АР-м и ЛIышъхьэу КъумпIыл Мурат оперативнэ штабым изэхэсыгъоу зэрищагъэм цIыфхэм гъэстыныпхъэр зэраIэкIагъахьэрэм щытегущыIагъэх. Гъэстыныпхъэр къызыIэкIэкIыхэрэмрэ къулыкъу зэфэшъхьафхэм ялIыкIохэмрэ мы лъэныкъомкIэ Iофхэм язытет къызэфахьысыжьыгъ.
ЫпэкIэ агъэнэфэгъагъэм фэдиз гъэстыныпхъэр республикэм къырагъэуалIэ, бензинымкIэ ыкIи дизель гъэстыныпхъэмкIэ IэпэчIэгъанэу щыIэр шапхъэхэм адештэ. Ахэр зэпыунхэмкIэ ушъхьагъу щыIэп.Мыщ дэжьым къэIогъэн фае аужырэ мафэхэм гъэстыныпхъэ игъэхъуапIэхэм къатехьэрэ цIыфхэр егъэлыягъэу гъэстыныпхъэм къыкIэупчIэхэ зэрэхъугъэр. Загъорэ АЗС заулэмэ псынкIэу гъэстыныпхъэр ащаухы, чэзыухэр ащызэтырехьэх.Iофхэр зыпкъ игъэуцожьыгъэнхэм пае уахътэ горэкIэ автомобиль псынкIэхэм нахь макIэу гъэстыныпхъэр афырагъэхъонэу Адыгеим унашъо щаштагъ. Ар зыфытегъэпсыхьагъэр зэфэдизэу гъэстыныпхъэр атегощэгъэныр ары. Къулыкъу гъэнэфагъэхэм пшъэрылъ афашIыгъ гъэстыныпхъэхэр къаIэкIэзыгъахьэхэрэм ренэу гъусэныгъэ адыряIэнэу ыкIи Iофхэм язытет гъунэ лъафынэу.