А. Гусев
КIэлэцIыкIу ибэхэм аратыгъэ фэтэрхэм яIункIыбзэхэр аIэкIэгъэхьажьыгъэнхэм епхыгъэ Iофтхьабзэ Мыекъуапэ щыкIуагъ. Къэралыгъо программэм къыдыхэлъытагъэу псэупIэ чIыпIакIэу «Лэгъонакъэ ылъапэ» зыфиIорэм Урысыем и ЛIыхъужъэу Олег Цоковым ыцIэ зыхьырэ урамым ахэр зычIэсыщтхэ унэхэр къащаратыгъэх. АР-м и ЛIышъхьэу КъумпIыл Мурат пcэупIэ зиIэ хъугъэхэм афэгушIуагъ.
Iофтхьабзэм хэлэжьагъэх Къэралыгъо Советым – Хасэм и Тхьаматэ игуадзэу Цэй Эдуард, федеральнэ инспектор шъхьаIэу Сергей Дрокиныр, Мыекъуапэ имэрэу Геннадий Митрофановыр, къалэу МыекъуапэкIэ Следственнэ къутамэм ипащэу Роман Поповыр, АР-м иминистрэхэм я Кабинет хэтхэр, Iахьзэхэлъ обществэу «ОБД-м» игенеральнэ пащэу Александр Залуцкэр.Программэм хэлэжьэрэ нэбгырэ 50-мэ IункIыбзэхэр аратыжьыгъэх. 2026-рэ илъэсым ыкIэхэм адэжь кIэлэцIыкIу ибэхэм джыри фэтэр 50-м ехъу аратыщт. Адыгеим и ЛIышъхьэ пшъэрылъ зэрафишIыгъэм тетэу мы илъэсым кIэлэцIыкIу ибэу ыкIи ны-тыхэр зышъхьарымытыжьхэу нэбгыри 150-м нахь мымакIэмэ унэхэр аIэкIагъэхьащтых. Шъугу къэтэгъэкIыжьы: 2025-рэ илъэсым фэтэри 172-рэ аратыгъагъ. Ахэм сомэ миллион 468,8-рэ апэIухьагъ, ащ щыщэу сомэ миллион 435-р республикэ бюджетым къыхагъэкIыгъ.УнэчIэхьажьым пае кIэлэцIыкIу ибэхэм КъумпIыл Мурат афэгушIуагъ, фэтэрыкIэхэм ащынасыпышIонхэу, унэгъо пытэхэр ащашIэнхэу афэлъэIуагъ. НыбжьыкIэхэм социальнэ IэпыIэгъу ятыгъэнымкIэ, унагъор гъэпытэгъэнымкIэ, демографием ылъэныкъокIэ Iофхэм язытет нахьышIу шIыгъэнымкIэ Адыгеим щызэшIуахырэ Iофтхьабзэхэм афэгъэхьыгъэу ЛIышъхьэм къыIотагъ.
«Лъэпкъ проектэу «Унагъом», «Единэ Россием» ипартийнэ проектхэм атегъэпсыхьагъэу тицIыфхэм ящыIакIэ нахьышIу шIыгъэнымкIэ пшъэрылъэу зэшIохыгъэн фаехэмкIэ Iофышхо тэгъэцакIэ. Урысыем и Президентэу Владимир Путиныр кIэщакIо зыфэхъугъэ Iофтхьабзэу щыIэныгъэм гъэцэкIагъэ щыхъухэрэр тинэрылъэгъух. РеспубликэмкIэ сабыибэ зэрыс унагъохэм япчъагъэ хэхъуагъ. КIэлэцIыкIу ибэхэм ыкIи унагъохэм ащапIунхэу аштагъэхэм социальнэ IэпыIэгъоу ящыкIагъэр игъом ыкIи икъоу аIэкIэхьаным пае ищыкIагъэр зэкIэ тэгъэцакIэ. Мы аужырэ илъэсхэм кIэлэцIыкIу ибэхэм ыкIи ны-тыхэр зышъхьарымытыжьхэм зычIэсыщтхэ унэхэр ягъэгъотыгъэнхэмкIэ Iофэу тшIэрэм нахь зедгъэушъомбгъугъ. ТапэкIи а лъэныкъомкIэ Iоф тшIэщт», — къыхигъэщыгъ КъумпIыл Мурат.
Адыгеим и ЛIышъхьэ къызэриIуагъэмкIэ, фэтэрхэр зэкIэ унакIэхэм къащаратыгъэх. ПсэолъэшIхэм псынкIэу ыкIи шIуагъэ къытэу япшъэрылъхэр зэрагъэцэкIагъэхэм пае зэрафэразэр ащ къыхигъэщыгъ. Ащ фэдэ чIыпIэхэу унакIэхэр зыщашIыхэрэм цIыфхэм ящыкIэгъэ социальнэ инфраструктурэр ащыгъэпсыгъэным, щагухэм чъыгхэр ыкIи къэгъагъэхэр адэгъэтIысхьэгъэнхэм анаIэ тырагъэты. Джащ фэдэу кIэлэцIыкIу IыгъыпIэхэм, еджапIэхэм, социальнэ учреждениехэм, псауныгъэм икъэухъумэнкIэ псэуалъэхэм, сатыушIыпIэхэм ыкIи нэмыкIхэм яшIынкIи а зигугъу къэтшIыгъэхэр къыдалъытэх.Iофтхьабзэм илъэхъан Адыгеим и ЛIышъхьэ унакIэр къыплъыхьагъ, ахэм ащыпсэущтхэм гущыIэгъу афэхъугъ, мурадэу яIэхэм защигъэгъозагъ ыкIи гъэхъагъэ хэлъэу яшIоигъоныгъэхэр къадэхъухэу псэунхэу афэлъэIуагъ. Ежь Iофтхьабзэм хэлажьэхэрэми республикэм и ЛIышъхьэ социальнэ пшъэрылъхэм язэшIохын, кIэлэцIыкIу ибэхэм псэупIэ яIэным, проектыкIэхэр пхырыщыгъэнхэм ренэу ынаIэ зэратыригъэтырэм пае зэрэфэразэхэр къаIуагъ.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.