Адыгеим хэдзынхэм зафегъэхьазыры

Адыгеим щыпсэухэрэр Iоныгъо мазэм Урысые Федерацием и Къэралыгъо Думэ идепутатхэм яхэдзын закъоп зыхэлэжьэщтхэр. Джащ фэдэу АР-м и Къэралыгъо Совет – Хасэм идепутатхэм яхэдзыни республикэм щыкIощт, чIыпIэ зыгъэIорышIэжьынымкIэ къулыкъухэм яхэдзын тегъэпсыхьэгъэ Iофтхьэбзэ 15 щызэхащэщт. АР-м и Къэралыгъо Совет – Хасэм идепутат мандат 50-у ыкIи республикэм имуниципальнэ образованиехэм ямандати 166-у нэкI хъугъэхэр нэмыкI кандидатхэм аратыжьыщтых.ЦIыфхэм амакъэ зыщатыщт мафэхэм Адыгеим хэдзынхэмкIэ ичIыпIэ комиссии 9-мэ, ихэдзыпIэ чIыпIэ 265-мэ Iоф ­ашIэщт. Республикэм ис нэбгырэ мин 340-м ехъумэ хэдзынхэм ахэлэжьэнхэу фитыныгъэ яI.Хэдзынхэм ялъэхъан следственнэ-оперативнэ купхэм яIофшIэн нахь агъэлъэшыщт, цIыфхэр щынэгъон­чъэу хэдзынхэм ахэлэжьэнхэм гъунэ лъа­фыщт, металлодетекторхэр агъэфедэщтых, народнэ дружинникхэмрэ унэе ухъумакIохэмрэ къыздагъэIэпыIэщтых.АР-м хэдзынхэмкIэ и Гупчэ комиссие иучасткэхэр, Мыекъуапэ имэшIокугъогу вокзал, иавтовокзал, коммунальнэ къу­лыкъухэм япсэуалъэхэр, транспорт, энергетическэ, нефтегаз компаниехэр нахь лъэшэу къагъэгъунэщтых. Электроэнергие къэкIопIэ лыехэр хэдзыпIэ чIыпIэхэм яIэнхэм, радиоэлектрон сис­темэхэм тэрэзэу Iоф ашIэным анаIэ тырагъэтыщт, хъызмэтшIапIэхэм яIофышIэхэр гумэкIыгъо къэхъун зэрилъэ­кIыщтым фэхьазырынхэ фае.«Iофхэм язытет икъоу зэхафызэ ашIын фае. Къулыкъу пстэуми зэдырагъаштэу Iоф зэдашIэ зыхъукIэ ары цIыфхэм щынэгъончъагъэ яIэн, зыпкъитыныгъэр къаухъумэн залъэкIыщтыр. НыбжьыкIэхэр гъогу пхэндж темыхьанхэм лъэшэу гъунэ лъыфыгъэн фае», — къыIуагъ КъумпIыл Мурат.