М. Гордышов
Адыгэ Республикэм и ЛIышъхьэу КъумпIыл Мурат Тэхъутэмыкъое районым и Афыпсыпэ къоджэ псэупIэ инахьыжъхэм зэIукIэгъу адыриIагъ. ПсэупIэм дэсхэм ацIэкIэ ащ хэлэжьагъэх Жадэ Анзаур, Алэлэ Аслъан, Бэджэшъэ Борис, Ацумыжъ Барыч.
ЗэIукIэгъум илъэхъан къуаджэм исоциальнэ-экономикэ изытет, псэупIэхэм язэтегъэпсыхьан, социальнэ инфраструктурэм хэхъоныгъэ егъэшIыгъэным япхыгъэ зигъо Iофыгъохэм атегущыIагъэх.Нахьыжъхэр республикэм и ЛIышъхьэ зыIокIэхэм анахьэу къаIэтыгъэ Iофыгъохэр зэпхыгъэхэр гъогухэм язытет, медицинэ IэпыIэгъур, ныбжьыкIэхэм яшIуагъэ арагъэкIыныр, адыгабзэмрэ культурэ шэн-хабзэхэмрэ къэухъумэгъэнхэр ары. Къуаджэхэм тапэкIи хэхъоныгъэу ашIыщтым иIофыгъохэм шъхьафэу къащыуцугъэх.Афыпсыпэ къоджэ псэупIэу чылищ зыхахьэрэм дэсхэм ацIэкIэ зэдэгущыIэгъум хэлэжьагъэхэм къаIуагъ къоджэдэсхэм ынаIэ къызэратыригъэтырэм, псэупIэм изэтегъэпсыхьанкIэ Iофышхоу зэшIуахырэм апае ЛIышъхьэм зэрэфэразэхэр. Мы аужырэ илъэси 7-м зэхъокIыныгъэ инхэу ящыIакIэ фэхъухэрэри нахьыжъхэм къыхагъэщыгъэх.А уахътэм къыкIоцI Афыпсыпэ къоджэ псэупIэм социальнэ мэхьанэ зиIэ проект 30 фэдиз щагъэцэкIагъ. Ахэм ащыщых къуаджэхэу Хьащтыку, Пэнэхэс ыкIи Псэйтыку адашIыхьэгъэ кIэлэцIыкIу джэгупIэхэр, Хьащтыку щашIыгъэ фельдшер-мамыку IэзапIэр ыкIи культурэм и Унэу щагъэцэкIэжьыгъэр, къуаджэу Афыпсыпэ щагъэпсыгъэ парк шъолъырыр, Хэгъэгу зэошхом хэкIодагъэхэм ясаугъэтхэу къуаджэхэу Псэйтыкурэ Афыпсыпэрэ адэтхэр зэрагъэцэкIэжьыгъэхэр, Пэнэхэс дэт еджапIэу N 7-мрэ Шапсыгъэ псыIыгъыпIэм идамбэрэ зэрагъэцэкIэжьыгъэхэр, Пэнэхэс культурэм и Унэу дэтымрэ итхылъеджапIэрэ игъэкIотыгъэ гъэцэкIэжьынхэр зэрарашIылIагъэхэр. Мы илъэсым физкультурэмрэ псауныгъэм игъэпытэнрэ афытегъэпсыхьэгъэ гупчэу къуаджэу Пэнэхэс щашIыщтыгъэр аухыгъ, джащ фэдэу Афыпсыпэ врач амбулаториеу щырагъэжьэгъагъэри ыкIэм фэкIуагъ. Джы Шапсыгъэ псыубытыпIэм идамбэ изэтегъэпсыхьан макIо, къуаджэу Афыпсыпэ псауныгъэм игъэпытэн фытегъэпсыхьэгъэ гупчэмрэ кIэлэцIыкIу IыгъыпIэмрэ щашIых, Хь. М. Шъэумэным ыцIэкIэ щыт клиникэм IэзэпIакIэ щагъэпсы. Проект гъэнэфагъэхэм ягъэцэкIэн къыхэлажьэх шIушIакIохэу Натхъо Пщымафэрэ Шъэумэн Хьазрэтрэ.ЗэIукIэгъум хэлажьэхэрэр шъхьафэу атегущыIагъэх къыкIэлъыкIорэ Iофыгъохэм: гъогухэм яшIын, инженер коммуникациехэм ягъэцэкIэжьын, цIыф псэупIэхэр къэбзэныгъэмкIэ шапхъэу щыIэхэм адиштэнхэм, общественнэ чIыпIэхэр нахь зэтегъэпсыхьэгъэнхэм. ГущыIэм пае, мы илъэсым ыкIэм ехъулIэу къуаджэу Афыпсыпэ идэхьэгъум дэжь щагъэпсырэ мыжъосыным ишIын аухыщт.«Урысыем и Президентэу Владимир Путиным цIыфхэм ящыIакIэ нахьышIу шIыгъэнымкIэ къыгъэуцурэ пшъэрылъхэр гъэцэкIагъэ хъунхэм пае бэ зэшIотхырэр. Къуаджэхэм хэхъоныгъэ ягъэшIыгъэнри ахэм къахеубытэ. ЦIыф псэупIэ гъэнэфагъэхэм яIофыгъохэу зэтырихьагъэхэр зэшIохыгъэнхэм екIолIэкIэ гъэнэфагъэ фытиIэу тыдэлэжьэщт. Ахэр: псэупIэу Кужорскэр, къутырэу Чернышевыр, псэупIэхэу Табачнэр, Удобнэр ыкIи нэмыкIхэр. Зигугъу къэтшIыгъэ псэупIэхэм адэсхэм зэIукIэгъухэр адэтэшIых, анахь зигъо Iофыгъохэр тэгъэунэфых ыкIи ыкIэм нэсэу ахэр зэшIохыгъэ хъунхэм тынаIэ тетэгъэты», — къыIуагъ ЛIышъхьэм.Республикэм ипащэ къызэрэхигъэщыгъэмкIэ, псэупIэхэм адэсхэм, анахьэу етIани нахьыжъхэм, гущыIэгъу афэхъугъэным, обществэм зэгурыIоныгъэ хэлъыным, лъэпсэ чыжьэ зиIэ хэбзэ дахэхэу лъэпкъхэм ахэлъхэр къэухъумэгъэнхэм мэхьанэшхо яI. КъыткIэхъухьэхэрэр пIугъэнхэм, нахьыжъхэр хэлажьэхэзэ Iофтхьабзэхэр зэхэщэгъэнхэм, Урысыем щыпсэурэ цIыф лъэпкъхэм языкIыныгъэ и Илъэс фэгъэхьыгъэ Iофыгъо зэфэшъхьафхэр зэшIохыгъэнхэм, партиеу «Единэ Россиер» кIэщакIо зыфэхъугъэ проектхэр пхырыщыгъэнхэм шIуагъэу къахьырэр ащ къыхигъэщыгъ.«Тинахьыжъхэр ары цIыфыгъэ шэпхъэ дахэхэмкIэ обществэр ренэу зэрыгъуазэщтыгъэр ыкIи зэрыгъуазэрэр. Шъо щыIэныгъэ опытышхо шъуиI, шъуиIушыгъэ, уи Хэгъэгу шIу плъэгъун зэрэфаем япхыгъэ Iофтхьабзэхэр пхырыщыгъэнхэмкIэ, акъылыгъэ зыхэлъ унашъохэр штэгъэнхэмкIэ шъуишIогъэшхо къэкIо. Къуаджэхэм тапэкIи хэхъоныгъэшхо ашIыным, цIыфхэр зыгъэгумэкIырэ Iофыгъохэр зэшIохыгъэнхэм тынаIэ атедгъэтыщт», — къыIуагъ КъумпIыл Мурат.ЗэIукIэгъум икIэуххэм атегъэпсыхьагъэу Тэхъутэмыкъое районым ипащэхэм ыкIи къулыкъу гъэнэфагъэхэм пшъэрылъ афишIыгъ нахьыжъхэм игъо алъэгъугъэхэр къыдалъытэнхэу ыкIи ахэм язэшIохынкIэ Iофтхьабзэхэр рахъухьанхэу.Хабзэмрэ цIыфхэмрэ азыфагу илъ зэдэлэжьэныгъэ-зэгурыIоныгъэр гъэпытэгъэнымкIэ тапэкIи нахьыжъхэмрэ муниципальнэ образованиехэм япащэхэмрэ ащ фэдэ зэIукIэгъухэр зэдыряIэн зэрэфаер Адыгеим и ЛIышъхьэ къыхигъэщыгъ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.