АР-м и ЛIышъхьэ ипресс-къулыкъу
Мыекъуапэ икъэлэ парк дэт зыгъэпскIыпIэр зыпкъ игъэуцожьыгъэнымкIэ зичэзыу IофшIэнхэр лъэкIуатэх. Ахэр ыкIэм зынагъэсхэкIэ цIыфхэмкIэ щынэгъончъэу ыкIи Iэрыфэгъоу щытыщт рекреационнэ шъолъырыр зэтегъэпсыхьагъэ хъущт.
— Мылъку къызэрэдгъотырэм елъытыгъэу мыщ фэдэ гухэлъыр мэкIэ-макIэзэ тэгъэцакIэ. Бассейнымрэ ащ къыпэIулъ чIыпIэмрэ зэрэщытэу дгъэкIэжьынэу тыфай. ЫпэкIэ зэрэщытыгъэм фэдэу ыпкIэ хэмылъэу мы чIыпIэм зыщагъэпсэфыщт. Шъугу къэсэгъэкIыжьы СБЕР-р тигъусэу псэуалъэр зэрагъэкIэжьыщт проектыр къызэрэхэтхыгъэр, зигугъу къэтшIыгъэ банкым ащ пае мылъку къызэритIупщыгъэр. Урысыем и Правительствэ тиIэпыIэгъоу IофшIэнхэм яапэрэ чэзыу гъэрекIо тыфежьэгъагъ: псэолъэжъхэр зэпкъырахыжьыгъэх, пкъэухэр агъэуцугъэх, зыгъэпскIыпIэм ыбгъухэр агъэпытагъэх, ащ къыпэIулъ чIыпIэм ищыкIэгъэ псэуалъэхэр щашIыгъэх. СБЕР-м зичэзыу ахъщэ IэпыIэгъоу къытитыгъэмкIэ мы проектым иятIонэрэ чэзыу игъэцэкIэн тыфежьагъ, — къыIуагъ КъумпIыл Мурат.Проектым къызэрэщыдэлъытагъэмкIэ, джырэ шапхъэхэм адиштэу зыгъэпскIыпIэр зэтырагъэпсыхьащт, псыутх дахи ашIыщт. Ащ фэдэ IофшIэнхэр зэшIозыхыщт подряднэ организациери агъэнэфэгъах. ПсэолъэшIхэм чэухэр агъэуцух. Паркым икъохьэпIэ лъэныкъо зэфэшIыгъэщт. ПсэолъэшIын IофшIэнхэм къэлэ паркым зыщызгъэпсэфхэрэм яягъэ арагъэкIын алъэкIыщт. Ау охътабэ темышIэу къэлэдэсхэм зызщагъэпсэфынэу якIэсэ чIыпIэр зыпкъ рагъэуцожьыщт, псыутх дахэу агъэпсыщтри цIыфхэм лъэшэу агу рихьыщт. Рекреационнэ шъолъырыкIэу къэлэ паркыр, псыхъоу Шъхьэгуащэ иIушъо, «Мэздахэр» зэзыпхыщтым агъэкIэжьыгъэ зыгъэпскIыпIэр изы Iахьэу хъущт.