ДиндэлэжьапIэр
Хабзэ зэрэхъугъэу, илъэс къэс Къурмэным ехъулIэу зэкIэ быслъымэнэу тыдэрэ хэгъэгу щыпсэухэрэр хьаджэшI макIох. Адыгеим ыкIи Краснодар краим ащыпсэурэ быслъымэнхэри ахэм мымакIэу ахэтых. Джырэблагъэ хьаджышI щыIагъэхэм яIофхэр дахэу зэпыфагъэхэу къагъэзэжьыгъ.
ХьаджэшI кIуагъэхэр купитIу хъущтыгъэх, ахэм пэщэныгъэ адызэрахьагъ Iимамхэу Хьасани Мыхьамэтрэ Минду Артуррэ.ХьаджэшIэным шапхъэу пылъхэр, ащ изэхэщэнкIэ упчIэу къэуцухэрэм афэгъэхьыгъэу гущыIэгъу тыфэхъугъ IэкIыб зэпхыныгъэхэмкIэ муфтиим игуадзэу Хьасани Мыхьамэт. Илъэси 5 хъугъэу ар мы Iофым фэгъэзагъ. Бзэхэр ешIэ, нэмыкI къэралыгъохэм адэлажьэ. Ащ къызэрэтфиIотагъэмкIэ, УФ-м и Хьадж-миссиер ары квотэхэр къязытырэр. Ащ хахьэх УФ-м щыпсэурэ быслъымэнхэм ядинлэжьапIэхэр.Мыгъэ хьаджэшI кIонхэ алъэкIынэу Адыгэ Республикэм ыкIи Краснодар краим ащыпсэурэ быслъымэнхэм я ДиндэлэжьапIэ квоти 115-рэ къаратыгъ. Мыхэм ащыщэу апэрэ купым хэтхэр жъоныгъуакIэм и 16-м, ятIонэрэ купым хэтхэр жъоныгъуакIэм и 21-м кIуагъэх. Мыхэр мэфэ 14 къызэрэтыгъэхэр. Зыхэр Минеральные воды, адрэхэр Магас, Налщык арыкIыхи къухьэлъатэмкIэ Дубай, нэужым Мединэ быбыгъэх, ащ мэфищ фэдизрэ дэсыгъэх. Нэужым хьадж ашIы хъумэ зыщалъэрэ щыгъынхэр ащыгъэу Чабэм мэфищрэ дэсыгъэх, ащ ыуж Арафат кIуагъэх.— Адыгеир, джащ фэдэу Дагъыстан, Чэчэныр, Къалмыкъыр, Къэбэртэе-Бэлъкъарыр, Темыр Осетиер, Къэрэщэе-Щэрджэсыр аIоу Темыр-Кавказым ибыслъымэнхэм я Координационнэ гупчэ хэхьэх. Мыхэм быслъымэн пчъагъэу арысым елъытыгъэу квотэхэр къатых. Адыгеим ыкIи Краснодар краим ис быслъымэнхэм ателъытагъэу квоти 115-рэ къытатыгъ, — еIо Мыхьамэт.Iимамым къызэриIуагъэмкIэ, квотэр ар чIыпIэ пчъагъэу къатырэр ары. Мыщ ыпкIэ ежь хьаджэшI кIощтхэм аты. Зы нэбгырэм телъытагъэу ар сомэ мин 400-м ехъу. Ащ хэхьэ гъогупкIэр, хьакIэщыпкIэр, Чабэм тIогъогогъо зэрэщышхэщтхэр. ЛъэкI зиIэ цIыфыр ежь мыкIошъущтэу, ау псапэ къыгъэхъэнэу фаемэ, нэмыкI горэм ахъщэ ритыни, ыгъэкIон ылъэкIыщт.Мыхьамэт къызэриIуагъэмкIэ, хьаджэшI кIохэрэм аныбжь гъэнэфагъэу щытэп, зэфэшъхьафых. Зыныбжь имыкъугъэхэм къащегъэжьагъэу (янэ-ятэхэм къыздащэнхэ фит) илъэс 80-м кIэхьагъэхэри ахэтых. Ау мыхэми гъусэ яIэн фае.— Квотэ къызэратыгъэ нэбгыри 115-мэ ятхылъхэр пэшIорыгъэшъэу афэтэгъэхьазырых, ахъщэр игъусэу ахэр кощын IофхэмкIэ гупчэм ыуплъэкIунхэу фэтэгъэхьы. Ащ нэмыкIэу вакцинэ зыхалъхьан фае. Визэр хьазыр зыхъукIэ ахъщэм къебгъэгъэзэжьын плъэкIыщтэп, — къыIуагъ Хьасани.Мыхьамэт къызэриIорэмкIэ, хьаджэшIыным къиныгъохэр пылъых, анахьэу мэфэ фэбэ дэдэхэм цIыфхэр бэ хъумэ уафэсакъын, зэрищыкIагъэу зепщэнхэ фае. Ащ пае щэIэгъэ икъу пхэлъын фае.— ХьаджэшIыным лъэбэкъоу щыпшIырэ пэпчъ псапэ. Алахьталэм псэкIодхэр зэкIэ егъэгъух. Мыхъун гущыIэхэр пIо хъущтэп, мыхъун зекIуакIэхэм защыбдзыен фае. Ахэр зыгъэцакIэхэрэм ихьадж къабыл мэхъу, къабзэу къегъэзэжьы, — къыIуагъ муфтиим игуадзэ.КIАРЭ Фатим.