Зэрэ Урысые фэдэу Адыгеими «Единэ Россием» ипроектэу «Лъэшхэм къыхахырэр» зыфиIорэр 2025-рэ илъэсым къыщегъэжьагъэу щэлажьэ.
Партием ишъолъыр къутамэ АР-м и ЛIышъхьэ иIэпыIэгъоу ащ игъэцэкIэн фэгъэзагъ. IофшIэным изэхэщэн куп шъхьаф дэлажьэ. Ащ игъэIорышIакIор Адыгеим ыцIэкIэ Къэралыгъо Думэм идепутатэу Хьасанэкъо Мурат.Проектым пшъэрылъ шъхьаIэу иIэр — спортым цIыфыбэ пыщэгъэныр ыкIи япсауныгъэ апсыхьэу егъэсэгъэнхэр. АщкIэ проектым дэлажьэхэрэм анахьэу анаIэ зытырагъэтырэр ныбжьыкIэхэр ары: кIэлэеджакIохэр (кадетскэ классхэм якъызэIухын къыдыхэлъытагъэу), студентхэр, цIыф чанхэр, спортыр зикIасэхэр. Ащ пае республикэм амалыбэ иI: спорт псэолъакIэхэр агъэуцух, агъэцэкIэжьых. Хъугъэ-шIэгъэ инхэм ащыщ самбэмкIэ дунаим гъогогъу 11-рэ ичемпионэу Хьасанэкъо Мурат ишIухьафтын зэрылъ Урысые зэнэкъокъухэу самбэмкIэ гъэрекIо Адыгеим щырекIокIыгъэхэр, кIэлэ Iэтахъохэм азыфагу дзюдомкIэ я XIV-рэ зэнэкъокъоу АР-м мы спорт лъэпкъымкIэ ифедерацие иапэрэ президентэу Войкэ Борис ишIэжь фэгъэхьыгъэр.Проектым игъэцэкIэн дэлэжьэрэ купым къызэриIуагъэмкIэ, спортым цIыфхэр жъугъэу пыщагъэ хъунхэмкIэ, Iофтхьэбзэ зэфэшъхьафхэм язэхэщэнкIэ, гъэсэныгъэм проектыр хэгъэщэгъэнымкIэ Iофыбэ апэ илъ. Ащ къыдыхэлъытэгъэ мурадхэм ащыщ самбэм и Мафэ ыкIи дзюдомкIэ республикэ зэнэкъокъухэу Урысыем спортымкIэ изаслуженнэ мастерэу, Олимпийскэ джэгунхэм яджэрз медаль къыдэзыхыгъэу Тао Хьэсанбый ишIухьафтын зэрылъхэм «япчъэ зэIухыгъэ» Мыекъуапэ щызэхэщэгъэнхэр.Ахэм къащымыуцухэу, Iофтхьабзэу рагъэкIокIыхэрэм, культурэм иунэхэм, тхылъеджапIэхэм ыкIи спорт псэуалъэхэм япчъагъэ ахэгъэхъогъэныр, ныбжьыкIэхэм Iоф адэшIэгъэнымкIэ екIолIакIэхэр гъэнэфэгъэнхэр.Анцокъо Ирин.