ОбществознаниемкIэ ыкIи физикэмкIэ къэралыгъо ушэтын зыкIхэм якIэуххэр къэнэфагъэх, а предметхэмкIэ республикэм икIэлэеджэкIуи 5-мэ балли 100 къызэрахьыгъэр нафэ къэхъугъ.
ОбществознаниемкIэ балли 100 къэзыхьыгъэхэр Мыекъопэ районым гъэсэныгъэмкIэ игупчэу N 1-р къэзыухыгъэ Виктория Бергенрэ Мыекъопэ лицееу N 8-м икIэлэеджакIоу Елизавета Воликрэ. ФизикэмкIэ балли 100 къахьыгъ Адыгэ республикэ гимназиер къэзыухыгъэ Шъхьэбэ Темыр, Мыекъопэ гурыт еджапIэу N 17-м къычIэкIыгъэ Дарья Кроль, Мыекъопэ лицееу N 8-м икIэлэеджакIоу Алиса Ловцовам. КъэIогъэн фае Дарья Кроль джащ фэдэу хьисапымкIи балли 100 тапэкIи къызэрихьыгъэр. НэмыкI предметхэмкIэ ушэтынхэм якIэуххэр шIэхэу нафэ къэхъущтых.— Ушэтын зыкIхэм баллышхохэр къащызыхьыгъэ кIэлэеджакIохэм япчъагъэ нахьыбэ зэрэхъущтым сицыхьэ телъ. ЕджапIэхэр къэзыухыгъэхэу гъэхъэгъэшхо зышIыгъэхэм сафэгушIо! Агу етыгъэу илъэсыбэрэ зэреджагъэхэм ащ фэдэ шIэныгъэ куухэр къакIэкIуагъ. Къэралыгъо ушэтын зыкIымкIэ балли 100 къызэрахьыгъэм кIэлэеджакIохэми, кIэлэегъаджэхэми, гъэсакIохэми, ны-тыхэми пытагъэ, Iэдэбышхо зэрахэлъыгъэр, Iофышхо зэрэзэшIуахыгъэр къегъэлъагъо. КIэлэцIыкIухэм IэпыIэгъу зэрафэхъугъэхэм, яцыхьэ зэрателъыгъэм къакIэкIуагъ ахэм гъэхъагъэу ашIыгъэхэр, — къыхигъэщыгъ АР-м и ЛIышъхьэу КъумпIыл Мурат.Непэрэ мафэм ехъулIэу Адыгеим икIэлэеджэкIо 13-мэ анахь баллышхохэр къахьыгъэх. Джащ фэдэу къэралыгъо ушэтын зыкIымкIэ балли 100 къэзыхьыхэрэм предмет пэпчъкIэ сомэ мини 100 шIухьафтынэу аратыщт.
