А. Гусев
УФ-м и Апшъэрэ хьыкум и Тхьаматэ иапэрэ гуадзэу Владимир Давыдовыр хэлажьэзэ, Адыгэ Республикэм и Апшъэрэ хьыкум тхьамэтакIэу фашIыгъэ Денис Катанандовым АР-м и Апшъэрэ хьыкум зычIэт унэм нэIуасэ щыфашIыгъэх. Илъэси 6 пIалъэкIэ а IэнатIэм ар Iуагъэхьагъ. 2026-рэ илъэсым мэкъуогъум и 9-м УФ-м и Президентэу Владимир Путиныр ащ фэгъэхьыгъэ Указым кIэтхэжьыгъ.
АР-м и Апшъэрэ хьыкум и ТхьамэтакIэ нэIуасэ зызщыфашIырэ Iофтхьабзэм Адыгеим и ЛIышъхьэу КъумпIыл Мурат къекIолIагъ. Джащ фэдэу ащ щыIагъэх АР-м и Къэралыгъо Совет – Хасэм и Тхьаматэ игуадзэу Цэй Эдуард, федеральнэ инспектор шъхьаIэу Сергей Дрокиныр, республикэм ихэбзэухъумэкIо къулыкъухэм япащэхэр, шъолъырым ихьыкумышI обществэ илIыкIохэр.ТхьамэтакIэм нэIуасэ фишIыхэзэ Владимир Давыдовым къыхигъэщыгъ Адыгэ Республикэм ихьыкумышI системэ тапэкIи нахь гъэпытэгъэнымкIэ мэхьанэшхо зиIэ хъугъэ-шIагъэу ар зэрэщытыр. УФ-м и Апшъэрэ хьыкум и Тхьаматэ иапэрэ гуадзэ къыхигъэщыгъ Денис Катанандовым IэпэIэсэныгъэ ин зэрэхэлъыр, зэрэзэхэщэкIо дэгъур ыкIи хьыкумым иIофшIэн тэрэзэу зэрэзэхищэщтым, хабзэмрэ обществэмрэ якъулыкъухэм шIуагъэ къэзытыщт зэдэлэжьэныгъэ зэрадыриIэщтым ицыхьэ зэрэтелъыр. Владимир Давыдовым IофшIэным илъэныкъо шъхьаIэхэр къыгъэнэфагъэх, республикэм ихьыкумышI хабзэ цыхьэу фашIырэр тапэкIи гъэпытэгъэным, Iофхэм ахаплъэхэ зыхъукIэ хэбзэгъэуцугъэу щыIэхэм атетэу къэуцурэ Iофыгъохэр зэшIохыгъэнхэм Денис Катанандовым ынаIэ тырыригъэдзагъ.
Адыгеим и ЛIышъхьэ АР-м и Апшъэрэ хьыкум итхьамэтакIэ шIуфэс рихыгъ, республикэм ихьыкумышI системэ ыпашъхьэ ит пшъэрылъхэр гъэхъагъэ хэлъэу зэшIохыгъэнхэмкIэ Денис Катанандовым IофшIэкIэшIоу IэкIэлъым ишIуагъэ къызэрэкIощтым ицыхьэ зэрэтелъыр къыIуагъ.«Республикэм ихэбзэ, ихэбзэухъумэкIо ыкIи иуплъэкIокIо-лъыплъэкIо къулыкъухэм бэшIагъэу зэдэлэжьэныгъэ щызэдыряI. Тикъэралыгъо ипащэ къыгъэуцугъэ пшъэрылъым – цIыфхэм ящыIакIэ нахьышIу шIыгъэным тызэгъусэу зэкIэми тыдэлажьэ», — къыхигъэщыгъ КъумпIыл Мурат.Адыгеим и ЛIышъхьэ республикэм исоциальнэ-экономическэ гъэхъэгъэ шъхьаIэхэм, общественнэ-политикэ зыпкъитыныгъэ шъолъырым илъынымкIэ Iофтхьабзэхэу зэрахьэхэрэм, экономикэм зыкъегъэIэтыгъэнымкIэ ыкIи социальнэ лъэныкъор гъэпытэгъэнымкIэ Iофэу ашIэрэм ягугъу къышIыгъ. Анахьэу анаIэ зытырагъэтын фэе лъэныкъохэри къыхигъэщыгъэх. Ахэм ащыщых зыныбжь хэкIотагъэхэм, кIэлэцIыкIу ибэхэм, пенсионерхэм, сабыибэ зэрыс унагъохэм яфитыныгъэхэр къэухъумэгъэнхэр. ХэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ яфедэхэр къэухъумэгъэнхэр апшъэрэ пшъэрылъхэм ащыщ.«А Iофтхьабзэхэр зэшIохыгъэ зэрэхъухэрэм ялъытыгъэщт республикэм щыпсэурэ цIыфхэм правосудием, хьыкумхэм цыхьэу афашIыщтыр, предпринимательхэми яфитыныгъэхэр цыхьэшIэгъоу ухъумагъэ зэрэхъущтхэм шIошъхъуныгъэ фыряIэщт. Экономикэм ихэхъоныгъэкIи, цIыфхэм ягуетыныгъэкIи а пстэуми мэхьанэшхо яI», — къыIуагъ КъумпIыл Мурат.АР-м и Апшъэрэ хьыкум ипэщакIэ гъэхъагъэхэр ышIынхэу фэлъэIуагъ, республикэм ихьыкумхэр цIыфхэм яфитыныгъэхэм яухъумэкIо цыхьэшIэгъоу зэрэщытыщтхэм шIошъхъуныгъэ зэрэфыриIэри къыхигъэщыгъ.Денис Катанандовым иджэуап псалъэ къыхигъэщыгъ УФ-м и Президентэу Владимир Путиным, УФ-м и Апшъэрэ хьыкум и Тхьаматэу Игорь Красновым ыкIи УФ-м и Апшъэрэ хьыкум и Тхьаматэ иапэрэ гуадзэу Владимир Давыдовым цыхьэшхоу къыфашIыгъэм пае зэрафэразэр, ар къыгъэшъыпкъэжьыным пае фэлъэкIыщтыр зэкIэ ышIэнэу, пшъэрылъэу щытхэр ыгъэцэкIэнхэу ыгъэгугъагъэх. Денис Катанандовым къызэрэхигъэщыгъэмкIэ, республикэм ихьыкумышI системэ шъхьэихыгъэу, зышIоигъо пстэуми зыкъыфагъэзэн алъэкIынэу, цIыфхэм хьыкумым цыхьэу фашIырэр джыри нахь гъэпытэгъэным атегъэпсыхьагъэу ипшъэрылъхэр ыгъэцэкIэнхэ мурад иI.Денис Катанандовыр 1981-рэ илъэсым щылэ мазэм и 15-м къалэу Петрозаводскэ къыщыхъугъ, Петрозаводскэ къэралыгъо университетым июридическэ факультет къыухыгъ. Прокуратурэм икъулыкъухэм Iоф ащишIагъ, Карелием иследователь анахь дэгъоу агъэнэфэгъагъ. Суоярвскэ район хьыкумым хьыкумышIэу Iоф зыщешIэ нэужым 2013-рэ илъэсым Карелием и Апшъэрэ хьыкум ихьыкумышIэу агъэнэфагъ. 2023-рэ илъэсым къыщыублагъэу Адыгеим къагъэкIофэ Петрозаводскэ къэлэ хьыкумым пэщэныгъэ дызэрихьагъ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.