШэкI шъэным фэгъэхьыгъэ шIэныгъэхэр щызэхэтфыгъ. Дышъэ ыкIи тыжьын хэдыкIыныр, дышъэ блэныр, шъагъэм иIушIыкIын, дышъэ идагъэр, лъэпкъ Iэпэщысэхэр шIыгъэнхэр пшъэшъэ ныбжьыкIэмэ зэрашIогъэшIэгъонхэм тегъэгушIо. ХэдыкIыным ишъэфхэр къыткIэхъухьэрэ лIэужхэм ядгъэшIэным тыпылъ. Культурнэ кIэным уасэ фашIынымкIэ егъэджэнхэм мэхьанэшхо яIэу сэлъытэ. Адыгэ лъэпкъ Iэпэщысэхэм якъэухъумэн ыкIи яхэгъэхъон егъэджэныр тегъэпсыхьагъ, — къыIуагъ Фатимэ.
Сэтэнае идышъэ Iуданэ епхыгъэ десэхэм ахэлэжьэгъэ пшъашъэмэ IофшIэным икIэуххэр зэфахьысыжьыгъэх. Шъхьадж иIэшIагъэ щыгушIукIыгъ. Сэтэнае идышъэ Iуданэ, пшысэхэм афэгъэхьыгъэ зэIукIэхэр щыIэныгъэм дештэх. Мастэр, Iуданэр, шэкIыр агъэфедэхэзэ, Iофтхьабзэм хэлажьэхэрэм пкъыгъо гъэшIэгъонхэр ашIыгъ, хадыкIыгъэ тхыпхъэхэм лъэпкъ гупшысэ ахэлъ. ШIухьафтын пшIын плъэкIыщт пкъыгъуабэ ахэм ахэт.Пшъашъэхэр дэным, бзэным нахь афэщагъэхэ зэрэхъухэрэм уегъэгушIо. Анахь узыгъэгушхохэрэр илъэси 10 — 13 зыныбжь пшъэшъэжъые цIыкIухэу зэхахьэм хэлэжьагъэхэр ары.— Лъэпкъым итарихъ къыхэкIыгъэ тхыпхъэхэм лIэшIэгъухэм къапхырыкIыгъэ хабзэхэр, тхыдэхэр къыраIотыкIы. Тхыпхъэхэр адыгэ лъэпкъым икультурэ изы Iахьых. Шъагъэм хэшIыкIыгъэ пэпчъ зыгорэ къеIуатэ, — еIо Фатимэ.Дышъэидагъэхэр зыщыгъэфедэгъэ IэшIагъэхэр джырэ мафэм диштэу ныбжьыкIэхэм ащыгъыным IэпэIасэр кIэхъопсы.— Дэн-бзэныр, дышъэидэныр, хъэныр, хэдыкIыныр, шъэгъэшIыныр — а зэпстэур адыгэ пшъашъэхэм, адыгэ бзылъфыгъэхэм яIэпэIэсэныгъэ щыщыгъ. Непэрэ уахътэм ахэм тIэкIу апэчыжьэ тыхъугъэми, афэкъулэе IэпэIасэхэр щыIэх. Дэн-бзэным ныбжьыкIабэ теукIытыхьэ. Лъэпкъ тхыпхъэр дгъэкIоды хъущтэп. Сипхъорэлъф цIыкIу мыщ фэдэ егъэджэн сыхьатхэр блэсымыгъэкIэу сэщэ. IэшIагъэхэр ыIэ къизгъэхьаным сыпылъ, — къыIуагъ Iофтхьабзэм хэлэжьэгъэ Нэпсэу Саудэт.НыбжьыкIэу къекIолIагъэхэм егъэджэныр ашIогъэшIэгъонэу IэпэIасэм едэIугъэх. ЯIэшIа-гъэхэр пшъашъэхэм зыдахьыжьыгъэх ыкIи шIэныгъакIэхэр десэхэм ащагъотыгъэх.