Кроль Д. ихъарзынэщ
ТIогъогогъо балли 100 зырыз. ЗыкI къэралыгъо ушэтынхэм республикэмкIэ анахь къэгъэлъэгъонышIухэр зиIэ Дарья КролькIэ гурыт еджапIэхэр къэзыухыгъэхэм янепэрэ пчыхьэзэхахьэу Мыекъуапэ игупчэ щыкIощтыр хъугъэ-шIэгъэ ин. Ны-тыхэмкIи, езыгъэджагъэхэмкIи, анахь шъхьаIэр — ежь ышъхьэкIи пшъэдэкIыжьышхоу ыхьыщтыгъэр ифэшъуашэу зэригъэцэкIагъэм ыгъэгушхоу мэфэкIым екIолIэщт.
ХьисапымкIэ ыкIи физикэмкIэ анахь балл инхэр Дарье къыхьыгъэх, ащ ихьатыркIэ шIэныгъэ куу къэзыгъэлъэгъогъэ ныбжьыкIэхэм ясатырэ тIогъогогъо хэуцуагъ. Ар къызэрэдэхъугъэм ишъэфхэм такIэупчIэ тшIоигъоу пшъэшъэ ныбжьыкIэр зэдэгущыIэгъум къедгъэблэгъагъ ыкIи апэрэ упчIэр ушэтын ужхэм изэхашIэхэр зыфэдэхэр ары.— Ушэтынхэр ыкIэм зэрэфэкIуагъэхэм сегъэгушIо. Лъэшэу сызфэрэзэжь. Шъхьафит сыхъугъэм фэд. СапэкIэ щыIэныгъакIэ къысэжэ, студент сыхъущт, гугъэшхохэр сиIэх, ау тIэкIуи зызгъэпсэфынэу сыфай, — иджэуап ащ.Дарья Кроль Мыекъуапэ ия 17-рэ еджапIэ щеджагъ. Апэрэ классым къыщегъэжьагъэу анахь еджэкIо дэгъухэм ащыщыгъ. Ащ дакIоу АКъУ-м иестественнэ-хьисап еджапIи къыухыгъ, олимпиадэ зэфэшъхьафхэм ренэу ахэлажьэщтыгъ, хагъэунэфыкIырэ чIыпIэхэр къыхьыщтыгъ. Бэмэ къяхьылъэкIырэ хьисапымрэ физикэмрэ Дарье псынкIэу сыдигъуи къыдэхъущтыгъэх.— Хабзэ горэхэр формулэхэмкIэ, пчъагъэхэмкIэ къэптхыхьанхэ зэрэплъэкIыщтым сыдигъуи сызфищэщтыгъ. Художественнэ тхылъ уеджэрэм фэд, узыпещэ. Хъугъэ-шIагъэ горэ къызэрэхъурэр къызыбгурыIокIэ, хьалэмэтыгъэу къысщэхъу, — еIо ащ.ЗыкI къэралыгъо ушэтынхэм гъэлъэшыгъэу зафигъэхьазырэу Дарье зыригъэжьагъэр я 11-рэ классым зехьэр ары. Хьисапыр зэритыщтыр гъэнэфэгъагъэмэ, физикэр къызэрэхихыщтыр — гъатхэм нахь пэблагъэу. ПэшIорыгъэшъ ушэтыным изэфэхьысыжьышIухэм ащ тырагъэгушIухьагъ. Анахь шъхьаIэр — кIэлэегъэджэ тедзэ (репетитор) имыIэу лъэныкъо пстэуми ежь-ежьырэу зафигъэхьазырыгъ.— Шъыпкъэр пIощтмэ, ыпкIэ хэмылъэу зыбгъэхьазырыщтмэ, дунэе хъытыум амалыбэ къыуеты. Ащ гъэцэкIэн зэфэшъхьафыбэ ибгъотэщт — нахь псынкIэхэри гъэхьылъагъэхэри. ЗыкI къэралыгъо ушэтынхэм ядесэ къызэрыкIохэр къысфэпсынкIэхэ зэхъум, нахь гъэхьылъагъэхэр къэсшIыхэу сыублагъ. Ахэр сшIогъэшIэгъон дэдагъэх. ХьисапымкIэ еджапIэми, естественнэ хьисап, гъэмэфэ хьисап еджапIэми ащысиIэгъэ кIэлэегъаджэхэм зэкIэми «тхьашъуегъэпсэу» ясIо сшIоигъу. ЫпэрапшIэу сигупсэ еджапIэмкIэ сикIэлэегъэджагъэхэу Ольга Каранкевичрэ Людмила Азизовамрэ. Ахэм хьисапымкIэ сырагъэджагъ. Физикэр шIу сэзыгъэлъэгъугъэу, бэрэ къыздэлэжьагъэу Даниил Коржаковыр, — къыддэгощагъ Дарье.Ящэнэрэ балли 100-ри Дарье къыхьын ылъэкIыщтыгъ. УрысыбзэмкIэ ар ригъэкъуным пае щыкIагъэр пчъэгъищ ныIэп. Зы хэукъоныгъэу хишIыхьагъэм пае балл 97-рэ къыфикIыгъ. ДжырэкIэ ушэтынищымкIэ балл 297-рэ ащ иI, информатикэмкIэ зэфэхьысыжьхэм джыри яжэ. Мы мазэм и 27-м къыраIожьынэу щыт. Анахь гъэшIэгъоныр, Дарье иамалхэр икъоу зыдешIэжьых. ГущыIэм пае, информатикэмкIэ икъэгъэлъэгъонхэр 100-м зэрэнэмысыщтхэр ешIэ, ау хьисапымкIэ ицыхьэшхо зытелъыгъ.— 100-м зэрэнэзгъэсышъущтыр зыдэсшIэжьыщтыгъ, ау зыкI къэралыгъо ушэтыныр пхъэдзым зэрэфэдэри къызгурыIощтыгъ. Ау зыбгъэхьазырыгъэмэ, уицыхьэ зытелъыжьын фае. ХьисапымкIэ ушэтыным сыкъызычIэкIыжьым анахь балл иныр къызэрэсхьыщтыр къызгурыIощтыгъ. «Шъэр къэсымыхьымэ, сшIэрэп къысфагъэуцущтыр» сIуи сикIэлэегъаджэ есIогъагъ. Джащ фэдизым сицыхьэ зытелъыжьыгъ. ФизикэмкIэ тIэкIу джэнджэш сыгу къихьэщтыгъ, ау ащкIи къэгъэлъэгъонышIум сыщыгугъыщтыгъ. Ари къыздэхъугъ. Амалэу сиIэр зэкIэ ушэтынхэм зэрясхьылIагъэм сырыраз.— КъэкIорэ илъэсым зыкI къэралыгъо ушэтынхэр зытыщтхэм сыда къяпIощтыр?— ЫпэрапшIэу къясIощтыр ежьхэм зэкIэ зэрялъытыгъэр ары. Зыгорэ къыбдэхъуным пае щэIагъэ пхэлъын, уздэлэжьэжьын фае. ЗэкIэ пшIэу къызыпщыхъурэми мафэ къэс Iоф зыдэпшIэжьын фае, анахьэу узыщышъхьахырэми, — иджэуап Дарье.Ау Дарье иушэтынхэр кIэм фэкIогъапэхэп. Москва, МКъУ-м физикэмкIэ ифакультет чIэхьаныр игухэлъ. ДжырэкIэ ащ зыфегъэхьазыры. ЗэрэмыпсынкIэщтыр къыгурэIоми, къыгъащтэрэп. ИщыIэныгъэ иIахьыкIэу ригъэжьэщтым шIукIэ щэгугъы.Шъугу къэдгъэкIыжьын, зыкI къэралыгъо ушэтынхэм балли 100 къащызыхьыхэрэм предмет пэпчъкIэ сомэ мини 100 шIухьафтынэу аратыщт.Бжыхьэкъо Бэл.