Кушъхьэфэчъэ спортымкIэ Урысыем ичемпионат Республикэу Удмуртием икъэлэ шъхьаIэу Ижевскэ щэкIо. Мыщ бзылъфыгъэхэр ыкIи пшъэшъэ ныбжьыкIэхэр хэлажьэх.
Зэнэкъокъур лъэныкъуитIоу зэтеутыгъ: нэбгыритIоу зэгъусэхэм ыкIи командэхэм язэнэкъокъухэр. Iофтхьабзэм иапэрэ мафэ Адыгэ Республикэм илIыкIохэу Ангелина Винникрэ Елизавета Арчибасовамрэ зэгъусэхэу километрэ 25-рэ зэрылъ гъогууанэр анахь псынкIэу къачъыгъ, ахэр Урысыем ичемпионкэ хъугъэх. Тыжьын медальхэр афагъэшъошагъэх Самарскэ хэкур къэзыгъэлъэгъогъэхэ Марина Коминамрэ Дарья Фоминамрэ. Орловскэ хэкум испортсменкэхэу Мария Максимовамрэ Екатерина Гуренковамрэ ящэнэрэ чIыпIэр къыдахыгъ.
Типшъашъэхэм ыкIи ахэм ятренерэу Алексей Войновым тафэгушIо, текIоныгъакIэхэм афэкIонхэу афэтэIо.