УФ-м теннис цIыкIумкIэ и Федерацие ипрограммэу «Урысыем инеущырэ маф» зыфиIорэм къыдыхэлъытагъэу мы спорт лъэпкъымкIэ зэнэкъокъу Мыекъуапэ щырагъэжьагъ. Адыгэ къэралыгъо университетым иордэунэу Кобл Якъубэ ыцIэ зыхьырэм ар щэкIо.
Турнирым иапэрэ мафэ 2015-рэ илъэсым къэхъугъэхэр ыкIи ахэм анахьыкIэхэр зэнэкъокъугъэх, зэфэхьысыжьхэм ялъытыгъэу анахь лъэшхэри къэнэфагъэх. Адыгеим, Къалмыкъым, Къырым, Краснодар ыкIи Ставрополь крайхэм, Ростовскэ ыкIи Свердловскэ хэкухэм яспортсменхэм заушэтыгъ. КIалэхэри пшъашъэхэри нэбгырэ 48-рэ зырыз хъущтыгъэх. Къалэу Мыекъуапэ, Кощхьэблэ ыкIи Тэхъутэмыкъое районхэм ялIыкIохэм Адыгэ Республикэр къагъэлъэгъуагъ. Кощхьэблэ районым ипсэупIэу Вольнэм щыщ Дмитрий Устянскэм зэIукIэгъуих иIагъ, зэкIэми текIоныгъэ къащыдихыгъ ыкIи къытефэу пэрытныгъэр ыубытыгъ. Къалэу Элиста къикIыгъэ Кирилл Бембеевымрэ Екатеринбург илIыкIоу Ярослав Чипищукрэ хагъэунэфыкIырэ чIыпIэхэр къыдахыгъэх.Пшъашъэхэм язэнэкъокъу Теуцожь районым къикIыгъэхэри хэлэжьагъэх. Селоу Вольнэм щыщ Пелагея Калининам гъэхъэгъэшIу ышIыгъ. Ащ финалныкъор шIуахьыгъ нахь мышIэми, ящэнэрэ чIыпIэм фэбанэзэ къалэу Ростов-на-Дону испортсменкэу Александра Ляшенкэм текIуагъ, джэрз медаль къыфагъэшъошагъ. Краснодар краим щыщ Ангелина Демановар чемпионкэ хъугъэ, Ростов-на-Дону илIыкIоу Ольга Наумовар ятIонэр.
Мыекъуапэ щыщ илъэсипшI зыныбжь Бзаго Даринэ типшъашъэхэмкIэ ятIонэрэ къэгъэлъэгъон иI, зэнэкъокъум япшIэнэрэ чIыпIэр къыщыдихыгъ.Турнирым хэлажьэхэрэм непи заушэтыщт, текIоныгъэм ыкIи хагъэунэфыкIырэ чIыпIэхэм афэбэнэщтых.